Saṁyutta Nikāya
4. Saḷāyatana Vagga
42. Gāmani Saṁyutta

Sutta 5

Ass'Āroha Suttaṁ

 

---

[310]

[1][pts] Evaṁ me sutaṁ:|| ||

Ekaṁ samayaṁ Bhagavā Rājagahe viharati Veḷuvane Kalandaka nivāpe.|| ||

Atha kho Ass'āroho gāmaṇī yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho Ass'āroho gāmaṇī Bhagavantaṁ etad avoca:|| ||

"Sutaṁ me taṁ bhante pubba-kānaṁ ācariya-pācariyānaṁ ass'ārohānaṁ bhāsa-mānānaṁ:|| ||

'Yo so ass'āroho saṅgāme ussahati vāyamati,||
tam enaṁ ussahannaṁ vāyamannaṁ vāyamantaṁ pare hananti pariyāpādenti,||
so kāyassa bhedā param maraṇā sarañjitānaṁ devānaṁ saha-vyataṁ upapajjatī' ti.|| ||

Idha Bhagavā kimāhā" ti?|| ||

"Alaṁ gāmaṇī||
tiṭṭhate taṁ,||
mā maṁ etaṁ pucchi" ti.|| ||

■

Dutiyam pi kho Ass'āroho gāmaṇī Bhagavantaṁ etad avoca:|| ||

"Sutaṁ me taṁ bhante pubba-kānaṁ ācariya-pācariyānaṁ ass'ārohānaṁ bhāsa-mānānaṁ:|| ||

'Yo so ass'āroho saṅgāme ussahati vāyamati,||
tam enaṁ ussahannaṁ vāyamannaṁ vāyamantaṁ pare hananti pariyāpādenti,||
so kāyassa bhedā param maraṇā sarañjitānaṁ devānaṁ saha-vyataṁ upapajjatī' ti.|| ||

Idha Bhagavā kimāhā" ti?|| ||

"Alaṁ gāmaṇī||
tiṭṭhate taṁ,||
mā maṁ etaṁ pucchi" ti.|| ||

■

Tatiyam pi kho Ass'āroho gāmaṇī Bhagavantaṁ etad avoca:|| ||

"Sutaṁ me taṁ bhante pubba-kānaṁ ācariya-pācariyānaṁ ass'ārohānaṁ bhāsa-mānānaṁ:|| ||

'Yo so ass'āroho saṅgāme ussahati vāyamati,||
tam enaṁ ussahannaṁ vāyamannaṁ vāyamantaṁ pare hananti pariyāpādenti,||
so kāyassa bhedā param maraṇā sarañjitānaṁ devānaṁ saha-vyataṁ upapajjatī' ti.|| ||

Idha Bhagavā kimāhā" ti?|| ||

"Addhā kho tyāhaṁ gāmaṇī na labhāmi|| ||

'Alaṁ gāmaṇī||
tiṭṭhate taṁ,||
mā maṁ etaṁ pucchi' ti.

Api ca tyāhaṁ vyākarissāmi.|| ||

Yo so gāmaṇi ass'āroho saṅgāme ussahati vāyamati,||
[311] tassa taṁ cittaṁ pubbe hīnaṁ dukkaṭaṁ duppaṇihitaṁ:|| ||

'Ime sattā haññantu vā bajajhantu vā ucchijjantu vā vinassantu vā mā vā ahesuṁ iti vāti,||
tam enaṁ ussahantaṁ vāyamantaṁ pare hananti pariyāpāden' ti,||
so kāyassa bhedā param maraṇā sarañjito nāma Nirayo tatth uppajjati.|| ||

Sace kho panassa evaṁ diṭṭhi hoti:|| ||

'Yo so ass'āroho saṅgāme ussahati vāyamati,||
tam enaṁ ussahannaṁ vāyamannaṁ vāyamantaṁ pare hananti pariyāpādenti,||
so kāyassa bhedā param maraṇā sarañjitānaṁ devānaṁ saha-vyataṁ upapajjatī' ti.|| ||

Sāssa hoti micchā-diṭṭhi.|| ||

Micchā-diṭṭhikassa kho panāhaṁ gāmaṇī purisa-puggalassa dvinnaṁ gatīnaṁ aññataraṁ gatiṁ vadāmi||
Nirayaṁ vā||
tiracchāna-yoniṁ vā" ti.|| ||

Evaṁ vutte Ass'āroho gāmaṇī parodi,||
assūni pavattesi.|| ||

"Etaṁ kho tyāhaṁ gāmaṇī nālatthaṁ|| ||

'Alaṁ gāmaṇī||
tiṭṭhate taṁ,||
mā maṁ etaṁ pucchi' ti"

"Nāhaṁ bhante etaṁ rodāmi,||
yaṁ maṁ Bhagavā evam āha,||
api c'āhaṁ bhante pubbakehi ācariya-pācariyehi ass'ārohehi dīgha-rattaṁ nikato vañcito paraddho:|| ||

'Yo so ass'āroho saṅgāme ussahati vāyamati,||
tam enaṁ ussahannaṁ vāyamannaṁ vāyamantaṁ pare hananti pariyāpādenti,||
so kāyassa bhedā param maraṇā sarañjitānaṁ devānaṁ saha-vyataṁ upapajjatī' ti.|| ||

Abhikkantaṁ bhante!|| ||

Abhikkantaṁ bhante!|| ||

Seyyathā pi bhante nikkujjitaṁ vā ukkujjeyya,||
paṭi-c-channaṁ vā vivareyya||
mūḷahassa vā Maggaṁ ācikkheyya,||
andha-kāre vā tela-pajjotaṁ dhāreyya||
'cakkhu-manto rūpāni dakkhinti' ti.|| ||

Evam evaṁ Bhagavatā aneka-pariyāyena Dhammo pakāsito.|| ||

Es'āhaṁ bhante Bhagavantaṁ saraṇaṁ gacchāmi||
Dhammañ ca||
bhikkhu-saṅghañ ca,||
upāsakaṁ maṁ Bhagavā dhāretu ajja-t-agge pāṇupetaṁ saraṇaṁ gatan" ti.|| ||