Saṃyutta Nikāya
4. Saḷāyatana Vagga
42. Gāmani Saṃyutta
Sutta 4
Hatth'Āroha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Rājagahe viharati Veḷuvane Kalandaka nivāpe.|| ||
Atha kho Hatth'āroho gāmaṇī yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho Hatth'āroho gāmaṇī Bhagavantaṃ etad avoca:|| ||
"Sutaṃ me taṃ bhante pubba-kānaṃ ācariya-pācariyānaṃ Hatth'ārohānaṃ bhāsa-mānānaṃ:|| ||
'Yo so hatth'āroho saṅgāme ussahati vāyamati,||
tam enaṃ ussahannaṃ vāyamannaṃ vāyamantaṃ pare hananti pariyāpādenti,||
so kāyassa bhedā param maraṇā sarañjitānaṃ devānaṃ saha-vyataṃ upapajjatī' ti.|| ||
Idha Bhagavā kimāhā" ti?|| ||
"Alaṃ gāmaṇī||
tiṭṭhate taṃ,||
mā maṃ etaṃ pucchi" ti.|| ||
■
Dutiyam pi kho Hatth'āroho gāmaṇī Bhagavantaṃ etad avoca:|| ||
"Sutaṃ me taṃ bhante pubba-kānaṃ ācariya-pācariyānaṃ Hatth'ārohānaṃ bhāsa-mānānaṃ:|| ||
'Yo so hatth'āroho saṅgāme ussahati vāyamati,||
tam enaṃ ussahannaṃ vāyamannaṃ vāyamantaṃ pare hananti pariyāpādenti,||
so kāyassa bhedā param maraṇā sarañjitānaṃ devānaṃ saha-vyataṃ upapajjatī' ti.|| ||
Idha Bhagavā kimāhā" ti?|| ||
"Alaṃ gāmaṇī||
tiṭṭhate taṃ,||
mā maṃ etaṃ pucchi" ti.|| ||
■
Tatiyam pikho Hatth'āroho gāmaṇī Bhagavantaṃ etad avoca:|| ||
"Sutaṃ me taṃ bhante pubba-kānaṃ ācariya-pācariyānaṃ Hatth'ārohānaṃ bhāsa-mānānaṃ:|| ||
'Yo so hatth'āroho saṅgāme ussahati vāyamati,||
tam enaṃ ussahannaṃ vāyamannaṃ vāyamantaṃ pare hananti pariyāpādenti,||
so kāyassa bhedā param maraṇā sarañjitānaṃ devānaṃ saha-vyataṃ upapajjatī' ti.|| ||
Idha Bhagavā kimāhā" ti?|| ||
"Addhā kho tyāhaṃ gāmaṇī na labhāmi|| ||
'Alaṃ gāmaṇī||
tiṭṭhate taṃ,||
mā maṃ etaṃ pucchi' ti.
Api ca tyāhaṃ vyākarissāmi.|| ||
Yo so gāmaṇi hatth'āroho saṅgāme ussahati vāyamati,||
[311] tassa taṃ cittaṃ pubbe hīnaṃ dukkaṭaṃ duppaṇihitaṃ:|| ||
'Ime sattā haññantu vā bajajhantu vā ucchijjantu vā vinassantu vā mā vā ahesuṃ iti vāti,||
tam enaṃ ussahantaṃ vāyamantaṃ pare hananti pariyāpāden' ti,||
so kāyassa bhedā param maraṇā sarañjito nāma Nirayo tatth uppajjati.|| ||
Sace kho panassa evaṃ diṭṭhi hoti:|| ||
'Yo so hatth'āroho saṅgāme ussahati vāyamati,||
tam enaṃ ussahannaṃ vāyamannaṃ vāyamantaṃ pare hananti pariyāpādenti,||
so kāyassa bhedā param maraṇā sarañjitānaṃ devānaṃ saha-vyataṃ upapajjatī' ti.|| ||
Sāssa hoti micchā-diṭṭhi,||
micchā-diṭṭhikassa kho panāhaṃ gāmaṇī purisa-puggalassa dvinnaṃ gatīnaṃ aññataraṃ gatiṃ vadāmi||
Nirayaṃ vā||
tiracchāna-yoniṃ vā" ti.|| ||
Evaṃ vutte Hatth'āroho gāmaṇī parodi,||
assūni pavattesi.|| ||
"Etaṃ kho tyāhaṃ gāmaṇī nālatthaṃ:|| ||
'Alaṃ gāmaṇī||
tiṭṭhate taṃ,||
mā maṃ etaṃ pucchi' ti" ti
"Nāhaṃ bhante etaṃ rodāmi,||
yaṃ maṃ Bhagavā evam āha,||
api c'āhaṃ bhante pubbakehi ācariya-pācariyehi hatth'ārohehi dīgha-rattaṃ nikato vañcito paraddho:|| ||
'Yo so hatth'āroho saṅgāme ussahati vāyamati,||
tam enaṃ ussahannaṃ vāyamannaṃ vāyamantaṃ pare hananti pariyāpādenti,||
so kāyassa bhedā param maraṇā sarañjitānaṃ devānaṃ saha-vyataṃ upapajjatī' ti.|| ||
Abhikkantaṃ bhante!|| ||
Abhikkantaṃ bhante!
Seyyathā pi bhante nikkujjitaṃ vā ukkujjeyya,||
paṭi-c-channaṃ vā vivareyya||
mūḷahassa vā Maggaṃ ācikkheyya,||
andha-kāre vā tela-pajjotaṃ dhāreyya||
'cakkhu-manto rūpāni dakkhinti' ti.|| ||
Evam evaṃ Bhagavatā aneka-pariyāyena Dhammo pakāsito.|| ||
Es'āhaṃ bhante Bhagavantaṃ saraṇaṃ gacchāmi||
Dhammañ ca||
bhikkhu-saṅghañ ca,||
upāsakaṃ maṃ Bhagavā dhāretu ajja-t-agge pāṇupetaṃ saraṇaṃ gatan" ti.|| ||
