Avijjā Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][than][bodh] Evam me sutaṁ:|| ||

Ekaṁ samayam Bhagavā Sāvatthiyaṁ viharati Jetavane Anāthapindikassa ārāme.|| ||

Tatra kho Bhagavā bhikkhū āmantesi:||
"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Avijjā bhikkhave pubbaṅgamā||
akusalānaṁ dhammānaṁ samāpattiyā||
anu-d-eva ahirikaṁ anottappaṁ.

Avijjā-gatassa bhikkhave aviddasuno||
micchā-diṭṭhi pahoti.|| ||

Micchā-diṭṭhissa micchā-saṅkappo pahoti.|| ||

Micchā-saṅkappassa micchā-vācā pahoti.|| ||

Micchā-vācassa micchā-kammanto pahoti.|| ||

Micchā-kammantassa micchā-ājīvo pahoti.|| ||

Micchā-ājīvassa micchā-vāyāmo pahoti.|| ||

Micchā-vāyāmassa micchā-sati pahoti.|| ||

Micchā-satissa micchā-samādhi pahoti.|| ||

Vijjā ca kho bhikkhave pubbaṅgamā kusalānaṁ dhammānaṁ samāpattiyā anu-d-eva hir'ottappaṁ.|| ||

Vijjāgatassa [2] bhikkhave viddasuno sammā-diṭṭhi pahoti.|| ||

Sammā-diṭṭhissa sammā-saṅkappo pahoti.|| ||

Sammā-saṅkappassa sammā-vācā pahoti.|| ||

Sammā-vācassa sammā-kammanto pahoti.|| ||

Sammā-kammantassa sammā-ājīvo pahoti.|| ||

Sammā-ājīvassa sammā-vāyāmo pahoti.|| ||

Sammā-vāyāmassa sammā-sati pahoti.|| ||

Sammā-satissa sammā-samādhi pahotī" ti.|| ||