Saṃyutta Nikāya
5. Mahā-Vagga
45. Magga Saṃyutta
1. Avijjā Vagga
Sutta 9
Sūka Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evam me sutaṃ:|| ||
Ekaṃ samayam Bhagavā Sāvatthiyaṃ viharati Jetavane Anāthapindikassa ārāme.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Seyyathā pi bhikkhave, sālisūkaṃ vā||
yava-sūkaṃ vā micchā-paṇihitaṃ||
hatthena vā||
pādena vā akkantaṃ||
hatthaṃ vā||
pādaṃ vā bhindissati||
lohitaṃ vā uppādessati||
iti n'etaṃ ṭhānaṃ vijjati.|| ||
Taṃ kissa hetu?|| ||
Micchā-paṇihitattā bhikkhave, sūkassa.|| ||
■
Evam eva kho bhikkhave, so vata bhikkhu micchā-paṇihitāya diṭṭhiyā||
micchā-paṇihitāya Magga-bhāvanāya||
avijjaṃ bhecchati||
vijjaṃ uppādessati||
Nibbānaṃ sacchi-karissati||
iti n'etaṃ ṭhānaṃ vijjati.|| ||
Taṃ kissa hetu?|| ||
Micchā-paṇihitattā bhikkhave, diṭṭhiyā.|| ||
■
Seyyathā pi bhikkhave, sālisūkaṃ vā yavasūkaṃ vā sammā-paṇihitaṃ,||
hatthena vā pādena vā akkantaṃ hatthaṃ vā pādaṃ vā bheindissati lohitaṃ vā uppādessati||
iti ṭhānam etaṃ vijjati.|| ||
Taṃ kissa hetu?|| ||
Sammā-paṇihitattā bhikkhave, [11] sūkassa.|| ||
■
Evam eva kho bhikkhave, so vata bhikkhu sammā-paṇihitāya diṭṭhiyā||
sammā-paṇihitāya Magga-bhāvanāya||
avijjaṃ bhindissati||
vijjaṃ uppādessati||
Nibbānaṃ sacchi-karissati||
iti ṭhāname taṃ vijjati.|| ||
Taṃ kissa hetu?|| ||
Sammā-paṇihitattā bhikkhave, diṭṭhiyā.|| ||
§
Kathañ ca bhikkhave, bhikkhu sammā-paṇihitāya diṭṭhiyā||
sammā-paṇihitāya Magga-bhāvanāya||
avijjaṃ bhindati||
vijjaṃ uppādeti||
Nibbānaṃ sacchi-karoti?|| ||
Idha bhikkhave, bhikkhu sammā-diṭṭhiṃ bhāveti||
viveka-nissataṃ||
virāga-nissitaṃ||
nirodha-nissitaṃ||
vossagga-pariṇāmiṃ;|| ||
sammā-saṇkappaṃ bhāveti||
viveka-nissataṃ||
virāga-nissitaṃ||
nirodha-nissitaṃ||
vossagga-pariṇāmiṃ;|| ||
sammā-vācaṃ bhāveti||
viveka-nissataṃ||
virāga-nissitaṃ||
nirodha-nissitaṃ||
vossagga-pariṇāmiṃ;|| ||
sammā-kammantaṃ bhāveti||
viveka-nissataṃ||
virāga-nissitaṃ||
nirodha-nissitaṃ||
vossagga-pariṇāmiṃ;|| ||
sammā-ājīvaṃ bhāveti||
viveka-nissataṃ||
virāga-nissitaṃ||
nirodha-nissitaṃ||
vossagga-pariṇāmiṃ;|| ||
sammā-vāyāmaṃ bhāveti||
viveka-nissataṃ||
virāga-nissitaṃ||
nirodha-nissitaṃ||
vossagga-pariṇāmiṃ;|| ||
sammā-satiṃ bhāveti||
viveka-nissataṃ||
virāga-nissitaṃ||
nirodha-nissitaṃ||
vossagga-pariṇāmiṃ;|| ||
sammā-samādhiṃ bhāveti||
viveka-nissataṃ||
virāga-nissitaṃ||
nirodha-nissitaṃ||
vossagga-pariṇāmiṃ.|| ||
Evaṃ ce so bhikkhave, bhikkhu sammā-paṇihitāya diṭṭhiyā||
sammā-paṇihitāya Magga-bhāvanāya||
avijjaṃ bhindati||
vijjaṃ uppādeti||
Nibbānaṃ sacchi-karotī" ti.|| ||
