Saṁyutta Nikāya
3. Khandha Vagga
28. Sāriputta Saṁyutta

Sutta 10

Sūci-Mukhī Suttaṁ

 

---

[238]

[1][pts] Evaṁ me sutaṁ:|| ||

Ekaṁ samayaṁ āyasmā Sāriputto Rājagahe viharati vephavane kālandakanivāpe.|| ||

Atha kho āyasmā Sāriputto pubbaṇha-samayaṁ nivāsetvā patta-cīvaram ādāya Rājagahaṁ piṇḍāya pāvisi.|| ||

Rājagahe sapadānaṁ piṇḍāya caritvā taṁ piṇḍa-pātaṁ aññataraṁ kuḍḍamulaṁ nissāya bhuñjati.|| ||

Atha kho Sūci-mukhi paribbājikā yen'āyasmā Sāriputto ten'upasaṅkami.|| ||

Upasaṅkamitvā āyasmantaṁ Sāriputtaṁ etad avoca:|| ||

"Kiṁ nu kho samaṇa,||
adho-mukho bhuñajasī" ti?|| ||

"Na khv'āhaṁ bhagini,||
adho-mukho bhuñjāmī" ti.|| ||

"Tena hi samaṇa,||
uddhaṁ-mukho bhuñjasī" ti?|| ||

"Na khv'āhaṁ bhagini,||
uddhaṁ-mukho bhuñjāmi" ti.|| ||

[239] "Tena hi samaṇa,||
disā-mukho bhuñjasi" ti?|| ||

"Na khv'āhaṁ bhagini,||
disā-mukho bhuñjāmi" ti.|| ||

"Tena hi samaṇa,||
vidisā-mukho bhuñjasi" ti?|| ||

"Na khv'āhaṁ bhagini,||
vidisā-mukho bhuñjāmi" ti.|| ||

"Kiṁ nu samaṇa,||
'adho-mukho bhuñjasi' ti||
iti puṭṭho samāno||
'na khv'āhaṁ bhagini,||
adho-mukho bhuñjāmī' ti vadesi.|| ||

'Tena hi samaṇa,||
'uddhaṁ mukho bhuñjasi' ti||
iti puṭṭho samāno||
'na khv'āhaṁ bhagini,||
uddhaṁ-mukho bhuñjāmi' ti vadesi.|| ||

'Tena hi samaṇa,||
'disā-mukho bhuñjasi' ti||
iti puṭṭho samāno||
'na khv'āhaṁ bhagini,||
disā-mukho bhuñjāmī' ti vadesi.|| ||

'Tena hi samaṇa,||
vidisā-mukho bhuñjasi' ti||
iti puṭṭho samāno||
'na khv'āhaṁ bhagini,||
vidisā-mukho bhuñjami' ti vadesi.|| ||

Kathañ carahi samaṇa, bhuñjasī" ti?|| ||

"Ye hi keci bhagini,||
samaṇa-brāhmaṇā vatthu-vijjā-tiracchāna-vijjāya micchā ājīvena jīvikaṁ kappenti,||
ime vuccanti bhagini,||
samaṇa-brāhmaṇā 'adho-mukhā bhuñjantī' ti.|| ||

Ye hi keci bhagini,||
samaṇa-brāhmaṇā nakkhatta-vijjā-tiracchāna-vijjāya micchā ājīvena jīvikaṁ kappenti,||
ime vuccanti bhagini,||
samaṇa-brāhmaṇā 'uddhaṁ-mukhā bhuñjantī' ti.|| ||

Ye hi keci bhagini,||
samaṇa-brāhmaṇā dūteyya-pahīṇa-gaman-ā-nuyogā micchā ājīvena jīvikaṁ kappenti,||
ime vuccanti bhagini,||
samaṇa-brāhmaṇā 'disā-mukhā bhuñjantī' ti.|| ||

Ye hi keci bhagini,||
samaṇa-brāhmaṇā aṅga-vijjā-tiracchāna-vijjāya micchā ājīvena jīvikaṁ kappenti,||
ime vuccanti bhagini,||
samaṇa-brāhmaṇā 'vidisā-mukhā bhuñjantī' ti.|| ||

So khv'āhaṁ bhagini,||
na vatthu-vijjā-tiracchāna-vijjāya micchā ājīvena jīvikaṁ kappemi;||
na nakkattavijjā-tiracchāna-vijjāya micchā ājīvena jīvikaṁ kappemi;||
na dūteyya-pahīṇa-gaman-ā-nuyogā micchā ājīvena jīvikaṁ kappemi;||
na aṅga-vijjā-tiracchāna-vijjāya micchā ājīvena jīvikaṁ kappemi.|| ||

Dhammena bhikkhaṁ pariyesāmi,||
dhammena bhikkhaṁ pariyesitvā bhuñjāmi" ti.|| ||

[240] Atha kho Sūci-mukhi paribbājikā Rājagahe rathiyāya rathiyaṁ siṅghāṭakena sīṅghāṭakaṁ upasaṅkamitvā evam ārocesi:|| ||

"Dhammikaṁ samaṇā Sakya-puttiyā āhāraṁ āhārenti,||
anavajjaṁ samaṇā Sakya-puttiyā āhāraṁ āhārenti,||
detha samaṇānaṁ Sakya-puttiyānaṁ piṇḍan" ti.|| ||

Sāriputta Vagga Paṭhama