Saṁyutta Nikāya
4. Saḷāyatana Vagga
35. Saḷāyatana Saṁyutta
§ IV: Paññāsaka Catuttha
4. Āsīvisa Vagga

Sutta 207

Yava-Kalāpī Suttaṁ

 

---

[201]

[1][pts][than][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

3. Bhagavā etad avoca:|| ||

"Seyyathā pi bhikkhave yava-kalāpī cātu-m-mahā-pathe nikkhittā assa,||
atha cha purisā āgaccheyyuṁ vyābhaṅgi-hatthā,||
ne taṁ yava-kalāpiṁ chahi vyābhaṅgīhi haneyyuṁ,||
evaṁ hi sā bhikkhave yava-kalāpī suhatā assa chahi vyābhaṅgīhi bhaññamānā.|| ||

Atha sattamo puriso āgaccyeyya vyābhaṅgi-hattho,||
so taṁ yava-kalāpiṁ sattamāya vyabhaṅgiyā haneyya,||
evaṁ hi sā bhikkhave yava-kalāpi suhatatarā assa sattamāya vyābhaṅgiyā bhaññamānā.|| ||

Evam eva kho bhikkhave a-s-sutavā puthujjano cakkhusmiṁ haññati manāpāmanāpehi rūpehi,||
sotasmiṁ haññati manāpāmanāpehi saddehi,||
ghānasmiṁ haññati manāpāmanāpehi gandhehi,||
jivhāya haññati manāpāmanāpehi rasehi,||
kāyasmiṁ haññati manāpāmanāpehi phoṭṭhabbehi,||
manasmiṁ haññati manāpāmanāpehi dhammehi.|| ||

Sace so bhikkhave a-s-sutavā puthujjano āyatiṁ puna-b-bhavāya ceteti||
evaṁ hi so bhikkhave mogha-puriso suhatataro hoti,||
seyyathā pi bhikkhave sā yava-kalāpī sattamāya vyābhaṅgiyā haññamānā.|| ||

Bhuta-pubbaṁ bhikkhave, dev-ā-sura-saṅgāmo samūp'abbuḷho ahosi.|| ||

Atha kho bhikkhave Vepacitti asurindo asure āmantesi:|| ||

'Sace mārisā, dev-ā-sura-saṅgāme samūpabbūḷhe,||
Asurā jineyyuṁ||
devā parājineyyuṁ,||
yena naṁ Sakkaṁ devānam indaṁ kaṇṭhe pañcamehi bandhanehi bandhitvā mama santike āneyyātha Asurapuran' ti.|| ||

Sakko pi kho bhikkhave devānaṁ Indo deve Tāvatiṁse āmantesi:|| ||

'Sace mārisā dev-ā-sura-saṅgāme samūp'abbuḷhe,||
devā jineyyuṁ,||
Asurā parājineyyuṁ||
yena naṁ Vepacittiṁ asur indaṁ kaṇṭe pañcamehi bandhanehi bandhitvā mama santike āneyyātha Sudhamma devasabhan' ti.|| ||

Tasmiṁ kho pana bhikkhave saṅgāme devā jiniṁsu||
Asurā parāji- [202] niṁsu.|| ||

Atha kho bhikkhave devā Tāvatiṁsā Vepacittiṁ asurindaṁ kaṇṭhe pañcamehi bandhanehi bandhitvā Sakkassa devānam indassa santike ānesuṁ Sudhammaṁ devasabhaṁ.|| ||

Tatra sudaṁ bhikkhave Vepacitti asurindo kaṇṭhe pañcamehi bandhanehi baddho hoti.|| ||

Yadā ca kho bhikkhave Vepacittissa asurindassa evaṁ hoti:|| ||

'Dhammikā kho devā,||
adhammikā Asurā,||
idh'eva dānāhaṁ||
devapuraṁ gacchāmī' ti.|| ||

Atha kaṇṭhe pañcamehi bandhanehi muttaṁ attāṇaṁ samanupassati.|| ||

Dibbehi ca pañcahi kāma-guṇehi samappito samaṅgībhuto paricāreti.|| ||

Yadā ca kho bhikkhave Vepacittissa asurindassa evaṁ hoti:|| ||

'Dhammikā kho Asurā,||
adhammikā devā,||
tatth'eva dānāhaṁ Asurapuraṁ gamissāmī' ti.|| ||

Atha kaṇṭhe pañcamehi bandhanehi baddhaṁ||
attāṇaṁ samanupassati.|| ||

Dibbehi ca pañcahi kāma-guṇehi parihāyati.|| ||

Evaṁ sukhumaṁ kho bhikkhave Vepacitti-bandhanaṁ,||
tato sukhumataraṁ Māra-bandhanaṁ,||
mañña-māno kho bhikkhave baddho Mārassa,||
amañña-māno mutto pāpimato.|| ||

