Paṭhama Parijānana Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

3. Bhagavā etad avoca:|| ||

"Cakkhuṁ bhikkhave||
anabhijānaṁ||
aparijānaṁ||
avirājayaṁ||
appajahaṁ||
abhabbo dukkha-k-khayāya.|| ||

Sotaṁ||
anabhijānaṁ||
aparijānaṁ||
avirājayaṁ||
appajahaṁ||
abhabbo dukkha-k-khayāya.|| ||

Ghānaṁ||
anabhijānaṁ||
aparijānaṁ||
avirājayaṁ||
appajahaṁ||
abhabbo dukkha-k-khayāya.|| ||

Jivhaṁ||
anabhijānaṁ||
aparijānaṁ||
avirājayaṁ||
appajahaṁ||
abhabbo dukkha-k-khayāya.|| ||

Kāyaṁ||
anabhijānaṁ||
aparijānaṁ||
avirājayaṁ||
appajahaṁ||
abhabbo dukkha-k-khayāya.|| ||

Manaṁ||
anabhijānaṁ||
aparijānaṁ||
avirājayaṁ||
appajahaṁ||
abhabbo dukkha-k-khayāya.|| ||

Cakkhuñ ca kho bhikkhave||
abhijānaṁ||
parijānaṁ||
virājayaṁ||
pajahaṁ||
bhabbo dukkha-k-khayāya.|| ||

Sotaṁ||
abhijānaṁ||
parijānaṁ||
virājayaṁ||
pajahaṁ||
bhabbo dukkha-k-khayāya.|| ||

Ghānaṁ||
abhijānaṁ||
parijānaṁ||
virājayaṁ||
pajahaṁ||
bhabbo dukkha-k-khayāya.|| ||

Jivhaṁ||
abhijānaṁ||
parijānaṁ||
virājayaṁ||
pajahaṁ||
bhabbo dukkha-k-khayāya.|| ||

Kāyaṁ||
abhijānaṁ||
parijānaṁ||
virājayaṁ||
pajahaṁ||
bhabbo dukkha-k-khayāya.|| ||

Manaṁ||
abhijānaṁ||
parijānaṁ||
virājayaṁ||
pajahaṁ||
bhabbo dukkha-k-khayāya" ti.|| ||