Saṁyutta Nikāya
4. Saḷāyatana Vagga
35. Saḷāyatana Saṁyutta
§ I: Mūla-Paññāsa
2. Yamaka Vagga

Sutta 14

Dutiya Sambodha Suttaṁ

 

---

[8]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

3. Bhagavā etad avoca:|| ||

"Pubbe me bhikkhave sambodhā anabhi-sambuddhassa bodhisattass eva sato etad ahosi:|| ||

'Ko nu kho rūpānaṁ assādo,||
ko ādīnavo,||
kiṁ nissaraṇaṁ?|| ||

Ko saddānaṁ assādo,||
ko ādīnavo,||
kiṁ nissaraṇaṁ?|| ||

Ko gandhānaṁ assādo,||
ko ādīnavo,||
kiṁ nissaraṇaṁ?|| ||

Ko rasānaṁ assādo,||
ko ādīnavo,||
kiṁ nissaraṇaṁ?|| ||

Ko poṭṭhabbānaṁ assādo,||
ko ādīnavo,||
kiṁ nissaraṇaṁ?|| ||

Ko dhammānaṁ assādo,||
ko ādīnavo,||
kiṁ nissaraṇaṁ?'|| ||

 

§

 

Tassa mayhaṁ bhikkhave etad ahosi:|| ||

'Yaṁ kho rūpe paṭicca uppajjati sukhaṁ somanassaṁ||
ayaṁ rūpānaṁ assādo,||
yaṁ rūpā aniccaṁ dukkhaṁ vipariṇāma-dhammaṁ||
ayaṁ rūpānaṁ ādīnavo,||
yo rūpesu chanda-rāga-vinayo chanda-rāga-p-pahānaṁ||
idaṁ rūpānaṁ nissaraṇaṁ.|| ||

Yaṁ kho sadde paṭicca uppajjati sukhaṁ somanassaṁ||
ayaṁ saddānaṁ assādo,||
yaṁ saddā aniccaṁ dukkhaṁ vipariṇāma-dhammaṁ||
ayaṁ saddānaṁ ādīnavo,||
yo saddesu chanda-rāga-vinayo chanda-rāga-p-pahānaṁ||
idaṁ saddānaṁ nissaraṇaṁ.|| ||

Yaṁ kho gandhe paṭicca uppajjati sukhaṁ somanassaṁ||
ayaṁ gandhānaṁ assādo,||
yaṁ gandhā aniccaṁ dukkhaṁ vipariṇāma-dhammaṁ||
ayaṁ gandhānaṁ ādīnavo,||
yo gandhesu chanda-rāga-vinayo chanda-rāga-p-pahānaṁ||
idaṁ gandhānaṁ nissaraṇaṁ.|| ||

Yaṁ kho rase paṭicca uppajjati sukhaṁ somanassaṁ||
ayaṁ rasānaṁ assādo,||
yā rasā aniccā dukkhā vipariṇāma-dhammā||
ayaṁ rasānaṁ ādīnavo,||
yo rasesu chanda-rāga-vinayo chanda-rāga-p-pahānaṁ||
idaṁ rasānaṁ nissaraṇaṁ.|| ||

Yaṁ kho poṭṭhabbe paṭicca uppajjati sukhaṁ somanassaṁ||
ayaṁ poṭṭhabbānaṁ assādo,||
yo poṭṭhabbā anicco dukkho vipariṇāmadhammo||
ayaṁ poṭṭhabbānaṁ ādīnavo,||
yo poṭṭhabbesu chanda-rāga-vinayo chanda-rāga-p-pahānaṁ||
idaṁ poṭṭhabbānaṁ nissaraṇaṁ.|| ||

Yaṁ kho dhamme paṭicca uppajjati sukhaṁ somanassaṁ||
ayaṁ dhammānaṁ assādo,||
yo dhammā anicco dukkho vipariṇāmadhammo||
ayaṁ dhammānaṁ ādīnavo,||
yo dhammesu chanda-rāga-vinayo chanda-rāga-p-pahānaṁ||
idaṁ dhammānaṁ nissaraṇaṁ" ti.|| ||

 

§

 

Yāva kīvañc'āhaṁ bhikkhave imesaṁ channaṁ bāhirānam āyatanānaṁ||
evaṁ assādaṁ ca||
assādato ādīnavaṁ ca||
ādīnavato nissaraṇaṁ ca||
nissaraṇato yathā-bhūtaṁ nābbhaññāsiṁ,||
n'eva tāvāhaṁ bhikkhave sa-devake loke||
sa-Mārake||
sa-brahmake||
sa-s-samaṇa-brāhmaṇiyā pajāya||
sa-deva manussāya||
anuttaraṁ sammā-sambodhiṁ abhisambuddhoti paccaññāsiṁ. || ||

Yato ca kho haṁ bhikkhave imesaṁ channaṁ bāhirānam āyatanānaṁ||
evaṁ assādaṁ ca||
assādato ādīnavaṁ ca||
ādīnavato nissaraṇaṁ ca||
nissaraṇato yathā-bhūtaṁ abbhaññāsiṁ,
ath'āhaṁ bhikkhave sa-devake loke||
sa-Mārake||
sa-brahmake||
sa-s-samaṇa-brāhmaṇiyā pajāya||
sa-deva manussāya||
anuttaraṁ sammā-sambodhiṁ abhisambuddhoti paccaññāsiṁ.|| ||

Ñāṇaṁ ca pana me dassanaṁ udapādi.|| ||

'Akuppā me ceto-vimutti||
ayam antimā jāti,||
n'atthi-dāni puna-b-bhavo' ti " ti.|| ||