Saṁyutta Nikāya
4. Saḷāyatana Vagga
35. Saḷāyatana Saṁyutta
§ IV: Paññāsaka Catuttha
3. Samudda Vagga

Sutta 187

Paṭhama Samudda Suttaṁ

 

---

[157]

[1][pts][bodh][than] Evaṁ me sutaṁ:|| ||

Ekaṁ samayaṁ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

3. Bhagavā etad avoca:|| ||

"'Samuddo! Samuddo!' ti bhikkhave||
a-s-sutavā puthujjano bhāsati||
n'eso bhikkhave ariyassa vinaye samuddo,||
mahā eso bhikkhave udakarāsi,||
mahā udakaṇṇavo.|| ||

Cakkhu bhikkhave purisassa samuddo,||
tassa rūpamayo vego.|| ||

Yo taṁ rūpa-mayaṁ vegaṁ sahati,||
ayaṁ vuccati bhikkhave atari||
cakkhu samuddaṁ saūmiṁ sāvaṭṭaṁ sagāhaṁ sarakkhasaṁ tiṇṇo pāragato thale tiṭṭhati brāhmaṇo.|| ||

■

Sotaṁ bhikkhave purisassa samuddo,||
tassa saddamayo vego.|| ||

Yo taṁ sadda-mayaṁ vegaṁ sahati,||
ayaṁ vuccati bhikkhave atari||
sota samuddaṁ saūmiṁ sāvaṭṭaṁ sagāhaṁ sarakkhasaṁ tiṇṇo pāragato thale tiṭṭhati brāhmaṇo.|| ||

■

Ghānaṁ bhikkhave purisassa samuddo,||
tassa gandhamayo vego.|| ||

Yo taṁ gandha-mayaṁ vegaṁ sahati,||
ayaṁ vuccati bhikkhave atari||
ghāna samuddaṁ saūmiṁ sāvaṭṭaṁ sagāhaṁ sarakkhasaṁ tiṇṇo pāragato thale tiṭṭhati brāhmaṇo.|| ||

■

Jivhā bhikkhave purisassa samuddo,||
tassa rasamayo vego.|| ||

Yo taṁ rasa-mayaṁ vegaṁ sahati,||
ayaṁ vuccati bhikkhave atari||
jivhā samuddaṁ saūmiṁ sāvaṭṭaṁ sagāhaṁ sarakkhasaṁ tiṇṇo pāragato thale tiṭṭhati brāhmaṇo.|| ||

■

Kāyaṁ bhikkhave purisassa samuddo,||
tassa phoṭṭhabbamayo vego.|| ||

Yo taṁ phoṭṭhabba-mayaṁ vegaṁ sahati,||
ayaṁ vuccati bhikkhave atari||
kāyo samuddaṁ saūmiṁ sāvaṭṭaṁ sagāhaṁ sarakkhasaṁ tiṇṇo pāragato thale tiṭṭhati brāhmaṇo.|| ||

■

Mano bhikkhave purisassa samuddo,||
tassa dhammamayo vego.|| ||

Yo taṁ dhamma-mayaṁ vegaṁ sahati,||
ayaṁ vuccati bhikkhave atari||
mano samuddaṁ saūmiṁ sāvaṭṭaṁ sagāhaṁ sarakkhasaṁ tiṇṇo pāragato thale tiṭṭhati brāhmaṇo.|| ||

Yo imaṁ samuddaṁ sagāhaṁ sarakkhasaṁ||
saūmibhayaṁ duttaraṁ accatari||
Sa vedagū vusitabrahma-cariyo||
'Lokantagū pāragato' ti vuccatī" ti.|| ||