Saṁyutta Nikāya
4. Saḷāyatana Vagga
35. Saḷāyatana Saṁyutta
§ II: Paññāsaka Dutiya
3. Gilāna Vagga

Sutta 82

Loka Suttaṁ

 

---

[52]

[1][pts][than][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññataro bhikkhu yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho so bhikkhu Bhagavantaṁ etad avoca:|| ||

"'Loko! Loko!' ti bhante vuccati,||
kittāvatā nu kho bhante,||
'loko' ti vuccatī" ti?|| ||

"'Lujjatī' ti kho bhikkhu||
tasmā 'loko' ti vuccati.|| ||

Kiñ ca lujjati?|| ||

Cakkhuṁ kho bhikkhu lujjati,||
rūpā lujjanti,||
cakkhu-viññāṇaṁ lujjati,||
cakkhu-samphasso lujjati,||
yampidaṁ cakkhu-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi lujjati.|| ||

■

Sotaṁ kho bhikkhu lujjati,||
saddā lujjanti,||
sota-viññāṇaṁ lujjati,||
sota-samphasso lujjati,||
yampidaṁ sota-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi lujjati.|| ||

■

Ghānaṁ kho bhikkhu lujjati,||
gandhā lujjanti,||
ghāna-viññāṇaṁ lujjati,||
ghāna-samphasso lujjati,||
yampidaṁ ghāna-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi lujjati.|| ||

■

Jivhā kho bhikkhu lujjati,||
rasā lujjanti,||
jivhā-viññāṇaṁ lujjati,||
jivhā-samphasso lujjati,||
yampidaṁ jivhā-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi lujjati.|| ||

■

Kāyaṁ kho bhikkhu lujjati,||
phoṭṭhabbā lujjanti,||
kāya-viññāṇaṁ lujjati,||
kāya-samphasso lujjati,||
yampidaṁ kāya-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi lujjati.|| ||

■

Mano kho bhikkhu lujjati,||
dhammā lujjanti,||
mano-viññāṇaṁ lujjati,||
mano-samphasso lujjati,||
yampidaṁ mano-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi lujjati.|| ||

Kho bhikkhu tasmā||
'loko' ti vuccatī" ti.|| ||