Saṁyutta Nikāya
4. Saḷāyatana Vagga
35. Saḷāyatana Saṁyutta
§ II: Paññāsaka Dutiya
3. Gilāna Vagga

Sutta 75

Dutiya Gilāna Suttaṁ

 

---

[47]

[1][pts][than][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññataro bhikkhu yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho so bhikkhu Bhagavantaṁ etad avoca:|| ||

Amukasmiṁ bhante, vihāre aññataro bhikkhu||
navo appaññāto ābādhiko dukkhito bāḷha-gilāno,||
sādhu bhante, Bhagavā yena so bhikkhu ten'upasaṅkamatu anukampaṁ upādāyāti.|| ||

Atha kho Bhagavā nava-vādañ ca sutvā gilāna-vādañ ca appaññāto bhikkhūti iti viditvā yena so bhikkhu ten'upasaṅkami.|| ||

Addasā kho so bhikkhu Bhagavantaṁ durato va āga-c-chantaṁ,||
disvāna mañcake samadhosi.|| ||

Atha kho Bhagavā taṁ bhikkhuṁ etad avoca:|| ||

"Alaṁ bhikkhu mā tvaṁ mañcake samadhosi.|| ||

Santimāni āsanāni paññattāni.|| ||

Tatth-ā-haṁ nisīdissāmi" ti.|| ||

Nisīdi Bhagavā paññatte āsane.|| ||

Nisajja kho Bhagavā taṁ bhikkhuṁ etad avoca:|| ||

"Kacci te bhikkhu khamanīyaṁ,||
kacci yāpanīyaṁ,||
kacci dukkhā vedanā paṭi-k-kamanti||
no abhi-k-kamanti,||
paṭikkamosānaṁ paññāyati||
no abhi-k-kamo" ti?|| ||

"Na me bhante khamanīyaṁ,||
na yāpanīyaṁ,||
bāḷhā me dukkhā vedanā abhi-k-kamanti||
no paṭi-k-kamanti,||
abhi-k-kam'osānaṁ paññāyati||
no paṭikkamo" ti.|| ||

"Kacci te bhikkhu na kiñci kukkuccaṁ,||
na koci vippaṭisāro" ti?|| ||

"Taggha me bhante,||
anappakaṁ kukkuccaṁ anappako vippaṭisāro" ti.|| ||

"Kacci pana tvaṁ bhikkhu attā sīlato||
na upavadatī" ti?|| ||

"Na kho me bhante attā sīlato upavadatī" ti.|| ||

[48] "No ce kira tvaṁ bhikkhu attā sīlato upavadati,||
atha kismiñ ca te kukkuccaṁ?|| ||

Ko ca vippaṭisāro" ti?|| ||

"Na khohaṁ bhante,||
sīla-visuddhatthaṁ||
Bhagavatā Dhammaṁ desītaṁ ājānāmī" ti.|| ||

"No ce kira tvaṁ bhikkhu sīla-visuddhatthaṁ||
mayā Dhammaṁ desitaṁ ājānāsi.|| ||

Atha kim atthaṁ carahi tvaṁ bhikkhu||
mayā Dhammaṁ desitaṁ ājānāsī" ti?|| ||

"Anupādā pari-Nibbānatthaṁ khv'āhaṁ bhante||
Bhagavatā Dhammaṁ desitaṁ ājānāmī" ti.|| ||

"Sādhu sādhu bhikkhu,||
sādhu kho pana tvaṁ bhikkhu anupādā pari-Nibbānatthāya||
mayā Dhammaṁ desitaṁ ājānāsi,||
anupādā pari-Nibbānattho hi bhikkhu||
mayā Dhammo desito.|| ||

Taṁ kim maññasi tvaṁ bhikkhu:

Cakkhuṁ niccaṁ vā aniccaṁ vā" ti?|| ||

"Aniccaṁ bhante".|| ||

"Yaṁ panāniccaṁ dukkhaṁ vā taṁ sukhaṁ vā" ti?|| ||

"Dukkhaṁ bhante."|| ||

"Yaṁ panāniccaṁ dukkhaṁ vipariṇāma-dhammaṁ kallannu taṁ samanupassituṁ||
'Etaṁ mama||
eso ham asmi||
eso me attā' ti" ti?|| ||

"No h'etaṁ bhante."|| ||

■

"Sotaṁ niccaṁ vā aniccaṁ vā" ti?|| ||

"Aniccaṁ bhante."|| ||

"Yaṁ panāniccaṁ dukkhaṁ vā taṁ sukhaṁ vā" ti?|| ||

"Dukkhaṁ bhante."|| ||

"Yaṁ panāniccaṁ dukkhaṁ vipariṇāma-dhammaṁ kallannu taṁ samanupassituṁ||
'Etaṁ mama||
eso ham asmi||
eso me attā' ti" ti?|| ||

"No h'etaṁ bhante."|| ||

■

"Ghānaṁ niccaṁ vā aniccaṁ vā" ti?|| ||

Aniccaṁ bhante.|| ||

Yaṁ panāniccaṁ dukkhaṁ vā taṁ sukhaṁ vāti?|| ||

"Dukkhaṁ bhante."|| ||

"Yaṁ panāniccaṁ dukkhaṁ vipariṇāma-dhammaṁ kallannu taṁ samanupassituṁ||
'Etaṁ mama||
eso ham asmi||
eso me attā' ti" ti?|| ||

