Saṃyutta Nikāya
4. Saḷāyatana Vagga
35. Saḷāyatana Saṃyutta
§ IV: Paññāsaka Catuttha
3. Samudda Vagga
Sutta 192
Kāmabhū Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ:|| ||
Ekaṃ samayaṃ āyasmā ca Ānando āyasmā ca Kāmabhū Bārāṇasiyaṃ viharanti||
Isipatane Migadāye.|| ||
[2] Atha kho āyasmā Kāmabhū sāyaṇha-samayaṃ paṭisallāṇā vuṭṭhito yen āyasmā Ānando ten'upasaṅkami.|| ||
Upasaṅkamitvā āyasmatā Ānando saddhiṃ sammodi,||
sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
[3] Eka-m-antaṃ nisinno kho āyasmā Kāmabhū āyasmantaṃ Ānando etad avoca:|| ||
"Kin nu kho āvuso Ānanda||
cakkhu rūpānaṃ saṃyojanaṃ rūpā cakkhussa saṃyojanaṃ?
Sotaṃ saddānaṃ saṃyojanaṃ||
saddā sotassa saṃyojanaṃ?
Ghānaṃ gandhānaṃ saṃyojanaṃ||
gandhā ghānassa saṃyojanaṃ?
Jivhā rasānaṃ saṃyojanaṃ||
rasā jivhāya saṃyojanaṃ?
Kāyo phoṭṭhabbānaṃ saṃyojanaṃ||
phoṭṭhabbā kāyassa saṃyojanaṃ?
Mano dhammānaṃ saṃyojanaṃ||
dhammā manassa saṃyojanan" ti?|| ||
■
[4] "Na kho āvuso Kāmabhū,||
cakkhu rūpānaṃ saṃyojanaṃ,||
na rūpā cakkhussa saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Sota saddānaṃ saṃyojanaṃ,||
na saddā sotassa saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Ghāna ghandhānaṃ saṃyojanaṃ,||
na gandhā ghānassa saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Jivhā rasānaṃ saṃyojanaṃ,||
na rasā jivhāya saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Kāyo phoṭṭhabbānaṃ saṃyojanaṃ,||
na phoṭṭhabbā kāyassa saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Mano dhammānaṃ saṃyojanaṃ,||
na dhammā manassa saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
§
[166] [5] Seyyathā pi āvuso kāḷo ca balivaddo||
odāto ca balivaddo||
ekena dāmena vā||
yottena vā saṃyuttāassu.|| ||
Yo nu kho evaṃ vadeyya:||
kāḷo balivaddo odātassa balivaddassa saṃyojanaṃ,||
odāto balivaddo kāḷassa balivaddassa saṃyojanan ti||
sammā nu kho so vadamāno vadeyyā" ti?|| ||
"No h'etaṃ āvuso."|| ||
"Na kho āvuso kāḷo balivaddo||
odātassa balivaddassa saṃyojanaṃ,||
na pi odāto balivaddo kāḷassa||
balivaddassa saṃyojanaṃ,||
yena ca kho te ekena dāmena vā||
yottena vā saṃyuttā,||
taṃ tattha saṃyojanaṃ.|| ||
Evam eva kho āvuso na cakkhu rūpānaṃ saṃyojanaṃ,||
na rūpā cakkhussa saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na sotaṃ saddānaṃ saṃyojanaṃ,||
na saddā sotassa saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na ghānaṃ gandhānaṃ saṃyojanaṃ,||
na gandhā ghānassa saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na jivhā rasānaṃ saṃyojanaṃ,||
na rasā jivhāya saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na kayo phoṭṭhabbānaṃ saṃyojanaṃ,||
na phoṭṭhabbā kāyassa saṃyojanaṃ.|| ||
Yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na mano dhammānaṃ saṃyojanaṃ,||
na dhammā manassa saṃyojanaṃ.|| ||
Yaṇ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
§
[6] Cakkhuṃ vā āvuso rūpānaṃ saṃyojanaṃ abhavissa,||
rūpā vā cakkhussa saṃyojanaṃ,||
na idaṃ brahma-cariy-a-vāso paññāyetha sammā dukkha-k-khayāya.|| ||
Yasmā ca kho āvuso||
na cakkhu rūpānaṃ saṃyojanaṃ||
na rūpā cakkhussa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ,||
tasmā brahma-cariy-a-vāso paññāyati sammā dukkhayāya.|| ||
■
Sotaṃ vā āvuso saddānaṃ saṃyojanaṃ abhavissa,||
saddā vā sotassa saṃyojanaṃ,||
na idaṃ brahma-cariy-a-vāso paññāyetha sammā dukkha-k-khayāya.|| ||
Yasmā ca kho āvuso||
na sota saddānaṃ saṃyojanaṃ||
na saddā sotassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ,||
tasmā brahma-cariy-a-vāso paññāyati sammā dukkhayāya.|| ||
■
Ghānaṃ vā āvuso gandhānaṃ saṃyojanaṃ abhavissa,||
