Saṁyutta Nikāya
3. Khandha Vagga
22. Khandha Saṁyutta
1. Pathama Nakula-Pita Vagga

Sutta 10

Dutiya Atīt-Ā-nāgata-Paccuppanna Suttaṁ

 

---

[19]

[1][pts][bodh] Evaṁ me sutaṁ|| ||

Ekaṁ samayaṁ Bhagavā Sāvatthīyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

Bhagavā etad avoca:|| ||

Rūpaṁ bhikkhave,||
dukkhaṁ atīt-ā-nāgataṁ,||
ko pana [20] vādo pacc'uppannassa.|| ||

Evaṁ passaṁ bhikkhave,||
sutavā ariya-sāvako atītasmiṁ rūpasmiṁ anapekho hoti,||
anāgataṁ rūpaṁ n'ābhinandati,||
pacc'uppannassa rūpassa nibbidāya||
virāgāya||
nirodhāya paṭipanno hoti.|| ||

■

Vedanā dukkhā atīt-ā-nāgataṁ,||
ko pana vādo pacc'uppannassa.|| ||

Evaṁ passaṁ bhikkhave,||
sutavā ariya-sāvako atītasmiṁ vedanasmiṁ anapekho hoti,||
anāgataṁ vedanaṁ n'ābhinandati||
pacc'uppannassa vedanassa nibbidāya||
virāgāya||
nirodhāya paṭipanno hoti.|| ||

■

Saññā dukkhā atīt-ā-nāgataṁ,||
ko pana vādo pacc'uppannassa.|| ||

Evaṁ passaṁ bhikkhave,||
sutavā ariya-sāvako atītasmiṁ saññasmiṁ anapekho hoti,||
anāgataṁ saññaṁ n'ābhinandati,||
pacc'uppannassa saññassa nibbidāya||
virāgāya||
nirodhāya paṭipanno hoti.|| ||

■

Saṅkhārā dukkhā atīt-ā-nāgataṁ,||
ko pana vādo pacc'uppannassa.|| ||

Evaṁ passaṁ bhikkhave,||
sutavā ariya-sāvako atītasmiṁ saṅkhārasmiṁ anapekho hoti,||
anāgataṁ saññaṁ n'ābhinandati,||
pacc'uppannassa saṅkhārassa nibbidāya||
virāgāya||
nirodhāya paṭipanno hoti.|| ||

■

Viññāṇaṁ dukkhaṁ atīt-ā-nāgataṁ,||
ko pana vādo pacc'uppannassa.|| ||

Evaṁ passaṁ bhikkhave,||
sutavā ariya-sāvako atītasmiṁ viññāṇasmiṁ anapekho hoti,||
anāgataṁ viññāṇaṁ n'ābhinandati,||
pacc'uppannassa viññāṇassa nibbidāya||
virāgāya||
nirodhāya paṭipanno hoti" ti.|| ||