Saṁyutta Nikāya
II. Nidāna Vagga
21. Bhikkhu Saṁyutta

Sutta 4

Nava Bhikkhu Suttaṁ

 

---

[277]

[1][rhyc] EVAṀ ME SUTAṀ:|| ||

Ekaṁ samayaṁ Bhagavā Sāvatthiyaṁ viharati,||
Jetavane Anāthapiṇḍikassa ārāme.|| ||

[2][rhyc] Tena kho pana samayena aññataro navo bhikkhu pacchā-bhattam piṇḍa-pāta-paṭikkanto vihāram pavisitvā appossukko tunhībhūto saṅkāsāyati,||
na bhikkhūnaṁ veyyāvaccam karoti cīvarakāra samaye.|| ||

[3][rhyc] Atha kho sambahulā bhikkhū yena Bhagavā ten upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ nisīdiṁsu.|| ||

[4][rhyc] Eka-m-antaṁ nisinnā kho te bhikkhū Bhagavantaṁ etad avocuṁ:|| ||

"Idha bhante, aññataro navo bhikkhū pacchā-bhattaṁ piṇḍa-pāta-paṭikkanto vihāraṁ pavisitvā appossukko tuṇhī-bhūto saṅkasāyati||
na bhikkhūnaṁ veyyāvaccaṁ karoti cīvarakāra samaye" ti.|| ||

[5][rhyc] Atha kho Bhagavā aññataraṁ bhikkhū āmantesi|| ||

"Ehi tvaṁ bhikkhu mama vacanena taṁ bhikkhuṁ āmantehi,||
'Satthā taṁ āvuso, āmante' tī" ti.|| ||

[6][rhyc] 'Evaṁ bhante' ti kho so bhikkhu Bhagavato paṭi-s-sutvā yena so bhikkhu ten'upasaṅkami.|| ||

Upasaṅkamitvā taṁ bhikkhum etad avoca:

"'Satthā taṁ āvuso, āmante' tī" ti.|| ||

[7][rhyc] "Evam āvuso" ti kho so bhikkhu tassa bhikkhuno paṭi-s-sutvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

[279] [8][rhyc] Eka-m-antaṁ nisinnaṁ kho taṁ bhikkhūṁ Bhagavā etad avoca:|| ||

"Saccaṁ kira tvaṁ bhikkhu,||
pacchā-bhattaṁ piṇḍa-pāta-paṭikkanto vihāraṁ pavisitvā appossukko tuṇhī-bhūto saṅkasāyasi,||
na bhikkhūnaṁ veyyāvaccaṁ karosi cīvarakāra samaye" ti.|| ||

"Aham pi kho bhante, sakaṁ kiccaṁ karomī" ti.|| ||

[9][rhyc] Atha kho Bhagavā tassa bhikkhuno cetasā ceto-parivitakkam aññāya bhikkhū āmantesi:|| ||

"Mā kho tumhe bhikkhave,||
etassa bhikkhuno vjjhāyittha.|| ||

Eso kho bhikkhave, bhikkhu catunnaṁ jhānānaṁ ābhiceta-sikānaṁ diṭṭha-dhamma-sukha-vihārānaṁ nikāma-lābhī akiccha-lābhī akasira-lābhī.|| ||

Yassa catthāya kula-puttā samma-d-eva agārasmā anagāriyaṁ pabbajanti,||
tad anuttaraṁ Brahma-cariya-pariyosānaṁ diṭṭhe'va dhamme sayaṁ abhiññā sacchi-katvā upasampajja viharatī" ti.|| ||

 

---

 

[10][rhyc] Idam avoca Bhagavā,||
idaṁ vatvāna Sugato athāparaṁ etad avoca Satthā.|| ||

Na-y-idaṁ sithilam ārabbha||
na yidaṁ appena thāmasā,
Nibbānaṁ adhigantabbaṁ||
sabba-dukkhapamocanaṁ.||
Ayaāṁ ca daharo bhikkhu||
ayam uttamaporiso,||
dhāreti antimaṁ dehaṁ||
chetvā Māraṁ savāhininti.|| ||