Ānanda (or Atthatta) Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][than][bodh] Evaṃ me sutaṃ:|| ||

Atha kho Vacchagotto paribbājako yena Bhagavā ten'upasaṅkami.|| ||

Upasaṅkamitvā Bhagavatā saddhiṃ sammodi.|| ||

Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||

Eka-m-antaṃ nisinno kho Vacchagotto paribbājako Bhagavantaṃ etad avoca:|| ||

"Kiṃ nu kho bho Gotama, atthattā ti?|| ||

Evaṃ vutte Bhagavā tuṇhi ahosi.|| ||

"Kim pana bho Gotama, natthattā" ti?|| ||

Dutiyam pi kho Bhagavā tuṇhi ahosi.|| ||

Atha kho Vacchagotto paribbājako uṭṭhāy āsanā pakkāmi.|| ||

Atha kho āyasmā Ānando||
acira-pakkante Vacchagotte paribbājake Bhagavantaṃ etad avoca:|| ||

"Kiṃ nu kho bhante Bhagavā Vacchagottassa paribbājakassa||
pañhaṃ puṭṭho na vyākāsī" ti?|| ||

"Ahañ ca Ānanda Vacchagottassa paribbājakassa|| ||

'Atthattā' ti?|| ||

puṭṭho samāno|| ||

'Atthattā' ti|| ||

vyākareyyaṃ,||
ye te Ānanda samaṇa-brāhmaṇā sassata-vādā,||
tesame taṃ laddhi abhavissa.|| ||

Ahañ ca Ānanda Vacchagottassa paribbājakassa|| ||

'Natthattā' ti?|| ||

puṭṭho samāno|| ||

'Natthattā' ti|| ||

vyākareyyaṃ||
ye te Ānanda [401] samaṇa-brāhmaṇā uccheda-vādā,||
tesame taṃ laddhi abhavissa.|| ||

Ahañ ca Ānanda, Vacchagottassa paribbājakassa|| ||

'Atthattā' ti?|| ||

puṭṭho samāno|| ||

'Atthattā' ti|| ||

vyākareyyaṃ,||
apinu me taṃ Ānanda,||
anulomaṃ abhavissa ñāṇassa uppādāya|| ||

'Sabbe dhammā anattā' ti" ti?|| ||

"No h'etaṃ bhante."|| ||

"Ahañ ca Ānanda Vacchagottassa paribbājakassa|| ||

'Natthattā' ti?|| ||

puṭṭho samāno|| ||

'Natthattā' ti|| ||

vyākareyyaṃ,||
sammūḷhassa Ānanda,||
Vacchagottassa paribbājakassa bhiyyo sammohāya abhavissa:|| ||

'Ahu vā me nūna pubbe attā,||
so etarahi n'atthī' ti.|| ||