Saṃyutta Nikāya
5. Mahā-Vagga
45. Magga Saṃyutta
2. Vihāra Vagga
Sutta 20
Tatiya Kukkuṭ'Ārāma Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evam me sutaṃ:|| ||
Ekaṃ samayaṃ āyasmā ca Ānando āyasmā ca Bhaddo Pāṭaliputte viharanti Kukkuṭ'ārāme.|| ||
Atha kho āyasmā Bhaddo sāyanha-samayaṃ paṭisallāṇā vuṭṭhito yen'āyasmā Ānando ten'upasaṅkami.|| ||
Upasaṅkamitvā āyasmatā Ānandena saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
Eka-m-antaṃ nisinno kho āyasmā bhaddo āyasmantaṃ Ānandaṃ etad avoca:|| ||
"'Brahma-cariyaṃ Brahma-cariyan'||
ti āvuso Ānanda, vuccati.|| ||
Katamaṃ nu kho āvuso Brahma-cariyan?|| ||
Katamo brahma-cārī?|| ||
Katamaṃ Brahma-cariya-pariyosānan" ti?|| ||
[17]"Sādhu sādhu āvuso Bhadda,||
bhaddako te āvuso Bhadda ummaggo,||
bhaddakaṃ paṭibhānaṃ,||
kalyāṇī paripucchā||
evaṃ hi tvaṃ āvuso Bhadda, pucchasi:|| ||
'"Brahma-cariyaṃ Brahma-cariyan" ti āvuso Ānanda vuccati.|| ||
Katamaṃ nu kho āvuso Brahma-cariyan?|| ||
Katamo brahma-cārī?|| ||
Katamaṃ Brahma-cariya-pariyosānan?'" ti?|| ||
"Evam āvuso" ti.|| ||
"Ayam eva kho āvuso Ariyo Aṭṭhaṅgiko Maggo brahma-cariyaṃ.|| ||
Seyyath'īdaṃ:|| ||
Sammā-diṭṭhi,||
sammā-saṅkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhī|| ||
Yo kho āvuso iminā ariyena aṭṭhaṅgikena maggena samannāgato||
ayaṃ vuccati brahma-cārī.|| ||
Yo kho āvuso rāga-k-khayo||
dosa-k-khayo||
moha-k-khayo||
idaṃ brahma-cariyo-pariyosānan" ti.|| ||
