Saṁyutta Nikāya
II. Nidāna Vagga
21. Bhikkhu Saṁyutta

Sutta 8

Nanda Suttaṁ

 

---

[281]

[1][rhyc][bodh][than] EVAṀ ME SUTAṀ:|| ||

Ekaṁ samayaṁ Bhagavā Sāvatthiyaṁ viharati.||
Jetavane Anāthapiṇḍikassa ārāme.|| ||

[2][rhyc] Atha kho āyasmā Nando Bhagavato mātucchā-putto ākoṭitāni paccākoṭitāni cīvarāni pārupitvā akkhīni añchetvā acchaṁ pattaṁ gahetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

[3][rhyc] Eka-m-antaṁ nisinnaṁ kho āyasmantaṁ Nandaṁ Bhagavā etad avoca:|| ||

[4][rhyc] Na kho te taṁ Nanda, patirūpaṁ kula-puttassa saddhā agārasmā anagāriyaṁ pabba-jitassa||
yaṁ tvaṁ ākoṭitāni paccākoṭitāni cīvarāni pārupeyyāsi,||
akkhīni ca añjeyyāsi,||
acchañ ca pattaṁ dhāreyyāsi.|| ||

Evaṁ kho te Nanda, patirūpaṁ kula-puttassa saddhā agārasmā anagāriyaṁ pabba-jitassa||
yaṁ tvaṁ āraññako ca assasi||
piṇḍa-pātiko ca paṁsu-kūliko ca||
kāmesu ca anapekkho vihareyyāsī' ti.|| ||

[5][rhyc] Idam avoca Bhagavā.|| ||

Idaṁ vatvāna Sugato athāparaṁ etad avoca Satthā:|| ||

Kadāhaṁ Nandam passeyyaṁ||
Araññaṁ paṁsu-kūlikaṁ,||
Aññātuñchena yāpentaṁ||
Kāmesu anapekkhinanti.|| ||

[6][rhyc] Atha kho āyasmā Nando aparena samayena āraññako cā piṇḍa-pātiko ca paṁsu-kūliko ca kāmesu ca anapekho vihāsī' ti.|| ||