Saṁyutta Nikāya
3. Khandha Vagga
22. Khandha Saṁyutta
8. Khajjaniya Vagga

Sutta 81

Pārileyyaka Suttaṁ

 

---

[94]

[1][pts][than][bodh][olds] Evaṁ me sutaṁ:|| ||

Ekaṁ samayaṁ Bhagavā Kosambīyaṁ viharati||
Ghositārāme.|| ||

Atha kho Bhagavā||
pubbaṇha-samayaṁ nivāsetvā,||
patta-cīvaraṁ ādāya||
Kosambīyaṁ piṇḍāya pāvisi.|| ||

Kosambīyaṁ piṇḍāya caritvā||
pacchā-bhattaṁ piṇḍa-pāta-paṭikkanto||
sāmaṁ [95] senāsaṁ saṁsāmetvā||
patta-cīvaraṁ ādāya||
anāmantetvā upaṭṭhāke||
anapaloketvā bhikkhu-saṅghaṁ||
eko adutiyo cārikaṁ pakkāmi.|| ||

Atha kho aññataro bhikkhu||
acira-pakkantassa Bhagavato||
yen'āyasmā Ānando ten'upasaṅkami.|| ||

Upasaṅkamitvā||
āyasmantaṁ Ānandaṁ etad avoca:|| ||

"Ehā'vuso Ānanda, Bhagavā||
sāmaṁ sen'āsanaṁ saṁsāmetvā||
patta-cīvaram ādāya||
anāmantetvā upaṭṭhāke||
anapaloketvā bhikkhu-saṅghaṁ||
eko adutiyo cārikaṁ pakkanto" ti.|| ||

"Yasmiṁ āvuso samaye Bhagavā||
sāmaṁ sen'āsanaṁ saṁsāmetvā||
patta-cīvaraṁ ādāya||
anāmantetvā upaṭṭhāke||
anapaloketvā bhikkhu-saṅghaṁ||
eko adutiyo cārikaṁ pakkamati||
eko va Bhagavā tasmiṁ samaye viharitukāmo hoti.|| ||

Na Bhagavā tasmiṁ samaye||
kenaci anubandhitabbo hotī" ti.|| ||

Atha kho Bhagavā||
anupubbena cārikaṁ||
caramāno yena Pārileyyakaṁ tad avasari.|| ||

Tatra sudaṁ Bhagavā||
Pārileyyake viharati bhadda-sāla-mūle.|| ||

Atha kho sambahulā bhikkhu||
yen'āyasmā Ānando ten'upasaṅkamiṁsu.|| ||

Upasaṅkamitvā āyasmatā Ānandena||
saddhiṁ sammodiṁsu.|| ||

Sammodanīyaṁ kathaṁ sārāṇiyaṁ vīti-sāretvā||
eka-m-antaṁ nisīdiṁsu.|| ||

Eka-m-antaṁ nisinnā kho||
te bhikkhū āyasmantaṁ Ānandaṁ||
etad avocuṁ:|| ||

"Cira-s-sutā kho no āvuso Ānanda||
Bhagavato sammukhā dhammīkathā||
icchāma mayaṁ āvuso Ānanda,||
Bhagavato sammukhā dhammiṁ kathaṁ sotun" ti.|| ||

Atha kho āyasmā Ānando||
tehi bhikkhūhi||
saddhiṁ yena Pārileyyakaṁ||
bhaddasālamūlaṁ||
yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā||
eka-m-antaṁ nisīdi.|| ||

Eka-m-antaṁ nisinne kho||
te bhikkhū Bhagavā dhammiyā kathāya||
sandassesi||
samādapesi||
samuttejasi||
sampahaṁsesi.|| ||

[96] Tena kho pana samayena aññatarassa bhikkhuno evaṁ cetaso parivitakko udapādi:|| ||

"Kathaṁ nu kho jānato||
kathaṁ passato||
anantarā āsavānaṁ khayo hotī" ti?|| ||

Atha kho Bhagavā tassa bhikkhuno cetasā ceto-parivitakkam-aññāya bhikkhū āmantesi:|| ||

"Vicayaso desito bhikkhave, mayā dhammo:|| ||

Vicayaso desitā cattāro sati-paṭṭhānā.|| ||

Vicayaso desitā cattāro samma-p-padhānā.|| ||

Vicayaso desitā cattāro iddhi-pādā.|| ||

Vicayaso desitāni pañc'indriyāni.|| ||

Vicayaso desitāni pañca-balāni.|| ||

Vīcayaso desitā satta-bojjh'aṅgā.|| ||

Vicayaso desito Ariyo Aṭṭhaṅgiko Maggo.|| ||

Evaṁ vicayaso kho desito bhikkhave, mayā dhammo.|| ||

Evaṁ vicayaso desite kho bhikkhave, mayā dhamme||
atha ca panidh'ekaccassa bhikkhuno evaṁ cetaso parivitakko udapādi:|| ||

