Saṁyutta Nikāya
4. Saḷāyatana Vagga
35. Saḷāyatana Saṁyutta
§ II: Paññāsaka Dutiya
4. Channa Vagga

Sutta 84

Paloka-Dhamma Suttaṁ

 

---

[53]

[1][pts][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho āyasmā Ānando yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho āyasmā Ānando Bhagavantaṁ etad avoca:|| ||

"'Loko! Loko' ti! bhante vuccati.|| ||

Kittāvatā nu kho bhante 'loko' ti vuccatī" ti?|| ||

"Yaṁ kho Ānanda paloka-dhammaṁ||
ayaṁ vuccati ariyassa vinaye loko.|| ||

Kiñ ca Ānanda paloka-dhammaṁ?|| ||

Cakkhuṁ kho Ānanda paloka-dhammaṁ,||
rūpā paloka-dhammā,||
cakkhu-viññāṇaṁ paloka-dhammaṁ,||
cakkhu-samphasso paloka-dhammo,||
yampidaṁ cakkhu-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi paloka-dhammaṁ.|| ||

■

Sotaṁ kho Ānanda paloka-dhammaṁ,||
saddā paloka-dhammā,||
sota-viññāṇaṁ paloka-dhammaṁ,||
sota-samphasso paloka-dhammo,||
yampidaṁ sota-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi paloka-dhammaṁ.|| ||

■

Ghānaṁ kho Ānanda paloka-dhammaṁ,||
gandhā paloka-dhammā,||
ghāna-viññāṇaṁ paloka-dhammaṁ,||
ghāna-samphasso paloka-dhammo,||
yampidaṁ ghāna-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi paloka-dhammaṁ.|| ||

■

Jivhā kho Ānanda paloka-dhammā,||
rasā paloka-dhammā,||
jivhā-viññāṇaṁ paloka-dhammaṁ,||
jivhā-samphasso paloka-dhammo,||
yampidaṁ jivhā-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi paloka-dhammaṁ.|| ||

■

Kāyaṁ kho Ānanda paloka-dhammo,||
phoṭṭhabbā paloka-dhammā,||
kāya-viññāṇaṁ paloka-dhammaṁ,||
kāya-samphasso paloka-dhammo,||
yampidaṁ kāya-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi paloka-dhammaṁ.|| ||

■

Mano kho Ānanda paloka-dhammo,||
dhammā paloka-dhammā,||
mano-viññāṇaṁ paloka-dhammaṁ,||
mano-samphasso paloka-dhammo,||
yampidaṁ mano-samphassa-paccayā uppajjati vedayitaṁ||
sukhaṁ vā||
dukkhaṁ vā||
adukkha-m-asukhaṁ vā||
tam pi paloka-dhammaṁ.|| ||

Yaṁ kho Ānanda, paloka-dhammāṁ ayaṁ vuccati ariyassa vinaye loko" ti.|| ||