Saṁyutta Nikāya
4. Saḷāyatana Vagga
42. Gāmani Saṁyutta

Sutta 9

Kula Suttaṁ

 

---

[322]

[1][pts][than][olds] Evaṁ me sutaṁ:|| ||

Ekaṁ samayaṁ Bhagavā||
Kosalesu cārikaṁ caramāno||
mahatā bhikkhu-saṅghena saddhiṁ||
yena Nālandā tad [323] avasari.|| ||

Tatra sudaṁ Bhagavā||
Nāḷandāyaṁ viharati Pāvarikam-bavane.|| ||

Tena kho pana samayena Nālandā||
dukkhhikkhā hoti||
dvihitikā||
setaṭṭhikā||
salākāvuttā.|| ||

Tena kho pana samayena Nigaṇṭho Nātaputto||
Nāḷandāyaṁ paṭivasati||
mahatiyā Nigaṇṭhaparisāya saddhiṁ.|| ||

Atha kho Asibandhaka-putto gāmanī||
Nigaṇṭha-sāvako||
yena Nigaṇṭho Nātaputto ten'upasaṅkami.|| ||

Upasaṅkamitvā Nigaṇṭhaṁ Nātaputtaṁ abhivādetvā eka-m-antaṁ nisīdi.|| ||

Eka-m-antaṁ nisinnaṁ kho Asibandhaka-puttaṁ gāmaṇīṁ Nigaṇṭho Nātaputto etad avoca:|| ||

"Ehi tvaṁ gāmaṇi,||
samaṇassa Gotamassa||
vādaṁ āropehi,||
evaṁ te kalyāṇo||
kitti-saddo||
abbhuggacchati:|| ||

'Asibandhaka-puttena gāmaṇinā||
samaṇassa Gotamassa||
evaṁ mahiddhikassa||
evaṁ mahānubhāvassa||
vādo āropito' ti."|| ||

"Kathaṁ panāhaṁ bhante||
samaṇassa Gotamassa||
evaṁ mahiddhikassa||
evaṁ mahānubhāvassa||
vādaṁ āropessāmī" ti?|| ||

"Ehi tvaṁ gāmaṇi,||
yena Samaṇo Gotamo ten'upasaṅkama||
upasaṅkamitvā samaṇaṁ Gotamaṁ||
evaṁ vadehi:|| ||

'Nanu bhante Bhagavā aneka-pariyāyena kulānaṁ||
anuddayaṁ vaṇṇeti,||
anurakkhaṁ vaṇṇeti,||
anukampaṁ vaṇṇetī' ti?|| ||

Sace te gāmaṇi Samaṇo Gotamo||
evaṁ phuṭṭho||
evaṁ vyākaroti:|| ||

'Evaṁ gāmaṇi Tathāgato aneka-pariyāyena kulānaṁ||
anuddayaṁ vaṇṇoti,||
anurakkhaṁ vaṇṇeti,||
anukampaṁ vaṇṇetī' ti||
tam enaṁ tvaṁ evaṁ vadeyyāsi:|| ||

'Atha kiñ carahi bhante Bhagavā||
dukkhhikkhe||
dvihitike||
setaṭṭhike||
salākāvutte mahatā bhikkhu-saṅghena||
saddhiṁ cārikaṁ carati||
ucchedāya Bhagavā kulānaṁ paṭipanno,||
anayāya Bhagavā kulānaṁ paṭipanno,||
upaghātāya Bhagavā kulānaṁ paṭipanno' ti.|| ||

Imaṁ kho te gāmaṇi Samaṇo Gotamo||
ubhato koṭikaṁ pañhaṁ phuṭṭho||
n'eva sakkhīti uggilituṁ||
n'eva sakkhīti ogilitun" ti.|| ||

[324] "Evaṁ bhante" ti kho Asibandhaka-putto gāmaṇi||
Nigaṇṭhassa Nātaputtassa paṭissutvā||
uṭṭhāy āsanā Nigaṇṭhaṁ Nātaputtaṁ abhivādetvā||
padakkhiṇaṁ katvā||
yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā||
eka-m-antaṁ nisīdi.|| ||

