Saṁyutta Nikāya
3. Khandha Vagga
29. Nāga Saṁyutta

Sutta 4

Dutiya Uposatha Suttaṁ

 

---

[242]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññataro bhikkhu yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho so bhikkhu Bhagavantaṁ etad avoca:|| ||

"Ko nu kho bhante, hetu,||
ko paccayo||
yena-m-idh'ekacce jalābu-jā nāgā uposathaṁ upavasanti,||
ossaṭṭha-kāyā ca bhavantī" ti?|| ||

"Idha bhikkhu eka-c-cānaṁ jalābu-jaṁ nāgānaṁ evaṁ hoti:|| ||

'Mayaṁ kho pubbe kāyena dvaya-kārino ahumbha||
vācāya dvaya-kārino||
manasā dvaya-kārino,||
te mayaṁ kāyena dvaya-kārino||
vācāya dvaya-kārino||
manasā dvaya-kārino||
kāyassa bhedā param maraṇā jalābu-jaṁ nāgānaṁ saha-vyataṁ upapannā.|| ||

Sacajja mayaṁ kāyena su-caritaṁ careyyāma||
vācāya su-caritaṁ careyyāma||
manasā su-caritaṁ careyyāma||
evaṁ mayaṁ kāyassa bhedā param maraṇā sugatiṁ saggaṁ lokaṁ upapajjeyyāma.

Handa mayaṁ etarahi kāyena su-caritaṁ carāma||
vācāya su-caritaṁ carāma||
manasā su-caritaṁ carāmā' ti.|| ||

Ayaṁ kho bhikkhu hetu||
ayaṁ paccayo||
yena-m-idh'ekacce jalābu-jā nāgā uposathaṁ upavasanti ossaṭṭha-kāyā ca bhavantī" ti.|| ||