Saṃyutta Nikāya
4. Saḷāyatana Vagga
35. Saḷāyatana Saṃyutta
§ II: Paññāsaka Dutiya
1. Avijjā Vagga
Sutta 61
Paṭhama Sabb'Ūpādāna-Pariyādinna Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
2. Tatra kho Bhagavā bhikkhū āmantesi|| ||
"Bhikkhavo" ti.|| ||
"Bhadante" ti||
te bhikkhū Bhagavato paccassosuṃ.|| ||
3. Bhagavā etad avoca:|| ||
"Sabb'ūpādāna-pariyādinna vo bhikkhave dhammaṃ desissāmi.|| ||
Taṃ suṇātha.|| ||
Katamo ca bhikkhave sabb'ūpādāna-pariyādinna dhammo?|| ||
Cakkhuñ ca paṭicca rūpe ca uppajjati,||
cakkhu-viññāṇaṃ||
tiṇṇaṃ saṅgati phasso,||
phassa-paccayā vedanā.|| ||
Evaṃ passaṃ bhikkhave sutavā ariya-sāvako||
cakkhusmim pi nibbindati,||
rūpesu pi nibbindati,||
cakkhu-viññāṇe pi nibbindati,||
cakkhu-samphasse pi nibbindati,||
vedanāya pi nibbindati.|| ||
Nibbindaṃ virajjati,||
virāgā vimuccati||
vimokkhā, 'Pariññātaṃ me upādānan,' ti pajānāti.|| ||
■
Sotañ ca paṭicca sadde ca uppajjati,||
sota-viññāṇaṃ||
tiṇṇaṃ saṅgati phasso,||
phassa-paccayā vedanā.|| ||
Evaṃ passaṃ bhikkhave sutavā ariya-sāvako||
sotasmim pi nibbindati,||
saddesu pi nibbindati,||
sota viññāṇe pi nibbindati,||
sota-samphasse pi nibbindati,||
vedanāya pi nibbindati.|| ||
Nibbindaṃ virajjati,||
virāgā vimuccati||
vimokkhā, 'Pariññātaṃ me upādānan,' ti pajānāti.|| ||
■
Ghānañ ca paṭicca gandhe ca uppajjati,||
ghāna-viññāṇaṃ||
tiṇṇaṃ saṅgati phasso,||
phassa-paccayā vedanā.|| ||
Evaṃ passaṃ bhikkhave sutavā ariya-sāvako||
ghānasmim pi nibbindati,||
gandhesu pi nibbindati,||
ghāna-viññāṇe pi nibbindati,||
ghāna-samphasse pi nibbindati,||
vedanāya pi nibbindati.|| ||
Nibbindaṃ virajjati,||
virāgā vimuccati||
vimokkhā, 'Pariññātaṃ me upādānan,' ti pajānāti.|| ||
■
Jivhañ ca paṭicca rase ca uppajjati,||
jivhā-viññāṇaṃ||
tiṇṇaṃ saṅgati phasso,||
phassa-paccayā vedanā.|| ||
Evaṃ passaṃ bhikkhave sutavā ariya-sāvako||
jivhāya pi nibbindati,||
rasesu pi nibbindati,||
jivhā-viññāṇe pi nibbindati,||
jivhā-samphasse pi nibbindati,||
vedanāya pi nibbindati.|| ||
Nibbindaṃ virajjati,||
virāgā vimuccati||
vimokkhā, 'Pariññātaṃ me upādānan,' ti pajānāti.|| ||
■
Kāyañ ca paṭicca phoṭṭhabbe ca uppajjati,||
kāya-viññāṇaṃ||
tiṇṇaṃ saṅgati phasso,||
phassa-paccayā vedanā.|| ||
Evaṃ passaṃ bhikkhave sutavā ariya-sāvako||
kāye pi nibbindati,||
phoṭṭhabbesu pi nibbindati,||
kāya-viññāṇe pi nibbindati,||
kāya-samphasse pi nibbindati,||
vedanāya pi nibbindati.|| ||
Nibbindaṃ virajjati,||
virāgā vimuccati||
vimokkhā, 'Pariññātaṃ me upādānan,' ti pajānāti.|| ||
■
Manañ ca paṭicca dhamme ca uppajjati,||
mano-viññāṇaṃ||
tiṇṇaṃ saṅgati phasso,||
phassa-paccayā vedanā.|| ||
Evaṃ passaṃ bhikkhave sutavā ariya-sāvako||
manasmim pi nibbindati,||
dhammesu pi nibbindati,||
mano-viññāṇe pi [34] nibbindati,||
Mano-samphasse pi nibbindati,||
vedanāya pi nibbindati.|| ||
Nibbindaṃ virajjati,||
virāgā vimuccati||
vimokkhā, 'Pariññātaṃ me upādānan,' ti pajānāti.|| ||
■|| ||
Ayaṃ kho bhikkhave sabb'ūpādāna-pariyādinna dhammo" ti.|| ||
