Pamāda-Vihāri Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[78]

[1][pts][than][olds][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

2. Tatra kho Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

3. Bhagavā etad avoca:|| ||

"Pamāda-vihāriñ ca vo bhikkhave desissāmi||
appamāda-vihāriñ ca.|| ||

Taṁ suṇātha.|| ||

Kathañ ca bhikkhave pamāda-vihārī hoti?|| ||

Cakkhun'driyā asaṁvutassa bhikkhave viharato||
cittaṁ vyāsiñcati||
cakkhu-viññeyyesu rūpesu.|| ||

Tassa vyāsitta-cittassa||
pāmujjaṁ na hoti,||
pāmujje asati||
pīti na hoti,||
pītiyā asati||
passaddhi na hoti,||
passaddhiyā asati||
dukkhaṁ viharati,||
dukkhino cittaṁ na samādhiyati,||
asamāhite citte dhammā na pātu-bhavanti,||
dhammānaṁ apātu-bhāvā pamāda-vihārī||
tv'eva saṅkhaṁ gacchati.|| ||

■

Sot'indriyā asaṁvutassa bhikkhave viharato||
cittaṁ vyāsiñcati||
sota-viññeyyesu saddesu.|| ||

■

Ghān'indriyā asaṁvutassa bhikkhave viharato||
cittaṁ vyāsiñcati||
ghāna-viññeyyesu gandhesu.|| ||

■

Jiv-h-indriyā asaṁvutassa bhikkhave viharato||
cittaṁ vyāsiñcati||
jivhā-viññeyyesu rasesu.|| ||

■

Kāy'indriyā asaṁvutassa bhikkhave viharato||
cittaṁ vyāsiñcati||
kāya-viññeyyesu phoṭṭhabbesu.|| ||

■

Man'indriyā asaṁvutassa bhikkhave viharato||
cittaṁ vyāsiñcati||
mano-viññeyyesu dhammesu.|| ||

Evaṁ kho bhikkhave pamāda-vihārī hoti.|| ||

Kathañ ca bhikkhave appamāda-vihārī hoti?|| ||

Cakkhu'ndriya saṁvutassa bhikkhave viharato||
cittaṁ na vyāsiccati||
cakkhu-viññeyyesu rūpesu.|| ||

Tassa avyāsitta-cittassa||
pāmujjaṁ jāyati||
pamuditassa||
pīti jāyati,||
pīti-manassa||
kāyo passambhati,||
passaddha-kāyo||
sukhaṁ vediyati,||
sukhino cittaṁ samādhiyati,||
samāhite citte dhammā pātu-bhavanti,||
dhammānaṁ pātu-bhāvā appamāda-vihāri||
tv'eva saṅkhaṁ gacchati.|| ||

■

Sotindriya saṁvutassa bhikkhave viharato||
cittaṁ na vyāsiccati||
sota-viññeyyesu saddesu.|| ||

■

Ghānīndriya saṁvutassa bhikkhave viharato||
cittaṁ na vyāsiccati||
ghāna-viññeyyesu gandhesu.|| ||

■

Jivh'indriya saṁvutassa bhikkhave viharato||
cittaṁ na vyāsiccati||
jivhā-viññeyyesu rasesu.|| ||

■

Kāy'indriya saṁvutassa bhikkhave viharato||
cittaṁ na vyāsiccati||
kāya-viññeyyesu phoṭṭhabbesu.|| ||

■

Man'indriya saṁvutassa bhikkhave viharato||
cittaṁ na vyāsiccati||
mano-viññeyyesu dhammesu.|| ||

Evaṁ kho bhikkhave appamāda-vihārī hotī" ti.|| ||

Saṁyutta Nikāya 4. Saḷāyatana Vagga 35. Saḷāyatana Saṁyutta § II: Paññāsaka Dutiya 5. Saḷa Vagga

Sutta 97

Pamāda-Vihāri Suttaṁ

Saṁyutta Nikāya
4. Saḷāyatana Vagga
35. Saḷāyatana Saṁyutta
§ II: Paññāsaka Dutiya
5. Saḷa Vagga