Saṁyutta Nikāya
3. Khandha Vagga
22. Khandha Saṁyutta
13. Avijjā Vagga

Sutta 135

Tatiya Koṭṭhita Suttaṁ

 

---

[176]

[1][pts] Evaṁ me sutaṁ:|| ||

Ekaṁ samayaṁ āyasmā Sāriputto||
āysamā ca Mahā-Koṭṭhito,||
Bārāṇasiyaṁ viharanti||
Isipatane Migadāye.|| ||

Atha kho āyasmā Mahā-Kotthito sāyaṇha-samayaṁ paṭisallāṇā vuṭṭhito yen'āyasmā Sāriputto ten'upasaṅkami.|| ||

Upasaṅkamitvā āyasmatā Sāriputtena saddhiṁ sammodi.|| ||

Sammodanīyaṁ kathaṁ sāraṇīyaṁ vīti-sāretvā eka-m-antaṁ nisīdi.|| ||

Eka-m-antaṁ nisinno kho āyasmā Mahā-Kotthito||
āyasmantaṁ Sāriputtaṁ etad avoca:|| ||

"Avijjā, avijjā" ti āvuso Sāriputta, vuccati.|| ||

Katamā nu kho āvuso, avijjā?|| ||

Kittāvatā ca avijjā-gato hoti" ti?|| ||

■

"Idh'āvuso a-s-sutavā puthujjano|| ||

Rūpaṁ na pajānāti||
rūpa-samudayaṁ na pajānāti||
rūpa-nirodhaṁ na pajānāti||
rūpa-nirodha-gāminiṁ paṭipadaṁ na pajānāti.|| ||

Vedanaṁ na pajānāti||
vedanā-samudayaṁ na pajānāti||
vedanā-nirodhaṁ na pajānāti||
vedanā-nirodha-gāminiṁ paṭipadaṁ na pajānāti.|| ||

Saññaṁ na pajānāti||
saññā-samudayam na pajānāti||
saññā-nirodham na pajānāti||
saññā-nirodha-gāminiṁ paṭipadaṁ na pajānāti.|| ||

Saṅkhāre na pajānāti||
saṅkhāra-samudayam na pajānāti||
saṅkhāra-nirodham na pajānāti||
saṅkhāra-nirodha-gāminiṁ paṭipadaṁ na pajānāti.|| ||

Viññāṇaṁ na pajānāti||
viññāṇa-samudayam na pajānāti||
viññāṇa-nirodham na pajānāti||
viññāṇa-nirodha-gāminiṁ paṭipadaṁ na pajānāti.|| ||

Ayaṁ vuccati āvuso, avijjā.|| ||

Ettāvatā ca avijjā-gato hotī" ti.|| ||

 

§

 

Evaṁ vutte āyasmā Sāriputto āyasmantam Mahā-Koṭṭhitam etad avoca:

"Vijjā, vijjā" ti āvuso Sāriputta, vuccati.|| ||

Katamā nu kho āvuso, vijjā?|| ||

Kittāvatā ca vijjā-gato hoti" ti?|| ||

■

"Idh'āvuso sutavā ariya-sāvako|| ||

Rūpaṁ pajānāti||
rūpa-samudayaṁ pajānāti||
rūpa-nirodhaṁ pajānāti||
rūpa-nirodha-gāminiṁ paṭipadaṁ pajānāti.|| ||

Vedanaṁ pajānāti||
vedanā-samudayaṁ pajānāti||
vedanā-nirodhaṁ pajānāti||
vedanā-nirodha-gāminiṁ paṭipadaṁ pajānāti.|| ||

Saññaṁ pajānāti||
saññā-samudayam pajānāti||
saññā-nirodham pajānāti||
saññā-nirodha-gāminiṁ paṭipadaṁ pajānāti.|| ||

Saṅkhāre pajānāti||
saṅkhāra-samudayam pajānāti||
saṅkhāra-nirodham pajānāti||
saṅkhāra-nirodha-gāminiṁ paṭipadaṁ pajānāti.|| ||

Viññāṇaṁ pajānāti||
viññāṇa-samudayam pajānāti||
viññāṇa-nirodham pajānāti||
viññāṇa-nirodha-gāminiṁ paṭipadaṁ pajānāti.|| ||

Ayaṁ vuccati āvuso, vijjā.|| ||

Ettāvatā ca vijjā-gato hotī" ti.|| ||