'Kathaṁ nu kho jānato||
kathaṁ passato||
anantarā āsavānaṁ khayo hotī' ti?|| ||

Kathaṁ ca bhikkhave, jānato||
kathaṁ passato||
anantarā āsavānaṁ khayo hoti?|| ||

Idha bhikkhave, a-s-sutavā puthujjano||
ariyānaṁ adassāvī||
ariya-Dhammassa akovido||
ariya-Dhamme avinīto||
sappurisānaṁ adassāvī||
sappurisa-Dhammassa akovido||
sappurisa-Dhamme avinīto,||
rūpaṁ attato samanupassati||
yā kho pana sā bhikkhave, samanupassanā saṅkhāro so.|| ||

So pana saṅkhāro,||
kiṁ nidāno,||
kiṁ samudayo,||
kiñ jātiko,||
kim pabhavoti?|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so saṅkhāro.|| ||

Iti kho bhikkhave,||
so pi kho saṅkhāro anicco saṅkhato paṭicca-samuppanno,||
sā pi taṇhā aniccā saṅkhatā paṭicca-samuppannā,||
sā pi vedanā aniccā saṅkhatā paṭicca-samuppannā||
so pi phasso anicco saṅkhato paṭicca-samuppanno||
sā pi avijjā aniccā saṅkhatā paṭicca-samuppannā.|| ||

[97] Evam pi kho bhikkhave, jānato||
evaṁ passato anantarā āsavānaṁ khayo hoti.|| ||

■

Na heva kho rūpaṁ attato samanupassati||
api ca kho rūpavantaṁ attāṇaṁ samanupassati.|| ||

Yā kho pana sā bhikkhave,||
samanupassanā saṅkhāro so.|| ||

So pana saṅkhāro||
kiṁ nidāno||
kiṁ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so saṅkhāro.|| ||

Iti kho bhikkhave,||
so pi kho saṅkhāro anicco saṅkhato paṭicca-samuppanno,||
sā pi taṇhā aniccā saṅkhatā paṭicca-samuppannā,||
sā pi vedanā aniccā saṅkhatā paṭicca-samuppannā||
so pi phasso anicco saṅkhato paṭicca-samuppanno||
sā pi avijjā aniccā saṅkhatā paṭicca-samuppannā.|| ||

Evam pi kho bhikkhave, jānato||
evaṁ passato anantarā āsavānaṁ khayo hoti.|| ||

■

Na heva kho rūpaṁ attato samanupassati,||
na rūpavantaṁ attāṇaṁ samanupassati||
api ca kho attani rūpaṁ samanupassati.|| ||

Yā kho pana sā bhikkhave,||
samanupassanā saṅkhāro so.|| ||

So pana saṅkhāro||
kiṁ nidāno||
kiṁ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so saṅkhāro.|| ||

Iti kho bhikkhave,||
so pi kho saṅkhāro anicco saṅkhato paṭicca-samuppanno,||
sā pi [98] taṇhā aniccā saṅkhatā paṭicca-samuppannā,||
sā pi vedanā aniccā saṅkhatā paṭicca-samuppannā||
so pi phasso anicco saṅkhato paṭicca-samuppanno||
sā pi avijjā aniccā saṅkhatā paṭicca-samuppannā.|| ||

Evam pi kho bhikkhave, jānato||
evaṁ passato anantarā āsavānaṁ khayo hoti.|| ||

■

Na heva kho rūpaṁ attato samanupassati,||
na rūpavantaṁ attāṇaṁ samanupassati,||
na attani rūpaṁ samanupassati||
api ca kho rūpasmiṁ attāṇaṁ samanupassati.|| ||

Yā kho pana sā bhikkhave,||
samanupassanā saṅkhāro so.|| ||

So pana saṅkhāro||
kiṁ nidāno||
kiṁ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so saṅkhāro.|| ||

Iti kho bhikkhave,||
so pi kho saṅkhāro anicco saṅkhato paṭicca-samuppanno,||
sā pi taṇhā aniccā saṅkhatā paṭicca-samuppannā,||
sā pi vedanā aniccā saṅkhatā paṭicca-samuppannā||
so pi phasso anicco saṅkhato paṭicca-samuppanno||
sā pi avijjā aniccā saṅkhatā paṭicca-samuppannā.|| ||

