Saṁyutta Nikāya
4. Saḷāyatana Vagga
42. Gāmani Saṁyutta

Sutta 10

Manicūḷaka Suttaṁ

 

---

[325]

[1][pts][than][olds] Evaṁ me sutaṁ:|| ||

Ekaṁ samayaṁ Bhagavā Rājagahe viharati||
Veḷuvane Kalandakanivāpe.|| ||

Tena kho pana samayena||
rājantepure||
rājaparisāyaṁ||
sanni-sinnānaṁ||
sanni-patitānaṁ||
ayam antarā kathā udapādi:|| ||

"Kappati samaṇānaṁ Sakya-puttiyānaṁ jāta-rūpa-rajataṁ.|| ||

Sādiyanti samaṇā Sakya-puttiyā jāta-rūpa-rajataṁ.|| ||

Patigaṇhanti samaṇā Sakya-puttiyā jāta-rūpa-rajatan" ti.|| ||

Tena kho pana samayena Manicūḷako gāmaṇī tassaṁ parisāyaṁ nisinno hoti.|| ||

Atha kho Manicūḷako gāmaṇī taṁ parisaṁ etad avoca:|| ||

"Mā ayyā evaṁ avacuttha!.|| ||

Na kappati samaṇānaṁ Sakya-puttiyānaṁ jāta-rūpa-rajataṁ.|| ||

Na sādiyanti samaṇā Sakya-puttiyā jāta-rūpa-rajataṁ.|| ||

Na patigaṇhanti samaṇā Sakya-puttiyā jāta-rūpa-rajataṁ.|| ||

Nikkhittamaṇi-suvaṇṇā samaṇā Sakya-puttiyā apetajāta-rūpa-rajatā" ti.|| ||

Asakkhi kho Manicūḷako gāmaṇi taṁ parisaṁ saññapetuṁ.|| ||

Atha kho Manicūḷako gāmaṇi yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

[326] Eka-m-antaṁ nisinno kho Manicūḷako gāmaṇi Bhagavantaṁ etad avoca:|| ||

"Idha bhante rājantepure||
rājaparisāyaṁ||
sanni-sinnānaṁ||
sanni-patinānaṁ||
ayam antarā kathā udapādi:|| ||

'Kappati samaṇānaṁ Sakya-puttiyānaṁ jāta-rūpa-rajataṁ,||
sādiyanti samaṇā sākya-puttiyā jāta-rūpa-rajataṁ,||
patigaṇhanti samaṇā Sakya-puttiyā jāta-rūpa-rajatan' ti.|| ||

Evaṁ vuttāhaṁ bhante taṁ parisaṁ etad avoca:|| ||

'Mā ayyā evaṁ avacuttha,||
na kappati samaṇānaṁ Sakya-puttiyānaṁ jāta-rūpa-rajataṁ,||
na sādiyanti samaṇā Sakya-puttiyā jāta-rūpa-rajataṁ,||
na patigaṇhanti samaṇā Sakya-puttiyā jāta-rūpa-rajataṁ,||
nikkhittamaṇi-suvaṇṇā samaṇā Sakya-puttiyā apetajāta-rūpa-rajatā' ti.|| ||

Asakkhiṁ kho haṁ taṁ bhante parisaṁ saññapetuṁ.|| ||

Kacc'āhaṁ bhante evaṁ vyākaramāno vuttavādī c'eva Bhagavato homi.|| ||

Na ca Bhagavantaṁ abhūtena abbh'ācikkhāmi,||
Dhammassa c'ānudhammaṁ vyākaromi,||
na ca koci saha dhammiko vādānupāto gārayhaṁ ṭhānaṁ āga-c-chatī" ti.|| ||

"Taggha tvaṁ gāmaṇi||
evaṁ vyākaramāno vuttavādī c'eva me hosi,||
na ca maṁ abhūtena abbh'ācikkhasi,||
Dhammassa c'ānudhammaṁ vyākarosi,||
na ca koci saha-dhammiko vādānupāto gārayhaṁ ṭhānaṁ āgacchati.|| ||

Na hi kappati gāmaṇi samaṇānaṁ Sakya-puttiyānaṁ jāta-rūpa-rajataṁ,||
na sādiyanti samaṇā Sakya-puttiyā jāta-rūpa-rajataṁ,||
na patigaṇhanti samaṇā Sakya-puttiyā jāta-rūpa-rajataṁ,||
nikkhitta maṇisuvaṇṇā samaṇā sākya-puttiyā apetajāta-rūpa-rajatā.|| ||

Yassa kho gāmaṇi jāta-rūpa-rajataṁ kappati,||
pañca pi tassa kāma-guṇā kappanti.|| ||

Yassa pañcakāma-guṇā kappanti,||
ekaṁsenetaṁ gāmaṇi dhāreyyāsi:||
'Assamaṇa-dhammo||
asakkiya-puttiya-dhammo' ti.|| ||

Api c'āhaṁ gāmaṇi evaṁ vadāmi:

Tiṇaṁ tiṇatthikena pariyesitabbaṁ,||
dāruṁ dārutthikena pariyesitabbaṁ,||
sakaṭaṁ sakaṭatthikena pariyesitabbaṁ||
puriso purisatthikena [327] pariyesitabbo.|| ||

Natvevāhaṁ gāmaṇi kenaci pariyāyena||
jāta-rūpa-rajataṁ sāditabbaṁ pariyesitabbanti vadāmī" ti.|| ||