Saṁyutta Nikāya
3. Khandha Vagga
22. Khandha Saṁyutta
4. Na Tumhāka Vagga

Sutta 36

Dutiya Bhikkhu Suttaṁ

 

---

[36]

[1][pts][than][bodh] Evaṁ me sutaṁ.|| ||

Ekaṁ samayaṁ Bhagavā Sāvatthiyaṁ viharati.|| ||

Atha kho aññataro bhikkhu yena Bhagavā ten'upasaṅkami,||
upasaṅkamitvā Bhagavantaṁ abhivādetvā eka-m-antaṁ nisīdi,||
eka-m-antaṁ nisinno kho so bhikkhu Bhagavantaṁ etad avoca:|| ||

"Sādhu me bhante,||
Bhagavā saṅkhittena dhammaṁ desetu,||
yam ahaṁ Bhagavato dhammaṁ sutvā eko vūpakaṭṭho appamatto ātāpī pahit'atto vihareyyan" ti.|| ||

"Yaṁ kho bhikkhu, anuseti||
taṁ anumīyati.|| ||

Yaṁ anumīyati||
tena saṅkhaṁ gacchati,||
yaṁ nānuseti||
na taṁ anumīyati,||
yaṁ nānumīyati||
na tena saṅkhaṁ gacchatī" ti.|| ||

"Aññātaṁ Bhagavā,||
aññātaṁ sugatā" ti.|| ||

"Yathā kathaṁ pana tvaṁ bhikkhu,||
mayā saṅkhittena bhāsitassa vitthārena atthaṁ ājānāsī" ti?|| ||

"Rūpaṁ ce bhante, anuseti||
taṁ anumīyati,||
yaṁ anumīyati||
tena saṅkhaṁ gacchati.|| ||

Vedanaṁ ce anuseti||
taṁ anumīyati,||
yaṁ anumīyati||
tena saṅkhaṁ gacchati.|| ||

Saññaṁ ce anuseti||
taṁ anumīyati,||
yaṁ anumīyati||
tena saṅkhaṁ gacchati.|| ||

Saṅkhāre ce anuseti||
taṁ anumīyati,||
yaṁ anumīyati||
tena saṅkhaṁ gacchati.|| ||

Viññāṇaṁ ce anuseti||
taṁ anumīyati,||
yaṁ anumīyati||
tena saṅkhaṁ gacchati.|| ||

■

Rūpaṁ ce bhante, nānuseti||
na taṁ anumīyati,||
yaṁ [37] nānumīyati||
na tena saṅkhaṁ gacchati.|| ||

Vedanaṁ ce, nānuseti||
na taṁ anumīyati,||
yaṁ nānumīyati||
na tena saṅkhaṁ gacchati.|| ||

Saññaṁ ce nānuseti||
na taṁ anumīyati,||
yaṁ nānumīyati||
na tena saṅkhaṁ gacchati.|| ||

Saṅkhāre ce nānuseti||
na taṁ anumīyati,||
yaṁ nānumīyati||
na tena saṅkhaṁ gacchati.|| ||

Viññāṇaṁ ce nānuseti||
na taṁ anumīyati,||
yaṁ nānumīyati||
na tena saṅkhaṁ gacchati.|| ||

Imassa kho'haṁ bhante,||
Bhagavatā saṅkhittena bhasitassa||
evaṁ vitthārena atthaṁ ājānāmī" ti.|| ||

 

§

 

"Sādhu sādhu bhikkhū,||
sādhu kho tvaṁ bhikkhu mayā saṅkhittena bhāsitassa vitthārena atthaṁ ājānāsi:|| ||

Rūpañ ce bhikkhu, anuseti||
taṁ anumīyati,||
yaṁ anumīyati||
tena saṅkhaṁ gacchati.|| ||

Vedanañ ce bhikkhu anuseti||
taṁ anumīyati,||
yaṁ anumīyati||
tena saṅkhaṁ gacchati.|| ||

Saññañ ce bhikkhu anuseti,||
taṁ anumīyati,||
yaṁ anumīyati||
tena saṅkhaṁ gacchati.|| ||

Saṅkhāre ce bhikkhu anuseti,||
taṁ anumīyati,||
yaṁ anumīyati||
tena saṅkhaṁ gacchati.|| ||

Viññāṇañ ce bhikkhu anuseti,||
taṁ anumīyati,||
yaṁ anumīyati||
tena saṅkhaṁ gacchati.|| ||

■

Rūpañ ce bhikkhu, nānuseti,||
na taṁ anumīyati,||
yaṁ nānumīyati,||
na tena saṅkhaṁ gacchati.|| ||

Vedanañ ce nānuseti,||
na taṁ anumīyati,||
yaṁ nānumīyati,||
na tena saṅkhaṁ gacchati.|| ||

Saññañ ce nānuseti,||
na taṁ anumīyati,||
yaṁ nānumīyati,||
na tena saṅkhaṁ gacchati.|| ||

Saṅkhare ce nānuseti,||
na taṁ anumīyati,||
yaṁ nānumīyati,||
na tena saṅkhaṁ gacchati.|| ||

Viññāṇañ ce nānuseti,||
na taṁ anumīyati,||
yaṁ nānumīyati,||
na tena saṅkhaṁ gacchati.|| ||

Imassa kho bhikkhu,||
mayā saṅkhitte na bhāsitassa||
evaṁ vitthārena attho daṭṭhabbo" ti.|| ||

Atha kho so bhikkhu,||
Bhagavato bhāsitaṁ abhinan'ditvā anumo-ditvā uṭṭhāy āsanā Bhagavantaṁ abhivādetvā padakkhiṇaṁ katvā pakkami.|| ||

Atha kho so bhikkhu eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṁ pabbajanti,||
tad anuttaraṁ Brahma-cariya-pariyosānaṁ diṭṭhe'va dhamme sayaṁ abhiññā sacchi-katvā upasampajja vihāsi:|| ||

"Khīṇā jāti,||
vusitaṁ Brahma-cariyaṁ,||
kataṁ karaṇīyaṁ,||
nāparaṁ itthattāyā" ti abbhaññāsi.|| ||

Aññataro ca pana so bhikkhu arahataṁ ahosīti.|| ||