Evam pi kho bhikkhave, jānato||
evaṁ passato anantarā āsavānaṁ khayo hoti.|| ||

■

Na heva kho rūpaṁ attato samanupassati||
na rūpavantaṁ attāṇaṁ samanupassati||
na attani rūpaṁ samanupassati||
na rūpasmiṁ attāṇaṁ samanupassati||
api ca kho [99] vedanaṁ attato samanupassati||
api ca kho vedanā-vantaṁ attāṇaṁ samanupassati||
api ca kho attani vedanaṁ samanupassati||
api ca kho vedanāya attāṇaṁ samanupassati.|| ||

Api ca kho saññaṁ attato samanupassati||
api ca kho saññā-vantaṁ attāṇaṁ samanupassati||
api ca kho attani saññaṁ samanupassati||
api ca kho saññāya attāṇaṁ samanupassati.|| ||

Api ca kho saṅkhāre attato samanupassati||
api ca saṅkhāra-vantaṁ attāṇaṁ samanupassati||
api ca kho attani saṅkhāre samanupassati||
na saṅkhāresu attāṇaṁ samanupassati

Api ca kho viññāṇaṁ attato samanupassati||
api ca kho viññāṇa-vantaṁ attāṇaṁ samanupassati||
api ca kho attani viññāṇaṁ samanupassati||
api ca kho viññāṇasmiṁ attāṇaṁ samanupassati.|| ||

Yā kho pana sā bhikkhave samanupassanā, saṅkhāro so.

So pana saṅkhāro kiṁ nidāno||
kiṁ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so saṅkhāro.|| ||

Iti kho bhikkhave,||
so pi kho saṅkhāro anicco saṅkhato paṭicca-samuppanno,||
sā pi taṇhā aniccā saṅkhatā paṭicca-samuppannā,||
sā pi vedanā aniccā saṅkhatā paṭicca-samuppannā||
so pi phasso anicco saṅkhato paṭicca-samuppanno||
sā pi avijjā aniccā saṅkhatā paṭicca-samuppannā.|| ||

Evam pi kho bhikkhave, jānato||
evaṁ passato anantarā āsavānaṁ khayo hoti.|| ||

■

Na heva kho rūpaṁ attato samanupassati||
na rūpavantaṁ attāṇaṁ samanupassati||
na attani rūpaṁ samanupassati||
na rūpasmiṁ attāṇaṁ samanupassati.|| ||

Na vedanaṁ attato samanupassati||
na vedanā-vantaṁ attāṇaṁ samanupassati||
na attani vedanaṁ samanupassati||
na vedanāya attāṇaṁ samanupassati.|| ||

Na saññaṁ attato samanupassati||
na saññā-vantaṁ attāṇaṁ samanupassati||
na attani saññaṁ samanupassati||
na saññāya attāṇaṁ samanupassa ti.|| ||

Na saṅkhāre attato samanupassati||
na saṅkhāra-vantaṁ attāṇaṁ samanupassati||
na attani saṅkhāre samanupassati||
na saṅkhāresu attāṇaṁ samanupassati.|| ||

Na viññāṇaṁ attato samanupassati||
na viññāṇa-vantaṁ attāṇaṁ samanupassati||
na attani viññāṇaṁ samanupassati||
na viññāṇasmiṁ attāṇaṁ samanupassati.|| ||

Api ca kho evaṁ diṭṭhi hoti:|| ||

"So attā so loko so pecca bhavissāmi nicco dhuvo sassato avipariṇāma-dhammo" ti.|| ||

Yā kho pana sā bhikkhave,||
sassatadiṭṭhi saṅkhāro so.

So pana saṅkhāro||
kiṁ nidāno||
kiṁ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so saṅkhāro.|| ||

Iti kho bhikkhave,||
so pi kho saṅkhāro anicco saṅkhato paṭicca-samuppanno,||
sā pi taṇhā aniccā saṅkhatā paṭicca-samuppannā,||
sā pi vedanā aniccā saṅkhatā paṭicca-samuppannā||
so pi phasso anicco saṅkhato paṭicca-samuppanno||
sā pi avijjā aniccā saṅkhatā paṭicca-samuppannā.|| ||

Evam pi kho bhikkhave, jānato||
evaṁ passato anantarā āsavānaṁ khayo hoti.|| ||

■

Na heva kho rūpaṁ attato samanupassati||
na rūpavantaṁ attāṇaṁ samanupassati||
na attani rūpaṁ samanupassati||
na rūpasmiṁ attāṇaṁ samanupassati.|| ||

