Saṁyutta Nikāya
4. Saḷāyatana Vagga
35. Saḷāyatana Saṁyutta
§ II: Paññāsaka Dutiya
3. Gilāna Vagga

Sutta 83

Phagguna Suttaṁ

 

---

[52]

[1][pts][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho āyasmā Phagguno yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho āyasmā Phagguno Bhagavantaṁ etad avoca:|| ||

"Atthi nu kho bhante, taṁ cakkhu||
yena cakkhunā atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya?|| ||

Atthi nu kho taṁ bhante, sota yena sotena atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya?|| ||

Atthi nu kho taṁ bhante, ghāna yena ghānena atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya?|| ||

Atthi nu kho sā bhante, jivhā yāya jivhāya atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya?|| ||

Atthi nu kho so bhante, kāyo yena kāyena atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya?|| ||

Atthi nu kho so bhante, mano yena manena atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya?|| ||

N'atthi kho taṁ Phagguna, cakkhu yena cakkhunā atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya" ti?|| ||

 

§

 

"N'atthi kho taṁ Phagguna, sota yena sotena atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya.|| ||

N'atthi kho taṁ Phagguna, ghāna yena ghānena atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya.|| ||

N'atthi kho sā Phagguna, jivhā yāya jivhāya atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya.|| ||

N'atthi kho so Phagguna, kāyo yena kāyena atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyya.|| ||

[53] N'atthi kho so Phagguna, mano yena manena atīte Buddhe parinibbute||
chinnapapañce||
chinnavaṭume||
pariyādinnavaṭṭe||
sabba-dukkha-vītivatte
paññā-paya-māno
paññāpeyyā" ti.|| ||