Saṃyutta Nikāya
4. Saḷāyatana Vagga
35. Saḷāyatana Saṃyutta
§ IV: Paññāsaka Catuttha
1. Nandi-k-Khaya Vagga
Sutta 161
Paṭhama Koṭṭhita Suttaṃ (Anicca)
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][olds] Evaṃ me sutaṃ:|| ||
Ekaṃ samayaṃ Bhagavā Rājagahe viharati Jīvakambavane.|| ||
Atha kho āyasmā Mahā Koṭṭhito yena Bhagavā ten'upasaṇkami, upasaṇkamitvā Bhagavantaṃ abhivādetvā eka-m-antaṃ nisīdi.
Eka-m-antaṃ nisinno kho āyasmā Mahā Koṭṭhito Bhagavantaṃ etad avoca:|| ||
"Sādhu me bhante, Bhagavā saṇkhittena dhammaṃ desetu||
yam ahaṃ Bhagavato dhammaṃ sutvā||
eko||
vūpakaṭṭho||
appamatto||
ātāpi||
pahit'atto vihareyyan" ti.|| ||
§
"Yaṃ kho Koṭṭhika aniccaṃ,||
tatra te chando pahātabbo|| ||
Kiñ ca Koṭṭhika aniccaṃ?|| ||
Cakkhuṃ kho Koṭṭhika aniccaṃ, tatra te chando pahātabbo.|| ||
Rūpā aniccā, tatra te chando pahātabbo.|| ||
Cakkhu-viññāṇaṃ aniccaṃ tatra te chando pahātabbo.|| ||
Cakkhu-samphasso anicco, tatra te chando pahātabbo.|| ||
Yam pidaṃ cakkhu-samphassa-paccayā uppajjati vedayitaṃ||
sukhaṃ vā dukkhaṃ vā adukkha-m-asukhaṃ vā||
tam pi aniccaṃ,||
tatra te chando pahātabbo.|| ||
■
Sotaṃ kho Koṭṭhika aniccaṃ, tatra te chando pahātabbo.|| ||
Saddā aniccā, tatra te chando pahātabbo.|| ||
Sota-viññāṇaṃ aniccaṃ tatra te chando pahātabbo.|| ||
Sota-samphasso anicco, tatra te chando pahātabbo.|| ||
Yam p'idaṃ sota-samphassa-paccayā uppajjati vedayitaṃ||
sukhaṃ vā dukkhaṃ vā adukkha-m-asukhaṃ vā||
tam pi aniccaṃ,||
tatra te chando pahātabbo.|| ||
■
Ghānaṃ kho Koṭṭhika aniccaṃ, tatra te chando pahātabbo.|| ||
Gandhā aniccā, tatra te chando pahātabbo.|| ||
Ghāna-viññāṇaṃ aniccaṃ tatra te chando pahātabbo.|| ||
Ghāna-samphasso anicco, tatra te chando pahātabbo.|| ||
Yam p'idaṃ ghāna-samphassa-paccayā uppajjati vedayitaṃ||
sukhaṃ vā dukkhaṃ vā adukkha-m-asukhaṃ vā||
tam pi aniccaṃ,||
tatra te chando pahātabbo.|| ||
■
Jivhā kho Koṭṭhika aniccā, tatra te chando pahātabbo.|| ||
Rasā aniccā, tatra te chando pahātabbo.|| ||
Jivhā-viññāṇaṃ aniccaṃ tatra te chando pahātabbo.|| ||
Jivhāsamphasso anicco, tatra te chando pahātabbo.|| ||
Yam pidaṃ jivhā-samphassa-paccayā uppajjati vedayitaṃ||
sukhaṃ vā dukkhaṃ vā adukkha-m-asukhaṃ vā||
tam pi aniccaṃ,||
tatra te chando pahātabbo.|| ||
■
Kāyo kho Koṭṭhika anicco, tatra te chando pahātabbo.|| ||
Phoṭṭhabbā aniccā, tatra te chando pahātabbo.|| ||
Kāya-viññāṇaṃ aniccaṃ tatra te chando pahātabbo.|| ||
Kāya-samphasso anicco, tatra te chando pahātabbo.|| ||
Yam pidaṃ kāyas-samphassa-paccayā uppajjati vedayitaṃ||
sukhaṃ vā dukkhaṃ vā adukkha-m-asukhaṃ vā||
tam pi aniccaṃ,||
tatra te chando pahātabbo.|| ||
■
Mano kho Koṭṭhika anicco, tatra te chando pahātabbo.|| ||
Dhammā aniccā, tatra te chando pahātabbo.|| ||
Mano-viññāṇaṃ aniccaṃ tatra te chando pahātabbo.|| ||
Mano-samphasso anicco, tatra te chando pahātabbo.|| ||
Yam pidaṃ mano-samphassa-paccayā uppajjati vedayitaṃ||
sukhaṃ vā dukkhaṃ vā adukkha-m-asukhaṃ vā||
tam pi aniccaṃ,||
tatra te chando pahātabbo.|| ||
Yaṃ kho Koṭṭhika, aniccaṃ, tatra te chando pahātabboti" ti.|| ||