"No h'etaṁ bhante."|| ||

■

"Jivhā "niccā vā aniccā vā" ti?|| ||

"Aniccā bhante."|| ||

Yaṁ panāniccaṁ dukkhaṁ vā taṁ sukhaṁ vā" ti?|| ||

"Dukkhaṁ bhante."|| ||

"Yaṁ panāniccaṁ dukkhaṁ vipariṇāma-dhammaṁ kallannu taṁ samanupassituṁ||
'Etaṁ mama||
eso ham asmi||
eso me attā' ti" ti?|| ||

"No h'etaṁ bhante."|| ||

■

Kāyo nicco vā anicco vā" ti?|| ||

"Anicco bhante."|| ||

"Yaṁ panāniccaṁ dukkhaṁ vā taṁ sukhaṁ vā" ti?|| ||

"Dukkhaṁ bhante."|| ||

"Yaṁ panāniccaṁ dukkhaṁ vipariṇāma-dhammaṁ kallannu taṁ samanupassituṁ||
'Etaṁ mama||
eso ham asmi||
eso me attā' ti" ti?|| ||

"No h'etaṁ bhante."|| ||

■

"Mano nicco vā anicco vā" ti?|| ||

"Anicco bhante."|| ||

"Yaṁ panāniccaṁ dukkhaṁ vā taṁ sukhaṁ vā" ti?|| ||

"Dukkhaṁ bhante."|| ||

"Yaṁ panāniccaṁ dukkhaṁ vipariṇāma-dhammaṁ kallannu taṁ samanupassituṁ||
'Etaṁ mama||
eso ham asmi||
eso me attā' ti" ti?|| ||

"No h'etaṁ bhante."|| ||

 

§

 

Evam passaṁ bhikkhave sutavā ariya-sāvako cakkhusmim pi nibbindati,||
rūpesu pi nibbindati,||
cakkhu-viññāṇe pi nibbindati,||
cakkhu-samphasse pi nibbindati.|| ||

Yam pidaṁ cakkhu-samphassa-paccayā uppajjati vedayitaṁ sukhaṁ vā dukkhaṁ vā adukkha-m-asukhaṁ vā tasmim pi nibbindati.|| ||

■

Evam passaṁ bhikkhave sutavā ariya-sāvako sotasmim pi nibbindati,||
saddā pi nibbindati,||
sota-viññāṇe pi nibbindati,||
sota-samphasse pi nibbindati.|| ||

Yam pidaṁ sota-samphassa-paccayā uppajjati vedayitaṁ sukhaṁ vā dukkhaṁ vā adukkha-m-asukhaṁ vā tasmim pi nibbindati.|| ||

■

Evam passaṁ bhikkhave sutavā ariya-sāvako ghānasmim pi nibbindati,||
gandhā pi nibbindati,||
ghāna-viññāṇe pi nibbindati,||
ghāna-samphasse pi nibbindati.|| ||

Yam pidaṁ ghāna-samphassa-paccayā uppajjati vedayitaṁ sukhaṁ vā dukkhaṁ vā adukkha-m-asukhaṁ vā tasmim pi nibbindati.|| ||

■

Evam passaṁ bhikkhave sutavā ariya-sāvako jivhāya pi nibbindati,||
rasesu pi nibbindati,||
jivhā-viññāṇe pi nibbindati,||
jivhā-samphasse pi nibbindati.|| ||

Yam pidaṁ jivhā-samphassa-paccayā uppajjati vedayitaṁ sukhaṁ vā dukkhaṁ vā adukkha-m-asukhaṁ vā tasmim pi nibbindati.|| ||

■

Evam passaṁ bhikkhave sutavā ariya-sāvako kāyasmim| pi nibbindati,|
phoṭṭhabbā pi nibbindati,||
kāya-viññāṇe pi nibbindati,||
kāya-samphasse pi nibbindati.|| ||

Yam pidaṁ kāya-samphassa-paccayā uppajjati vedayitaṁ sukhaṁ vā dukkhaṁ vā adukkha-m-asukhaṁ vā tasmim pi nibbindati.|| ||

■

Evam passaṁ bhikkhave sutavā ariya-sāvako manasmim pi nibbindati,||
dhammesu pi nibbindati||
mano-viññāṇe pi nibbindati,||
mano-samphasse pi nibbindati.|| ||

Yam pidaṁ mano-samphassa-paccayā uppajjati vedayitaṁ sukhaṁ vā dukkhaṁ vā adukkha-m-asukhaṁ vā tasmim pi nibbindati.|| ||

 

§

 

Nibbindaṁ virajjati virāgā vimuccati,||
vimuttasmiṁ vimuttamiti ñāṇaṁ hoti:|| ||

'Khīṇā jāti,||
vusitaṁ Brahma-cariyaṁ,||
kataṁ karaṇīyaṁ||
nāparaṁ itthattāyā' ti pajānātī" ti.|| ||

Idam avoca Bhagavā.|| ||

Attamano so bhikkhu Bhagavato bhāsitaṁ abhinandi.|| ||

Imasmiñ ca pana veyyā-kara-ṇasmiṁ bhaññamāne tassa bhikkhussa anupādāya āsavehi cittaṁ vimuccīti.|| ||