Saṁyutta Nikāya
3. Khandha Vagga
22. Khandha Saṁyutta
4. Na Tumhāka Vagga

Sutta 37

Paṭhama Ānanda Suttaṁ

 

---

[37]

[1][pts][bodh] Evaṁ me sutaṁ.|| ||

Ekaṁ samayaṁ Bhagavā Sāvatthiyaṁ viharati.|| ||

Atha kho āyasmā Ānando yena Bhagavā ten'upasaṅkami,||
upasaṅkamitvā Bhagavantaṁ abhivādetvā eka-m-antaṁ nīsīdi.|| ||

Eka-m-antaṁ nisinnaṁ kho||
āyasmantaṁ Ānandaṁ Bhagavā etad avoca:|| ||

"Sace taṁ Ānanda, evaṁ puccheyyuṁ:|| ||

'Katamesaṁ āvuso Ānanda, dhammānaṁ||
uppādo paññāyati,||
vayo paññāyati,||
ṭhitassa aññathattaṁ paññāyatī' ti?|| ||

Evaṁ puṭṭho tvaṁ Ānanda,||
kinti khyākareyyāsī" ti?|| ||

[38] "Sace maṁ bhante, evaṁ puccheyyuṁ:|| ||

'Katamesaṁ āvuso Ānanda, dhammānaṁ||
uppādo paññāyati,||
vayo paññāyati,||
ṭhitassa aññathattaṁ paññāyatī' ti?|| ||

Evaṁ puṭṭhohaṁ bhante, evaṁ khyākareyyaṁ:|| ||

'Rūpassa kho āvuso uppādo paññāyati,||
vayo paññāyati,||
ṭhitassa aññathattaṁ paññāyati,|| ||

Vedanāya uppādo paññāyati,||
vayo paññāyati,||
ṭhitassa aññathattaṁ paññāyati.|| ||

Saññāya uppādo paññāyati,||
vayo paññāyati,||
ṭhitassa aññathattaṁ paññāyati,|| ||

Saṅkhārānaṁ uppādo paññāyati,||
vayo paññāyati,||
ṭhitassa aññathattaṁ paññāyati.|| ||

Viññāṇassa uppādo paññāyati,||
vayo paññāyati,||
ṭhitassa aññathattaṁ paññāyati,|| ||

Imesaṁ kho āvuso,||
dhammānaṁ uppādo paññāyati,||
vayo paññāyati,||
Ṭhitassa aññathattaṁ paññātī' ti.|| ||

Evaṁ puṭṭhohaṁ bhante, evaṁ khyākareyyan" ti.|| ||

"Sādhu sādhu Ānanda!|| ||

Rūpassa kho Ānanda, uppādo paññāyati,||
vayo paññāyati,||
ṭhitassa aññathattaṁ paññāyati.|| ||

Vedanāya uppādo paññāyati,||
vayo paññāyati,||
ṭhitassa aññathattaṁ paññāyati.|| ||

Saññāya uppādo paññāyati,||
vayo paññāyati,||
ṭhitassa aññathattaṁ paññāyati.|| ||

Saṅkhārānaṁ uppādo paññāyati,||
vayo paññāyati,||
ṭhitassa aññathattaṁ paññāyati.|| ||

Viññāṇassa uppādo paññāyati,||
vayo paññāyati,||
ṭhitassa aññathattaṁ paññāyati.|| ||

Imesaṁ kho ānnada, dhammānaṁ uppādo paññāyati,||
vayo paññāyati,||
ṭhitassa aññathattaṁ paññāyati.|| ||

Evaṁ puṭṭho tvaṁ Ānanda,||
evaṁ khyākareyyāsī" ti.|| ||