Upādāna Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] Evaṃ me sutaṃ:|| ||

Ekaṃ samayaṃ āyasmā Sāriputto vajjīsu Viharati||
Ukkavelāyaṃ Gaṅgāya nadiyā tīre.|| ||

Atha kho Sāmaṇḍakāni paribbājako yen'āyasmā Sāriputto ten'upasaṅkami.|| ||

Upasaṅkamitvā āyasmatā Sāriputtena saddhiṃ sammodi.|| ||

Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||

Eka-m-antaṃ nisinno kho Sāmaṇḍakāni paribbājako āyasmantaṃ Sāriputtaṃ etad avoca:|| ||

"'Upādānaṃ, upādānan' ti||
āvuso Sāriputta vuccati.|| ||

Katamā nu kho āvuso upādānan" ti?|| ||

"Cattār'imāni āvuso upādāni:||
kām'ūpādānaṃ||
diṭṭh'ūpādānaṃ||
sīla-b-bat'ūpādānaṃ||
atta-vād'ūpādānaṃ.|| ||

Imāni kho āvuso cattāri upādānānī" ti.|| ||

"Atthi pan'āvuso Maggo||
atthi paṭipadā||
etāsaṃ upādānānaṃ pahānāyā" ti?|| ||

"Atthi kho āvuso Maggo||
atthi paṭipadā||
etāsaṃ upādānānaṃ pahānāyā" ti.|| ||

"Katamo pan'āvuso Maggo||
katamā paṭipadā||
etāsaṃ upādānānaṃ pahānāyā" ti?|| ||

"Ayam eva kho āvuso Ariyo Aṭṭh'aṅgiko Maggo||
etāsaṃ upādānānaṃ pahānāyā,||
seyyath'īdaṃ:|| ||

Sammā-diṭṭhi||
sammā-saṅkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhi.|| ||

Ayaṃ kho āvuso Maggo||
ayaṃ paṭipadā||
etāsaṃ upādānānaṃ pahānāyā" ti.|| ||

"Bhaddako āvuso Maggo||
bhaddikā paṭipadā||
etāsaṃ upādānānaṃ pahānāyā,||
alañ ca pan'āvuso Sāriputta appamādāyā" ti.|| ||