Saṃyutta Nikāya
3. Khandha Vagga
29. Nāga Saṃyutta
Sutta 6
Catuttha Uposatha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññataro bhikkhu yena Bhagavā ten'upasaṅkami.|| ||
Upasaṃkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho so bhikkhu Bhagavantaṃ etad avoca:|| ||
"Ko nu kho bhante, hetu,||
ko paccayo||
yena-m-idh'ekacce opapātikā nāgā uposathaṃ upavasanti,||
ossaṭṭha-kāyā ca bhavantī" ti?|| ||
"Idha bhikkhu eka-c-cānaṃ opapātikaṃ nāgānaṃ evaṃ hoti:|| ||
'Mayaṃ kho pubbe kāyena dvaya-kārino ahumbha||
vācāya dvaya-kārino||
manasā dvaya-kārino,||
te mayaṃ kāyena dvaya-kārino||
vācāya dvaya-kārino||
manasā dvaya-kārino||
kāyassa bhedā param maraṇā opapātikaṃ nāgānaṃ saha-vyataṃ upapannā.|| ||
[243] Sacajja mayaṃ kāyena su-caritaṃ careyyāma||
vācāya su-caritaṃ careyyāma||
manasā su-caritaṃ careyyāma||
evaṃ mayaṃ kāyassa bhedā param maraṇā sugatiṃ saggaṃ lokaṃ upapajjeyyāma.
Handa mayaṃ etarahi kāyena su-caritaṃ carāma||
vācāya su-caritaṃ carāma||
manasā su-caritaṃ carāmā' ti.|| ||
Ayaṃ kho bhikkhu hetu ayaṃ paccayo yena-m-idh'ekacce opapātikā nāgā uposathaṃ upavasanti ossaṭṭha-kāyā ca bhavantī" ti.|| ||
