Saṃyutta Nikāya
4. Saḷāyatana Vagga
36. Vedanā Saṃyutta
2. Raho-Gata Vagga
Sutta 11
Raho-Gataka Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][bit][pts][than][nypo][bodh][olds] Evaṃ me sutaṃ:|| ||
[2] Atha kho aññataro bhikkhu yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ nisīdi.|| ||
[3] Eka-m-antaṃ nisinno kho so bhikkhu Bhagavantaṃ etad avoca:|| ||
"Idha mayhaṃ bhante raho-gatassa paṭisallīnassa
evaṃ cetaso parivitakko udapādi:|| ||
'Tisso vedanā vuttā Bhagavatā,||
[1] sukhā vedanā,||
[2] dukkhā vedanā,||
[3] adukkha-m-asukhā vedanā.|| ||
Imā tisso vedanā vuttā Bhagavatā.|| ||
Vuttaṃ kho pan'etaṃ Bhagavatā:|| ||
"Yaṃ kiñci vedayitaṃ taṃ dukkhasmin" ti.|| ||
Kiṃ nu kho etaṃ ca Bhagavatā sandhāya bhāsitaṃ:|| ||
"Yaṃ kiñ ca vedayitaṃ taṃ dukkhasmin'" ti?"|| ||
§
[4] "Sādhu, sādhu bhikkhu!|| ||
Tisso imā bhikkhu vedanā vuttā mayā,||
sukhā vedanā,||
dukkhā vedanā,||
adukkha-m-asukhā vedanā.|| ||
Imā tisso vedanā vuttā mayā.|| ||
Vuttaṃ kho pan'etaṃ bhikkhu mayā|| ||
'Yaṃ kiñci vedayitaṃ taṃ dukkhasmin' ti.|| ||
■
Taṃ kho pan'etaṃ bhikkhu mayā saṅkhārānaṃ yeva||
aniccataṃ sandhāya bhāsitaṃ:|| ||
'Yaṃ kiñci vedayitaṃ taṃ dukkhasmin' ti.|| ||
■
Taṃ kho pan'etaṃ bhikkhu mayā saṅkhārānaṃ yeva||
khaya-dhammataṃ sandhāya bhāsitaṃ:|| ||
'Yaṃ kiñci vedayitaṃ taṃ dukkhasmin' ti.|| ||
■
Taṃ kho pan'etaṃ bhikkhu mayā saṅkhārānaṃ yeva||
vaya-dhammataṃ sandhāya bhāsitaṃ:|| ||
'Yaṃ kiñci vedayitaṃ taṃ dukkhasmin' ti.|| ||
■
Taṃ kho pan'etaṃ bhikkhu mayā saṅkhārānaṃ yeva||
virāga-dhammataṃ sandhāya bhāsitaṃ:|| ||
'Yaṃ kiñci vedayitaṃ taṃ dukkhasmin' ti.|| ||
■
Taṃ kho pan'etaṃ bhikkhu mayā saṅkhārānaṃ yeva [217]||
nirodha-dhammataṃ sandhāya bhāsitaṃ:|| ||
'Yaṃ kiñci vedayitaṃ taṃ dukkhasmin' ti.|| ||
■
Taṃ kho pan'etaṃ bhikkhu mayā saṅkhārānaṃ yeva||
vipariṇāma-dhammataṃ sandhāya bhāsitaṃ:|| ||
'Yaṃ kiñci vedayitaṃ taṃ dukkhasmin' ti.|| ||
§
[5] Atha kho pana bhikkhu mayā anupubba||
saṅkhārānaṃ nirodho akkhāto.|| ||
Paṭhamaṃ-jhānaṃ samāpannassa||
vācā niruddhā hoti.|| ||
Dutiyaṃ-jhānaṃ samāpannassa||
vitakka-vicārā niruddhā honti.|| ||
Tatiyaṃ-jhānaṃ samāpannassa||
pīti niruddhā hoti.|| ||
Catutthaṃ-jhānaṃ samāpannassa||
assāsa-passāsā niruddhā honti.|| ||
Ākāsanañ-c'āyatanaṃ samāpannassa||
rūpa-saññā niruddhā hoti.|| ||
Viññāṇañ-c'āyatanaṃ samāpannassa||
Ākāsanañ-c'āyatana-saññā niruddhā hoti.|| ||
Ākiñcaññ'āyatanaṃ samāpannassa||
Viññāṇañ-c'āyatana-saññā niruddhā hoti.|| ||
N'eva-saññā-nā-saññ'āyatanaṃ samāpannassa||
Ākiñcaññ'āyatana-saññā niruddhā hoti.|| ||
Saññā-vedayita-nirodhaṃ samāpannassa||
saññā ca vedanā ca niruddhā honti.|| ||
Khīṇ'āsavassa bhikkhuno||
rāgo niruddho hoti,||
doso niruddho hoti,||
moho niruddho hoti.|| ||
§
[6] Atha kho pana bhikkhu mayā anupubba-saṅkhārānaṃ vūpasamo akkhāto.|| ||
Paṭhamaṃ-jhānaṃ samāpannassa||
vācā vūpasantā hoti.|| ||
Dutiyaṃ-jhānaṃ samāpannassa||
vitakka-vicārā vūpasantā honti.|| ||
Tatiyaṃ-jhānaṃ samāpannassa||
pīti vūpasantā hoti.|| ||
Catutthaṃ-jhānaṃ samāpannassa||
assāsa-passāsā vūpasantā honti.|| ||
Ākāsanañ-c'āyatanaṃ samāpannassa||
rūpa-saññā vūpasantā hoti.|| ||
Viññāṇañ-c'āyatanaṃ samāpannassa||
Ākāsanañ-c'āyatana-saññā vūpasantā hoti.|| ||
Ākiñcaññ'āyatanaṃ samāpannassa||
Viññāṇañ-c'āyatana-saññā vūpasantā hoti.|| ||
N'eva-saññā-nā-saññ'āyatanaṃ samāpannassa||
Ākiñ caññ'āyatana-saññā vūpasantā hoti.|| ||
Saññā-vedayita-nirodhaṃ samāpannassa||
saññā ca vedanā ca vūpasantā honti.|| ||
Khīṇ'āsavassa bhikkhuno||
rāgo vūpasanto hoti||
doso vūpasanto hoti,||
moho vūpasanto hoti.|| ||
§
[7] Cha yimā bhikkhu passaddhiyo:|| ||
Paṭhamaṃ-jhānaṃ samāpannassa||
vācā paṭippassaddhā hoti.|| ||
Dutiyaṃ-jhānaṃ samāpannassa||
vitakka-vicārā paṭippassaddhā honti.|| ||
Tatiyaṃ-jhānaṃ samāpannassa||
pīti paṭippassaddhā hoti.|| ||
Catutthaṃ samāpannassa||
assāsa-passāsā paṭippassaddhā [218] honti.|| ||
Saññā-vedayita-nirodhaṃ samāpannassa||
saññā ca vedanā ca paṭippassaddhā honti.|| ||
Khīṇ'āsavassa bhikkhuno||
rāgo paṭi-p-passaddho hoti,||
doso paṭi-p-passaddho hoti,||
moho paṭi-p-passaddho hotī" ti.|| ||
