Saṁyutta Nikāya
4. Saḷāyatana Vagga
36. Vedanā Saṁyutta
1. Sagāthā Vagga

Sutta 10

Phassa-Mūlaka Suttaṁ

 

---

[215]

[1][pts][nypo][bodh] Evaṁ me sutaṁ:|| ||

Ekaṁ samayaṁ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

3. Bhagavā etad avoca:|| ||

"Tisso imā bhikkhave vedanā||
phassajā||
phassamūlakā||
phassa nidānā||
phassa-paccayā.|| ||

Katamā tisso?|| ||

Sukhā vedanā||
dukkhā vedanā||
adukkha-m-asukhā vedanā.|| ||

Sukha-vedaniyaṁ bhikkhave phassaṁ paṭicca||
uppajjati sukhā vedanā.|| ||

Tass'eva sukha-vedaniyassa phassassa nirodhā||
yaṁ tajjaṁ vedayitaṁ,||
sukha-vedaniyaṁ phassaṁ paṭicca||
uppannā sukhā vedanā||
sā nirujjhati,||
sā vūpasammati.|| ||

■

Dukkha-vedaniyaṁ bhikkhave phassaṁ paṭicca||
uppajjati dukkhā vedanā.|| ||

Tass'eva dukkha-vedaniyassa phassassa nirodhā||
yaṁ tajjaṁ vedayitaṁ||
dukkha-vedaniyaṁ phassaṁ paṭicca||
uppannā dukkhā vedanā||
sā nirujajhati,||
sā vūpasammati.|| ||

Adukkha-m-asukha-vedanīyaṁ bhikkhave phassaṁ paṭicca||
uppajjati adukkha-m-asukhā vedanā.|| ||

Tass'eva adukkha-m-asukha-vedanīyassa phassassa nirodhā||
yaṁ tajjaṁ vedayitaṁ||
adukkha-m-asukha-vedanīyaṁ phassaṁ paṭicca||
uppannā adukkha-m-asukhā vedanā||
sā nirujajhati,||
sā vūpasammati.|| ||

 

§

 

Seyyathā pi, bhikkhave, dvinnaṁ kaṭṭhānaṁ saṅgh'aṭṭhana-samodhānā usmā jāyati tejo abhinibbattati,||
tesaṁ yeva kaṭṭhānaṁ nānā bhāvā vinikkhepā yā tajjā usmā||
sā nirujajhati,||
sā vūpasammati.|| ||

Evam eva kho bhikkhave imā tisso vedanā phassajā phassamūlakā phassanidānā phassa-paccayā tajjaṁ tajjaṁ phassaṁ paṭicca tajjā tajjā vedanā uppajjanti.|| ||

Tajjassa tajjassa phassassa nirodhā||
tajjā tajjā vedanā nirujajhantī" ti.|| ||