Sutta 46

Vijjā-Vimutti Suttaṁ

[28]

[1][pts][bodh] Evam me sutaṁ:|| ||

Ekaṁ samayam Bhagavā Sāvatthiyaṁ viharati.|| ||

Atha kho sambahulā bhikkhū yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ nisīdiṁsu.|| ||

Eka-m-antaṁ nisinne kho te bhikkhū Bhagavā etad avoca:|| ||

"Sace vo bhikkhave, añña-titthiyā paribbājakā evaṁ puccheyyuṁ:|| ||

'Kim atthiyaṁ āvuso, samaṇe Gotame Brahma-cariyaṁ vussatī' ti?|| ||

Evaṁ puṭṭhā tumhe bhikkhave, tesaṇ||
añña-titthiyānaṁ paribbājakānaṁ evaṁ vyākareyyātha.|| ||

'Vijjā-vimutti-phala-sacchi-kiriyatthaṁ kho āvuso Bhagavati Brahma-cariyaṁ vussatī' ti.|| ||

■

Sace pana vo bhikkhave, añña-titthiyā paribbājakā evaṁ puccheyyuṁ:|| ||

"Atthi pan'āvuso Maggo||
atthi paṭipadā vijjā-vimutti-phala-sacchi-kiriyāyā' ti?|| ||

Evaṁ puṭṭhā tumhe bhikkhave, tesaṇ||
añña-titthiyānaṁ paribbājakānaṁ evaṁ vyākareyyātha:|| ||

'Atthi kho āvuso Maggo||
atthi paṭipadā vijjā-vimutti-phala-sacchi-kiriyāyā' ti.|| ||

Katamo ca bhikkhave, Maggo||
katamo ca paṭipadā vijjā-vimutti-phala-sacchi-kiriyāyā?|| ||

Ayam-eva Ariyo Aṭṭhaṅgiko Maggo.|| ||

Seyyath'īdaṁ:|| ||

Sammā-diṭṭhi,||
samā-saṅkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Ayaṁ bhikkhave, Maggo||
ayaṁ paṭipadā vijjā-vimutti-phala-sacchi-kiriyāyā ti.|| ||

Evaṁ puṭṭhā tumhe bhikkhave, tesaṇ||
añña-titthiyānaṁ paribbājakānaṁ evaṁ vyākareyyāthā" ti.|| ||