'Asmī' ti bhikkhave maññitame taṁ||
'ayamahamasmī' ti maññitame taṁ,||
'bhavissan' ti maññitame taṁ,||
'na bhavissan' ti maññitame taṁ,||
'rūpi bhavissan' ti maññitame taṁ,||
'arūpī bhavissan' ti maññitame taṁ,||
'saññī bhavissan' ti maññitame taṁ,||
'asaññī bhavissan' ti maññitame taṁ,||
'n'eva-saññi-n-ā-saññi bhavissan' ti maññitame taṁ;||
maññitaṁ bhikkhave rogo,||
maññitaṁ gaṇḍo,||
maññitaṁ sallaṁ.|| ||

Tasmātiha bhikkhave||
'Amañña-mānena cetasā viharissāmā' ti,||
evaṁ hi vo bhikkhave sikkhitabbaṁ.|| ||

■

'Asmī' ti bhikkhave iñjitame taṁ||
'ayamahamasmī' ti iñjitame taṁ,||
'bhavissan' ti iñjitame taṁ,||
'na bhavissan' ti iñjitame taṁ,||
'rūpi bhavissan' ti iñjitame taṁ,||
'arūpī bhavissan' ti iñjitame taṁ,||
'saññī bhavissan' ti iñjitame taṁ,||
'asaññī bhavissan' ti iñjitame taṁ,||
'n'eva-saññi-n-ā-saññi bhavissan' ti iñjitame taṁ;||
iñjitaṁ [203] bhikkhave rogo,||
iñjitaṁ gaṇḍo,||
iñjitaṁ sallaṁ.|| ||

Tasmātiha bhikkhave||
'Aniñjamānena cetasā viharissāmā' ti,||
evaṁ hi vo bhikkhave sikkhitabbaṁ.|| ||

■

'Asmī' ti bhikkhave phanditame taṁ||
'ayamahamasmī' ti phanditame taṁ,||
'bhavissan' ti phanditame taṁ,||
'na bhavissan' ti phanditame taṁ,||
'rūpi bhavissan' ti phanditame taṁ,||
'arūpī bhavissan' ti phanditame taṁ,||
'saññī bhavissan' ti phanditame taṁ,||
'asaññī bhavissan' ti phanditame taṁ,||
'n'eva-saññi-n-ā-saññi bhavissan' ti phanditame taṁ;||
phanditaṁ bhikkhave rogo,||
phanditaṁ gaṇḍo,||
phanditaṁ sallaṁ.|| ||

Tasmātiha bhikkhave||
'Aphandamānena cetasā viharissāmā' ti,||
evaṁ hi vo bhikkhave sikkhitabbaṁ.|| ||

■

'Asmī' ti bhikkhave papañcitame taṁ||
'ayamahamasmī' ti papañcitame taṁ,||
'bhavissan' ti papañcitame taṁ,||
'na bhavissan' ti papañcitame taṁ,||
'rūpi bhavissan' ti papañcitame taṁ,||
'arūpī bhavissan' ti papañcitame taṁ,||
'saññī bhavissan' ti papañcitame taṁ,||
'asaññī bhavissan' ti papañcitame taṁ,||
'n'eva-saññi-n-ā-saññi bhavissan' ti papañcitame taṁ;||
papañcitaṁ bhikkhave rogo,||
papañcitaṁ gaṇḍo,||
papañcitaṁ sallaṁ.|| ||

Tasmātiha bhikkhave||
'Nippapañc'ārāmena cetasā viharissāmā' ti,||
evaṁ hi vo bhikkhave sikkhitabbaṁ.|| ||

■

'Asmī' ti bhikkhave mānagatame taṁ||
'ayamahamasmī' ti mānagatame taṁ,||
'bhavissan' ti mānagatame taṁ,||
'na bhavissan' ti mānagatame taṁ,||
'rūpi bhavissan' ti mānagatame taṁ,||
'arūpī bhavissan' ti mānagatame taṁ,||
'saññī bhavissan' ti mānagatame taṁ,||
'asaññī bhavissan' ti mānagatame taṁ,||
'n'eva-saññi-n-ā-saññi bhavissan' ti mānagatame taṁ;||
mānagatame taṁ bhikkhave rogo,||
mānagatame taṁ gaṇḍo,||
mānagatame taṁ sallaṁ.|| ||

Tasmātiha bhikkhave||
'Nihatmānena cetasā viharissāmā' ti,||
evaṁ hi vo bhikkhave sikkhitabbaṁ.|| ||