Saṃyutta Nikāya
5. Mahā-Vagga
45. Magga Saṃyutta
1. Avijjā Vagga
Sutta 2
Upaḍḍha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than][bodh] Evam me sutaṃ:|| ||
Ekaṃ samayam Bhagavā Sakkesu viharati,||
nāgarakaṃ nāma Sakkānaṃ nigamo.|| ||
2. Atha kho āyasmā Ānando yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho āyasmā Ānando Bhagavantaṃ etad avoca:|| ||
"Upaḍḍham idaṃ bhanate, Brahma-cariyassa||
yad idaṃ kalyāṇa-mittatā||
kalyāṇa-sahāyatā||
kalyāṇa-sampavaṇkatā" ti.|| ||
3. "Mā h'evaṃ Ānanda, mā h'evaṃ Ānanda.|| ||
Sakalam ev'idaṃ Ānanda, Brahma-cariyaṃ||
yad idaṃ kalyāṇa-mittatā||
kalyāṇa-sahāyatā||
kalyāṇa-sampavaṇkatā.|| ||
Kalyāṇa-mittass'etaṃ Ānanda,||
bhikkhuno pāṭikaṇkhaṃ||
kalyāṇa-sahāyassa||
kalyāṇa-sampavaṇkassa||
ariyaṃ aṭṭhaṇgikaṃ Maggaṃ bhāvessati||
ariyaṃ aṭṭhaṇgikaṃ Maggaṃ bahulī-karissati.|| ||
4. Kathañ c'Ānanda, bhikkhu kalyāṇa-mitto||
kalyāṇa-sahāyo||
kalyāṇa-sampavaṇko||
ariyaṃ aṭṭhaṇgikaṃ Maggaṃ bhāveti,||
ariyaṃ aṭṭhaṇgikaṃ Maggaṃ bahulī-karoti?|| ||
Idh'Ānanda, bhikkhu||
sammā-diṭṭhiṃ bhāveti||
viveka-nissitaṃ||
virāga-nissitaṃ||
nirodha-nissitaṃ vossagga-pariṇāmiṃ||
sammā-saṇkappaṃ bhāveti||
viveka-nissitaṃ||
virāga-nissitaṃ||
nirodha-nissitaṃ vossagga-pariṇāmiṃ,||
sammā-vācaṃ bhāveti||
viveka-nissitaṃ||
virāga-nissitaṃ||
nirodha-nissitaṃ vossagga-pariṇāmiṃ,||
sammā-kammantaṃ bhāveti||
viveka-nissitaṃ||
virāga-nissitaṃ||
nirodha-nissitaṃ vossagga-pariṇāmiṃ,||
sammā-ājīvaṃ bhāveti||
viveka-nissitaṃ||
virāga-nissitaṃ||
nirodha-nissitaṃ vossagga-pariṇāmiṃ,||
sammā-vāyāmaṃ bhāveti||
viveka-nissitaṃ||
virāga-nissitaṃ||
nirodha-nissitaṃ vossagga-pariṇāmiṃ,||
sammā-satiṃ bhāveti||
viveka-nissitaṃ||
virāga-nissitaṃ||
nirodha-nissitaṃ vossagga-pariṇāmiṃ,||
sammā-samādhiṃ bhāveti||
viveka-nissitaṃ||
virāga-nissitaṃ||
nirodha-nissitaṃ vossagga-pariṇāmiṃ.|| ||
Evaṃ kho Ānanda, bhikkhu kalyāṇa-mitto kalyāṇa-sahāyo||
kalyāṇa sampaṇko||
ariyaṃ aṭṭhaṇgikaṃ Maggaṃ bhāveti||
ariyaṃ aṭṭhaṇgikaṃ Maggaṃ bahulī-karoti.|| ||
[3] Tad aminā p'etaṃ Ānanda, pariyāyena veditabbaṃ.|| ||
Yathā sakalam ev'idaṃ Brahma-cariyaṃ||
yad idaṃ kalyāṇa-mittatā||
kalyāṇa-sahāyatā||
kalyāṇa-sampavaṇkatā.|| ||
Mamaṃ hi Ānanda, kalyāṇa-mittaṃ āgamma||
jāti-dhammā sattā jātiyā parimuccanti,||
jarā-dhammā sattā jarāya parimuccanti.|| ||
Maraṇa-dhammā sattā maraṇena parivuccanti,||
soka-parideva-dukkha-domanass'upāyā-sadhammā sattā soka-parideva-dukkha-domanass'upayāsehi parimuccanti.|| ||
Iminā kho etaṃ Ānanda, pariyāyena veditabbaṃ.|| ||
Yathā sakalam ev'idaṃ Brahma-cariyaṃ||
yad idaṃ kalyāṇa-mittatā||
kalyāṇa-sahāyatā||
kalyāṇa-sampavaṇkatā" ti.|| ||
