Saṁyutta Nikāya
3. Khandha Vagga
22. Khandha Saṁyutta
4. Na Tumhāka Vagga

Sutta 41

Tatiya Anu-Dhamma Suttaṁ

 

---

[41]

[1][pts][than][olds] Sāvatthiyaṁ:|| ||

[3] "Dhammānudhamma-paṭipannassa bhikkhave, bhikkhuno ayamanu-Dhammo hoti:|| ||

Yaṁ rūpe dukkhānupassī vihareyya,||
vedanāya dukkhānupassī vihareyya,||
saññaṁ dukkhānupassī vihareyya,||
saṅkhāre dukkhānupassī vihareyya,||
viññāṇaṁ dukkhānupassī vihareyya.|| ||

[4] So rūpe dukkhānupassī viharanto||
vedanāya dukkhānupassī viharanto||
saññāya dukkhānupassī viharanto||
saṅkhāresu dukkhānupassī viharanto||
viññāṇe dukkhānupassī viharanto,||
rūpaṁ parijānāti||
vedanaṁ parijānāti||
saññaṁ parijānāti||
saṅkhāre parijānāti||
viññāṇaṁ parijānāti.|| ||

[5] So rūpaṁ parijānaṁ||
vedanaṁ parijānaṁ||
saññaṁ parijānaṁ||
saṅkhāre parijānaṁ||
viññāṇaṁ parijānaṁ||
parimuccati rūpamhā,||
parimuccati vedanāya,||
parimuccati saññāya,||
parimuccati saṅkhārehi,||
parimuccati viññāṇamhā,||
parimuccati jātiyā jarāya maraṇena sokehi paridevehi dukkhehi domanassehi upāyāsehi,||
'parimuccati dukkhasmā' ti vadāmī" ti.|| ||