Saṁyutta Nikāya
4. Saḷāyatana Vagga
40. Moggallāna Saṁyutta

Sutta 3

Sukha Suttaṁ

 

---

[264]

[1][pts][olds] Evaṁ me sutaṁ:|| ||

Ekaṁ samayaṁ āyasmā Mahā Moggallāno Sāvatthiyaṁ viharati Jetavane Anāthapiṇḍikassa ārāme.|| ||

Tatra kho āyasmā Mahā Moggallāno bhikkhū āmantesi:|| ||

"Āvuso bhikkhavo" ti.|| ||

"Āvuso" ti kho te bhikkhū āyasmato Mahā Moggallānassa paccassosuṁ.|| ||

Āyasmā Mahā Moggallāno etad avoca:|| ||

"Idha mayhaṁ āvuso raho-gatassa paṭīsallīnassa
evaṁ cetaso parivitakko udapādi:|| ||

'"Tatiyaṁ jhānaṁ,||
tatiyaṁ jhānan" ti vuccati.|| ||

Katamaṁ nu kho tatiyaṁ jhānan' ti?|| ||

Tassa mayhaṁ āvuso etad ahosi:|| ||

'Idha bhikkhu pītiyā ca virāgā||
upekhako viharati,||
sato ca sampajāno||
sukhañ ca kāyena paṭisaṁvedeti,||
yan taṁ ariyā acikkhanti:|| ||

"Upekhako satimā sukha-vihārī" ti|| ||

taṁ tatiyaṁ jhānaṁ upasampajja viharati.|| ||

Idaṁ vuccati tatiyaṁ jhānan' ti.|| ||

So khv'āhaṁ āvuso||
pītiyā ca virāgā||
upekhako ca viharāmi,||
sato ca sampajāno||
sukhañ ca kāyena paṭisaṁvedemi,||
yan taṁ ariyā acikkhanti:|| ||

"Upekhako satimā sukha-vihārī" ti|| ||

taṁ tatiyaṁ jhānaṁ upasampajja viharāmi||
tassa mayhaṁ āvuso||
iminā vihārena viharato||
pīti-sahagatā saññā-mana-sikārā samud'ācaranti.|| ||

Atha kho maṁ āvuso Bhagavā iddhiyā upasaṅkamitvā etad avoca:|| ||

'Moggallāna!|| ||

Moggallāna!|| ||

Mā brāhmaṇa,||
tatiyaṁ jhānaṁ pamādo,||
tatiye jhāne cittaṁ saṇṭhapehi,||
tatiye jhāne cittaṁ ekodiṁ-karohi,||
tatiye jhāne cittaṁ samādahā' ti.|| ||

So khv'āhaṁ āvuso||
aparena samayena||
pītiyā ca virāgā||
upekhako ca viharāmi,||
sato ca sampajāno||
sukhañ ca kāyena paṭisaṁvedemi,||
yan taṁ ariyā acikkhanti:|| ||

"Upekhako satimā sukha-vihārī" ti|| ||

taṁ tatiyaṁ jhānaṁ upasampajja vihāsiṁ.|| ||

Yaṁ hi taṁ āvuso sammā vadamāno vadeyya:|| ||

'Satthārānuggahito sāvako mahābhiññataṁ patto' ti,|| ||

mamantaṁ sammā vadamāno vadeyya,|| ||

'Satthārānuggahito sāvako mahābhiññataṁ patto' ti" ti.|| ||