Dutiya Hattha-Pād'Upamā Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh] Evaṁ me sutaṁ:|| ||

Ekaṁ samayaṁ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

3. Bhagavā etad avoca:|| ||

"Hatthesu bhikkhave sati ādānanikkhepanaṁ paññāyati.|| ||

Pādesu sati abhi-k-kamapaṭikkamo paññāyati.|| ||

Pabbesu sati sammiñjana pasāraṇaṁ paññāyati.|| ||

Kucchismiṁ sati jighacchā pipāsā paññāyati.|| ||

Evam eva kho bhikkhave cakkhusmiṁ sati cakkhu-samphassa-paccayā uppajjati ajjhattaṁ sukhaṁ dukkhaṁ.|| ||

Sotasmiṁ sati sota-samphassa-paccayā uppajjati ajjhattaṁ sukhaṁ dukkhaṁ.|| ||

Ghānasmiṁ sati ghāna-samphassa-paccayā uppajjati ajjhattaṁ sukhaṁ dukkhaṁ.|| ||

Jivhāya sati jivhā-samphassa-paccayā uppajjati ajjhattaṁ sukhaṁ dukkhaṁ.|| ||

Kāyasmiṁ sati kāya-samphassa-paccayā uppajjati ajjhattaṁ sukhaṁ dukkhaṁ.|| ||

Manasmiṁ sati mano-samphassa-paccayā uppajjati ajjhattaṁ sukhaṁ dukkhaṁ.|| ||

Hatthesu bhikkhave asati ādānanikkhepanaṁ na paññāyati.|| ||

Pādesu asati abhi-k-kamapaṭikkamo na paññāyati.|| ||

Pabbesu asati sammiñjana pasāraṇaṁ na paññāyati.|| ||

Kucchismiṁ asati jighacchā pipāsā na paññāyati..|| ||

Evam eva kho bhikkhave cakkhusmiṁ asati cakkhu-samphassa-paccayā nūpajjati ajjhattaṁ sukhaṁ dukkhaṁ.|| ||

Sotasmiṁ asati sota-samphassa-paccayā nūpajjati ajjhattaṁ sukhaṁ dukkhaṁ.|| ||

Ghānasmiṁ asati ghāna-samphassa-paccayā nūpajjati ajjhattaṁ sukhaṁ dukkhaṁ.|| ||

Jivhāya asati jivhā-samphassa-paccayā nūpajjati ajjhattaṁ sukhaṁ dukkhaṁ.|| ||

Kāyasmiṁ asati kāya-samphassa-paccayā nūpajjati ajjhattaṁ sukhaṁ dukkhaṁ.|| ||

Manasmiṁ asati mano-samphassa-paccayā nūpajjati ajjhattaṁ sukhaṁ dukkhaṁ" ti.|| ||