Eka-m-antaṁ nisinno kho||
Asibandhaka-putto gāmaṇi Bhagavantaṁ etad avoca:|| ||

"Nanu bhante Bhagavā aneka-pariyāyena kulānaṁ||
anuddayaṁ vaṇṇeti,||
anurakkhaṁ vaṇṇeti,||
anukampaṁ vaṇṇetī" ti?|| ||

"Evaṁ gāmaṇi Tathāgato aneka-pariyāyena kulānaṁ||
anuddayaṁ vaṇṇeti,||
anurakkhaṁ vaṇṇeti,||
anukampaṁ vaṇṇetī" ti.|| ||

"Atha kiñ carahi bhante Bhagavā||
dukkhikkhe||
dvīhitike||
setaṭṭhike,||
salākāvutte||
mahatā bhikkhu-saṅghena saddhiṁ cārikaṁ carati||
ucchedāya Bhagavā kulānaṁ paṭipanno,||
anayāya Bhagavā kulānaṁ paṭipanno,||
upaghātāya Bhagavā kulānaṁ paṭipanno" ti?|| ||

"Ito so gāmaṇi eka-navuto kappo,||
yam ahaṁ anussarāmi||
nābhijānāmi kiñci kulaṁ pakk'abhi-k-khānuppadāna-mattena upahata pubbaṁ||
atha kho yāni tāni kulāni||
aḍḍhāni maha-d-dhanāni.|| ||

Mahabhogāni||
pahūta-jāta-rūpa-rajatāni||
pahūta-citt'upakaraṇāni||
pahūta-dhana-dhaññāni.|| ||

Sabbāni tāni dāna-sambhūtāni||
c'eva sacca-sambhūtāni ca||
saññama-sambhūtāni ca.|| ||

Aṭṭha kho gāmaṇī hetu||
aṭṭha paccayāv||
kulānaṁ upaghātāya.|| ||

Rājato vā kulāni upaghātaṁ gacchanti,||
corato vā kulāni upaghātaṁ gacchanti,||
aggito vā kulāni upaghātaṁ gacchanti,||
udakato vā kulāni upaghātaṁ gacchanti,||
nihitaṁ vā nādhi gacchanti,||
duppayuttā vā kammantaṁ jahanti||
kule vā kulaṅgāro uppajjati||
yo te bhoge [325] vikirati||
vidhamati||
viddhaṁseti,||
aniccatā yeva aṭṭhamīti.|| ||

Ime kho gāmaṇi aṭṭha-hetu||
aṭṭha-paccayā||
kulānaṁ upaghātāya.|| ||

Imesu kho gāmiṇi aṭṭhasu hetusu||
aṭṭhasu paccayesu||
santesu saṁvijjamānesu yo maṁ evaṁ vadeyya:

'Ucchedāya Bhagavā kulānaṁ paṭipanno,||
anayāya Bhagavā kulānaṁ paṭipanno,||
upaghātāya Bhagavā kulānaṁ paṭipanno' ti.|| ||

Taṁ gāmaṇi vācaṁ a-p-pahāya||
taṁ cittaṁ a-p-pahāya||
taṁ diṭṭhiṁ appaṭinissajitvā||
yath'ābhataṁ nikkhitto evaṁ Niraye" ti.|| ||

Evaṁ vutte Asibandhaka-putto gāmaṇī||
Bhagavantaṁ etad avoca:|| ||

"Abhikkantaṁ bhante!|| ||

Abhikkantaṁ bhante!|| ||

Seyyathā pi bhante nikkujjitaṁ vā ukkujjeyya,||
paṭi-c-channaṁ vā vivareyya||
mūḷahassa vā Maggaṁ ācikkheyya,||
andha-kāre vā tela-pajjotaṁ dhāreyya||
'cakkhu-manto rūpāni dakkhinti' ti.|| ||

Evam evaṁ Bhagavatā aneka-pariyāyena Dhammo pakāsito.|| ||

Es'āhaṁ bhante Bhagavantaṁ saraṇaṁ gacchāmi||
Dhammañ ca||
bhikkhu-saṅghañ ca,||
upāsakaṁ maṁ Bhagavā dhāretu ajja-t-agge pāṇupetaṁ saraṇaṁ gatan" ti.|| ||