Saṁyutta Nikāya
4. Saḷāyatana Vagga
39. Sāmaṇḍaka Saṁyutta

Sutta 10

Taṇhā Suttaṁ

 

---

[262]

[1][pts] Evaṁ me sutaṁ:|| ||

Ekaṁ samayaṁ āyasmā Sāriputto vajjīsu Viharati||
Ukkavelāyaṁ Gaṅgāya nadiyā tīre.|| ||

Atha kho Sāmaṇḍakāni paribbājako yen'āyasmā Sāriputto ten'upasaṅkami.|| ||

Upasaṅkamitvā āyasmatā Sāriputtena saddhiṁ sammodi.|| ||

Sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdi.|| ||

Eka-m-antaṁ nisinno kho Sāmaṇḍakāni paribbājako āyasmantaṁ Sāriputtaṁ etad avoca:|| ||

"'Taṇhā taṇhā' ti||
āvuso Sāriputta vuccati.|| ||

Katamā nu kho āvuso taṇhā" ti?|| ||

"Tisso imā āvuso taṇhā:||
kāma-taṇhā||
bhava-taṇhā||
vibhava-taṇhā.|| ||

Imā kho āvuso taṇhā:||
imā kho āvuso tisso taṇhā" ti.|| ||

"Atthi pan'āvuso Maggo||
atthi paṭipadā||
etāsaṁ taṇhānaṁ pahānāyā" ti?|| ||

"Atthi kho āvuso Maggo||
atthi paṭipadā||
etāsaṁ taṇhānaṁ pahānāyā" ti.|| ||

"Katamo pan'āvuso Maggo||
katamā paṭipadā||
etāsaṁ taṇhānaṁ pahānāyā" ti?|| ||

"Ayam eva kho āvuso Ariyo Aṭṭh'aṅgiko Maggo||
etāsaṁ taṇhānaṁ pahānāyā,||
seyyath'īdaṁ:|| ||

Sammā-diṭṭhi||
sammā-saṅkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhi.|| ||

Ayaṁ kho āvuso Maggo||
ayaṁ paṭipadā||
etāsaṁ taṇhānaṁ pahānāyā" ti.|| ||

"Bhaddako āvuso Maggo||
bhaddikā paṭipadā||
etāsaṁ taṇhānaṁ pahānāyā,||
alañ ca pan'āvuso Sāriputta appamādāyā" ti.|| ||