Kim Atthiya? Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][olds] Evaṃ me sutaṃ:|| ||

Ekaṃ samayaṃ āyasmā Sāriputto Magadhesu viharati Nālagāmake.|| ||

Atha kho Jambukhādako paribbājako yen'āyasmā Sāriputto ten'upasaṅkami.|| ||

Upasaṅkamitvā āyasmatā Sāriputtena saddhiṃ sammodi.|| ||

Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||

Eka-m-antaṃ nisinno kho Jambukhādako paribbājako āyasmantaṃ Sāriputtaṃ etad avoca:|| ||

"Kim atthiyaṃ, āvuso Sāriputta,||
samaṇe Gotame Brahma-cariyaṃ vussatī" ti?|| ||

"Dukkhassa kho, āvuso,||
pariññatthaṃ||
Bhagavati Brahma-cariyaṃ vussatī" ti.|| ||

"Atthi pan'āvuso, Maggo||
atthi paṭipadā||
etassa dukkhassa pariññāyā" ti?|| ||

"Atthi kho āvuso Maggo||
atthi paṭipadā||
etassa dukkhassa pariññāyā" ti.|| ||

"Katamo pan'āvuso Maggo||
katamā paṭipadā||
etassa dukkhassa pariññāyā" ti?|| ||

[254] "Ayam eva kho āvuso Ariyo Aṭṭh'aṅgiko Maggo||
etassa dukkhassa pariññāyā,||
seyyath'īdaṃ:|| ||

Sammā-diṭṭhi||
sammā-saṅkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhi.|| ||

Ayaṃ kho āvuso Maggo||
ayaṃ paṭipadā||
etassa dukkhassa pariññāyā" ti.|| ||

"Bhaddako āvuso Maggo||
bhaddikā paṭipadā||
etassa dukkhassa pariññāyā,||
alañ ca pan'āvuso Sāriputta appamādāyā" ti.|| ||