Saṃyutta Nikāya
4. Saḷāyatana Vagga
38. Jambukhādaka Saṃyutta
Sutta 5
Assāsa Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ āyasmā Sāriputto Magadhesu viharati Nālagāmake.|| ||
Atha kho Jambukhādako paribbājako yen'āyasmā Sāriputto ten'upasaṇkami.|| ||
Upasaṇkamitvā āyasmatā Sāriputtena saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
Eka-m-antaṃ nisinno kho Jambukhādako paribbājako āyasmantaṃ Sāriputtaṃ etad avoca:|| ||
"'Assāsa-p-patto assāsa-p-patto' ti||
āvuso Sāriputta vuccati.|| ||
Kittāvatā nu kho āvuso Sāriputta assāsa-p-patto hotī" ti?|| ||
"Yato kho āvuso bhikkhu channaṃ phass'āyatanānaṃ samudayañ ca||
attha-gamañ ca||
ādīnavañ ca||
nissaraṇañ ca||
yathā-bhūtaṃ pajānāti,||
ettāvatā kho āvuso assāsa-p-patto hotī" ti.|| ||
"Atthi pan'āvuso Maggo||
atthi paṭipadā||
etassa assāsassa sacchi-kiriyāyā" ti?|| ||
"Atthi kho āvuso Maggo||
atthi paṭipadā||
etassa assāsassa sacchi-kiriyāyā" ti.|| ||
"Katamo pan'āvuso Maggo||
katamā paṭipadā||
etassa assāsassa sacchi-kiriyāyā" ti?|| ||
"Ayam eva kho āvuso Ariyo Aṭṭh'aṇgiko Maggo||
etassa assāsassa sacchi-kiriyāyā,||
seyyath'īdaṃ:|| ||
Sammā-diṭṭhi||
sammā-saṇkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhi.|| ||
Ayaṃ kho āvuso Maggo||
ayaṃ paṭipadā||
etassa assāsassa sacchi-kiriyāyā" ti.|| ||
"Bhaddako āvuso Maggo||
bhaddikā paṭipadā||
etassa assāsassa sacchi-kiriyāyā,||
alañ ca pan'āvuso Sāriputta appamādāyā" ti.|| ||
