Saṁyutta Nikāya
4. Saḷāyatana Vagga
40. Moggallāna Saṁyutta

Sutta 8

N'eva-Saññā-nā-Saññ'Āyatana Suttaṁ

 

---

[268]

[1][pts][olds] Evaṁ me sutaṁ:|| ||

Ekaṁ samayaṁ āyasmā Mahā Moggallāno Sāvatthiyaṁ viharati Jetavane Anāthapiṇḍikassa ārāme.|| ||

Tatra kho āyasmā Mahā Moggallāno bhikkhū āmantesi:|| ||

"Āvuso bhikkhavo" ti.|| ||

"Āvuso" ti kho te bhikkhū āyasmato Mahā Moggallānassa paccassosuṁ.|| ||

Āyasmā Mahā Moggallāno etad avoca:|| ||

"Idha mayhaṁ āvuso raho-gatassa paṭīsallīnassa
evaṁ cetaso parivitakko udapādi:|| ||

'"N'eva-saññā-nā-saññ'āyatanaṁ,||
N'eva-saññā-nā-saññ'āyatanan" ti vuccati.|| ||

Katamaṁ nu kho N'eva-saññā-nā-saññ'āyatana' ti?|| ||

[267] Tassa mayhaṁ āvuso etad ahosi:|| ||

'Idha bhikkhu sabbaso Ākiñcaññ'āyatanaṁ samatikkamma||
N'eva-saññā-nā-saññ'āyatanaṁ upasampajja viharati.|| ||

Idaṁ vuccati n'eva saññā-nā-saññāyatanaṁ' ti.|| ||

So khv'āhaṁ āvuso||
sabbaso Ākiñcaññ'āyatanaṁ samatikkamma||
N'eva-saññā-nā-saññ'āyatanaṁ upasampajja viharāmi||
tassa mayhaṁ āvuso||
iminā vihārena viharato||
Ākiñ caññ'āyatanatana-sahagatā saññā-mana-sikārā samud'ācaranti.|| ||

Atha kho maṁ āvuso Bhagavā iddhiyā upasaṅkamitvā etad avoca:|| ||

'Moggallāna!|| ||

Moggallāna!|| ||

Mā brāhmaṇa,||
N'eva-saññā-nā-saññ'āyatanaṁ pamādo,||
N'eva-saññā-nā-saññ'āyatane cittaṁ saṇṭhapehi,||
N'eva-saññā-nā-saññ'āyatane cittaṁ ekodiṁ-karohi,||
N'eva-saññā-nā-saññ'āyatane cittaṁ samādahā' ti.|| ||

So khv'āhaṁ āvuso||
aparena samayena||
sabbaso Ākiñcaññ'āyatanaṁ samatikkamma||
N'eva-saññā-nā-saññ'āyatanaṁ upasampajja vihāsiṁ.|| ||

Yaṁ hi taṁ āvuso sammā vadamāno vadeyya:|| ||

'Satthārānuggahito sāvako mahābhiññataṁ patto' ti,|| ||

mamantaṁ sammā vadamāno vadeyya,|| ||

'Satthārānuggahito sāvako mahābhiññataṁ patto' ti" ti.|| ||