Saṁyutta Nikāya
4. Saḷāyatana Vagga
40. Moggallāna Saṁyutta

Sutta 6

Viññānañ-c'Āyatana Suttaṁ

 

---

[266]

[1][pts][olds] Evaṁ me sutaṁ:|| ||

Ekaṁ samayaṁ āyasmā Mahā Moggallāno Sāvatthiyaṁ viharati Jetavane Anāthapiṇḍikassa ārāme.|| ||

Tatra kho āyasmā Mahā Moggallāno bhikkhū āmantesi:|| ||

"Āvuso bhikkhavo" ti.|| ||

"Āvuso" ti kho te bhikkhū āyasmato Mahā Moggallānassa paccassosuṁ.|| ||

Āyasmā Mahā Moggallāno etad avoca:|| ||

"Idha mayhaṁ āvuso raho-gatassa paṭīsallīnassa
evaṁ cetaso parivitakko udapādi:|| ||

'"Viññānañ-c'āyatanaṁ,||
Viññānañ-c'āyatanan" ti vuccati.|| ||

Katamaṁ nu kho Viññānañ-c'āyatanan' ti?|| ||

[267] Tassa mayhaṁ āvuso etad ahosi:|| ||

'Idha bhikkhu||
sabbaso Ākāsanañ-c'āyatanaṁ samatikkamma||
'Anantaṁ viññāṇan' ti||
Viññāṇañ-c'āyatanaṁ upasampajja viharati.|| ||

Idaṁ vuccati Viññānañ-c'āyatanan' ti.|| ||

So khv'āhaṁ āvuso||
sabbaso Ākāsanañ-c'āyatanaṁ samatikkamma||
'Anantaṁ viññāṇan' ti||
Viññāṇañ-c'āyatanaṁ upasampajja viharāmi||
tassa mayhaṁ āvuso||
iminā vihārena viharato||
Ākāsanañ-c'āyatanasahagatā saññā-mana-sikārā samud'ācaranti.|| ||

Atha kho maṁ āvuso Bhagavā iddhiyā upasaṅkamitvā etad avoca:|| ||

'Moggallāna!|| ||

Moggallāna!|| ||

Mā brāhmaṇa,||
Viññāṇañ-c'āyatanaṁ pamādo,||
viññāṇañcāyatane cittaṁ saṇṭhapehi,||
viññāṇañcāyatane cittaṁ ekodiṁ-karohi,||
viññāṇañcāyatane cittaṁ samādahā' ti.|| ||

So khv'āhaṁ āvuso||
aparena samayena||
sabbaso Ākāsanañ-c'āyatanaṁ samatikkamma||
'Anantaṁ viññāṇan' ti||
Viññāṇañ-c'āyatanaṁ upasampajja vihāsiṁ.|| ||

Yaṁ hi taṁ āvuso sammā vadamāno vadeyya:|| ||

'Satthārānuggahito sāvako mahābhiññataṁ patto' ti,|| ||

mamantaṁ sammā vadamāno vadeyya,|| ||

'Satthārānuggahito sāvako mahābhiññataṁ patto' ti" ti.|| ||