Saṁyutta Nikāya
3. Khandha Vagga
22. Khandha Saṁyutta
8. Khajjaniya Vagga

Sutta 76

Paṭhama Arahanta Suttaṁ

 

---

[82]

[1][pts][bodh][than] Evaṁ me sutaṁ.|| ||

Ekaṁ samayaṁ Bhagavā Sāvatthiyaṁ viharati.|| ||

"Rūpaṁ bhikkhave, aniccaṁ.|| ||

Yad aniccaṁ taṁ dukkhaṁ.|| ||

Yaṁ dukkhaṁ tad anattā.|| ||

Yad anattā taṁ|| ||

'N'etaṁ [83] mama,||
n'eso ham asmi,||
na meso attā' ti.|| ||

Evam etaṁ yathā-bhūtaṁ samma-p-paññāya daṭṭhabbaṁ.|| ||

■

Vedanā aniccā.|| ||

Yad aniccaṁ taṁ dukkhaṁ.|| ||

Yaṁ dukkhaṁ tad anattā.|| ||

Yad anattā taṁ|| ||

'N'etaṁ mama,||
n'eso ham asmi,||
na meso attā' ti.|| ||

Evam etaṁ yathā-bhūtaṁ samma-p-paññāya daṭṭhabbaṁ.|| ||

■

Saññā aniccā.|| ||

Yad aniccaṁ taṁ dukkhaṁ.|| ||

Yaṁ dukkhaṁ tad anattā.|| ||

Yad anattā taṁ|| ||

'N'etaṁ mama,||
n'eso ham asmi,||
na meso attā' ti.|| ||

Evam etaṁ yathā-bhūtaṁ samma-p-paññāya daṭṭhabbaṁ.|| ||

■

Saṅkhārā aniccā.|| ||

Yad aniccaṁ taṁ dukkhaṁ.|| ||

Yaṁ dukkhaṁ tad anattā.|| ||

Yad anattā taṁ|| ||

'N'etaṁ mama,||
n'eso ham asmi,||
na meso attā' ti.|| ||

Evam etaṁ yathā-bhūtaṁ samma-p-paññāya daṭṭhabbaṁ.|| ||

■

Viññāṇaṁ aniccaṁ.|| ||

Yad aniccaṁ taṁ dukkhaṁ.|| ||

Yaṁ dukkhaṁ tad anattā.|| ||

Yad anattā taṁ|| ||

'N'etaṁ mama,||
n'eso ham asmi,||
na meso attā' ti.|| ||

Evam etaṁ yathā-bhūtaṁ samma-p-paññāya daṭṭhabbaṁ.|| ||

 

§

 

Evaṁ passaṁ bhikkhave,||
sutavā ariya-sāvako rūpasmim pi nibbindati,||
vedanāya pi nibbindati,||
saññāya pi nibbindati,||
saṅkhāresu pi nibbindati,||
viññāṇasmim pi nibbindati.|| ||

Nibbindaṁ virajjatī,||
virāgā vimuccati.|| ||

Vimuttaṁ vimuttamiti ñāṇaṁ hoti:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānāti.|| ||

Yāvatā bhikkhave, sattāvāsā,||
yāvatā bhavaggaṁ,||
ete aggā ete seṭṭhā lokasmiṁ||
yad idaṁ Arahanto" ti.|| ||

Idam avoca Bhagavā.|| ||

 

---

 

Idaṁ vatvā Sugato athāparaṁ etad avoca Satthā:|| ||

"Sukhino vata Arahanto||
taṇhā tesaṁ na vijjati||
Asmimāno samucchinno||
moha-jālaṁ padālitaṁ.|| ||

Anejato anuppattā||
cittaṁ tesaṁ anāvilaṁ||
Loke anupalittā te||
brahma-bhūtā anāsavā.|| ||

Pañca-k-khandhe pariññāya||
satta-sa-d-dhamma-gocarā||
Pāsaṁsiyā sappurisā||
puttā Buddhassa orasā.|| ||

Satta-ratana-sampannā||
tīsu sikkhāsu sikkhitā||
Anuvicaranti mahāvīrā||
pahīna-bhaya-bheravā.|| ||

Das'aṅgehi sampannā||
mahā-nāgā samāhitā||
Ete kho seṭṭhā lokasmiṁ||
taṇhā tesaṁ na vijjati.|| ||

Asekhañāṇaṁ uppannaṁ||
antimo yaṁ samussayo||
Yo sāro Brahma-cariyassa||
tasmiṁ aparapaccayā.|| ||

[84] Vidhāsu na vikampanti||
vippamuttā puna-b-bhavā||
Danta-bhumiṁ anuppattā||
te loke vijit'āvino.|| ||

Uddhaṁ tiriyaṁ apācīnaṁ||
nandī tesaṁ na vijjati||
Nandanti te sīha-nādaṁ||
Buddhā loke anuttarā" ti.|| ||