gandhā vā ghānassa saṃyojanaṃ,||
na idaṃ brahma-cariy-a-vāso paññāyetha sammā dukkha-k-khayāya.|| ||
Yasmā ca kho āvuso||
na ghānaṃ gandhānaṃ saṃyojanaṃ||
na gandhā ghānassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ,||
tasmā brahma-cariy-a-vāso paññāyati sammā dukkhayāya.|| ||
■
Jivhā vā āvuso rasānaṃ saṃyojanaṃ abhavissa,||
rasā vā jivhāya saṃyojanaṃ,||
na idaṃ brahma-cariy-a-vāso paññāyetha sammā dukkha-k-khayāya.|| ||
Yasmā ca kho āvuso||
na jivhā rasānaṃ saṃyojanaṃ||
na rasā jivhāya saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ,||
tasmā brahma-cariy-a-vāso paññāyati sammā dukkhayāya.|| ||
■
Kāyo vā āvuso phoṭṭhabbānaṃ saṃyojanaṃ abhavissa,||
phoṭṭhabbā vā kāyassa saṃyojanaṃ,||
na idaṃ brahma-cariy-a-vāso paññāyetha sammā dukkha-k-khayāya.|| ||
Yasmā ca kho āvuso||
na kāyo phoṭṭhabbānaṃ saṃyojanaṃ||
na phoṭṭhabbā kāyassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ,||
tasmā brahma-cariy-a-vāso paññāyati sammā dukkhayāya.|| ||
■
Mano vā āvuso dhammānaṃ saṃyojanaṃ abhavissa,||
dhammā vā manassa saṃyojanaṃ,||
na idaṃ brahma-cariy-a-vāso paññāyetha sammā dukkha-k-khayāya.|| ||
Yasmā ca kho āvuso||
na mano dhammānaṃ saṃyojanaṃ||
na dhammā manassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ,||
tasmā brahma-cariy-a-vāso paññāyati sammā dukkhayāya.|| ||
§
[7] Iminā petaṃ āvuso pariyāyena veditabbaṃ:||
yathā na cakkhu rūpānaṃ saṃyojanaṃ,||
na rūpā cakkhussa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na sota saddānaṃ saṃyojanaṃ,||
na saddā sotassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na ghāna gandhānaṃ saṃyojanaṃ,||
na gandhā ghānassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na jivhā rasānaṃ saṃyojanaṃ,||
na rasā jivhāya saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na kāyo phoṭṭhabbānaṃ saṃyojanaṃ,||
na phoṭṭhabbā kāyassa,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na mano dhammānaṃ saṃyojanaṃ,||
na dhammā manassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
§
[8] Saṅvijjati kho āvuso Bhagavato cakkhu,||
passati Bhagavā cakkhunā rūpaṃ,||
chanda-rāgo Bhagavato n'atthi,||
su-vimutta-citto Bhagavā.|| ||
Saṅvijjati kho āvuso Bhagavato sota,||
passati Bhagavā sotena saddaṃ,||
chanda-rāgo Bhagavato n'atthi,||
su-vimutta-citto Bhagavā.|| ||
Saṅvijjati kho āvuso Bhagavato ghāna,||
passati Bhagavā ghānena gandhaṃ,||
chanda-rāgo Bhagavato n'atthi,||
su-vimutta-citto Bhagavā.|| ||
Saṅvijjati kho āvuso Bhagavato jivhā,||
sāyati Bhagavā jivhāya rasaṃ,||
chanda-rāgo Bhagavato n'atthi,||
su-vimutta-citto Bhagavā.|| ||
Saṅvijjati kho āvuso Bhagavato kāyo,||
sāyati Bhagavā kāyo phoṭṭhabbānaṃ,||
chanda-rāgo Bhagavato n'atthi,||
su-vimutta-citto Bhagavā.|| ||
Saṅvijjati kho āvuso Bhagavato mano,||
jānāti Bhagavā manasā dhammaṃ,||
chanda-rāgo Bhagavato n'atthi,||
su-vimutta-citto Bhagavā.|| ||
§
[9] Iminā kho etaṃ āvuso pariyāyena veditabbaṃ:||
yathā na cakkhu rūpānaṃ saṃyojanaṃ,||
na rūpā cakkhussa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na sota saddānaṃ saṃyojanaṃ,||
na saddā sotassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na ghāna gandhānaṃ saṃyojanaṃ,||
na gandhā ghānassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na jivhā rasānaṃ saṃyojanaṃ,||
na rasā jivhāya saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na kāyo phoṭṭhabbānaṃ saṃyojanaṃ,||
na phoṭṭhabbā kāyassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanaṃ.|| ||
Na mano dhammānaṃ saṃyojanaṃ,||
na dhammā manassa saṃyojanaṃ,||
yañ ca tattha tad ubhayaṃ paṭicca uppajjati chanda-rāgo||
taṃ tattha saṃyojanan" ti.