Na vedanaṁ attato samanupassati||
na vedanaṁ attato samanupassati vedanā-vantaṁ attāṇaṁ samanupassati||
na attani vedanaṁ samanupassati||
na vedanāya attāṇaṁ samanupassatī.|| ||

Na saññaṁ attato samanupassati||
na saññā-vantaṁ attāṇaṁ samanupassati||
na attani saññaṁ samanupassati||
na saññāya attāṇaṁ samanupassati.|| ||

Na saṅkhāre attato samanupassati||
na saṅkhāra-vantaṁ attāṇaṁ samanupassati||
na attani saṅkhāre samanupassati||
na saṅkhāresu attāṇaṁ samanupassati.|| ||

Na viññāṇaṁ attato samanupassati||
na viññāṇa-vantaṁ attāṇaṁ samanupassati||
na attani viññāṇaṁ samanupassati||
na viññāṇasmiṁ attāṇaṁ samanupassati.|| ||

Nā pi evaṁ diṭṭhi hoti:|| ||

'So attā so loko so pecca bhavissāmi nicco dhuvo sassato avipariṇāma-dhammo' ti.|| ||

Api ca kho evaṁ diṭṭhi hoti:|| ||

'No c'assaṁ no ca me siyā||
na bhavissāmi' na me bhavissati' ti.|| ||

Yā kho pana sā bhikkhave, ucchedadiṭṭhi saṅkhāro so.|| ||

So pana saṅkhāro||
kiṁ nidāno||
kiṁ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so saṅkhāro.|| ||

Iti kho bhikkhave,||
so pi kho saṅkhāro anicco saṅkhato paṭicca-samuppanno,||
sā pi taṇhā aniccā saṅkhatā paṭicca-samuppannā,||
sā pi vedanā aniccā saṅkhatā paṭicca-samuppannā||
so pi phasso anicco saṅkhato paṭicca-samuppanno||
sā pi avijjā aniccā saṅkhatā paṭicca-samuppannā.|| ||

Evam pi kho bhikkhave, jānato||
evaṁ passato anantarā āsavānaṁ khayo hoti.|| ||

■

Na heva kho rūpaṁ attato samanupassati||
na rūpavantaṁ attāṇaṁ samanupassati||
na attani rūpaṁ samanupassati||
na rūpasmiṁ attāṇaṁ samanupassati.|| ||

Na vedanaṁ attato samanupassati||
na vedanā-vantaṁ attāṇaṁ samanupassti||
na attani vedanaṁ samanupassati||
na vedanāya attāṇaṁ samanupassati.|| ||

Na saññaṁ attato samanupassati||
na saññā-vantaṁ attāṇaṁ samanupassati||
na attani saññaṁ samanupassati||
na saññāya attāṇaṁ samanupassati.|| ||

Na saṅkhāre samanupassati||
na saṅkhāra-vantaṁ attāṇaṁ samanupassati||
na attani saṅkhāre samanupassati||
na saṅkhāresu attāṇaṁ samanupassati.|| ||

Na viññāṇaṁ attato samanupassati||
na viññāṇa-vantaṁ attāṇaṁ samanupassati||
na attani viññāṇaṁ samanupassati||
na viññāṇasmiṁ attāṇaṁ samanupassati.|| ||

Nā'pi evaṁ diṭṭhi hoti:|| ||

'So attā so loko so pecca bhavissāmi nicco dhuvo sassato avipariṇāma-dhammo' ti.|| ||

Nā pi evaṁ diṭṭhi hoti:|| ||

'No c'assaṁ no ca me siyā||
na bhavissāmi- na me bhavissatī' ti.|| ||

Api ca kho|| ||

'Kaṅkhī hoti vecikicchī aniṭṭhaṇ-gato Sad'Dhamme.'|| ||

Yā kho pana sā bhikkhave,||
kaṅkhitā vecikicchitā aniṭṭhaṇ-gatatā Sad'Dhamme,||
saṅkhāro so.|| ||

So pana saṅkhāro||
kiṁ nidāno||
kiṁ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so saṅkhāro.|| ||

Iti kho bhikkhave,||
so pi kho saṅkhāro anicco saṅkhato paṭicca-samuppanno,||
sā pi taṇhā aniccā saṅkhatā paṭicca-samuppannā,||
sā pi vedanā aniccā saṅkhatā paṭicca-samuppannā||
so pi phasso anicco saṅkhato paṭicca-samuppanno||
sā pi avijjā aniccā saṅkhatā paṭicca-samuppannā.|| ||

Evam pi kho bhikkhave, jānato||
evaṁ passato anantarā āsavānaṁ khayo hotī" ti.|| ||