Saṃyutta Nikāya
5. Mahā-Vagga
45. Magga Saṃyutta
4. Paṭipatti Vagga: Suriyassa Peyyāla
2. Rāga-Vinaya-Nissitaṃ
Sutta 59
Atta Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][olds][bodh] Sāvatthi nidānaṃ.|| ||
Suriyassa bhikkhave, udayato||
etaṃ pubbaṅ-gamaṃ||
etaṃ pubba-nimittaṃ||
yad idaṃ aruṇaggaṃ;||
evam eva kho, bhikkhave,||
bhikkhuno ariyassa aṭṭhaṅgikassa Maggassa uppādāya||
etaṃ pubbaṅ-gamaṃ||
etaṃ pubba-nimittaṃ||
yad idaṃ atta-sampadā.|| ||
Atta-sampannassetaṃ bhikkhave bhikkhuno pāṭikaṅkhaṃ||
ariyaṃ aṭṭhaṅgikaṃ Maggaṃ bhāvessati||
ariyaṃ aṭṭhaṅgikaṃ Maggaṃ bahulī-karissati.|| ||
Kathañ ca bhikkhave, bhikkhu atta-sampanno||
ariyaṃ aṭṭhaṅgikaṃ Maggaṃ bhāveti||
ariyaṃ aṭṭhaṅgikaṃ Maggaṃ bahulī-karoti?|| ||
Idha bhikkhave, bhikkhu sammā-diṭṭhiṃ bhāveti||
rāga-vinaya-pariyosānaṃ||
dosa-vinaya-pariyosānaṃ||
moha-vinaya-pariyosānaṃ.|| ||
Sammā-saṅkappaṃ bhāveti||
rāga-vinaya-pariyosānaṃ||
dosa-vinaya-pariyosānaṃ||
moha-vinaya-pariyosānaṃ.|| ||
Sammā-vācaṃ bhāveti||
rāga-vinaya-pariyosānaṃ||
dosa-vinaya-pariyosānaṃ||
moha-vinaya-pariyosānaṃ.|| ||
Ssammā-kammantaṃ bhāveti||
rāga-vinaya-pariyosānaṃ||
dosa-vinaya-pariyosānaṃ||
moha-vinaya-pariyosānaṃ.|| ||
Sammā ājīvaṃ bhāveti||
rāga-vinaya-pariyosānaṃ||
dosa-vinaya-pariyosānaṃ||
moha-vinaya-pariyosānaṃ.|| ||
Sammā-vāyāmaṃ bhāveti||
rāga-vinaya-pariyosānaṃ||
dosa-vinaya-pariyosānaṃ||
moha-vinaya-pariyosānaṃ.|| ||
Sammā-satiṃ bhāveti||
rāga-vinaya-pariyosānaṃ||
dosa-vinaya-pariyosānaṃ||
moha-vinaya-pariyosānaṃ.|| ||
Sammā-samādhiṃ bhāveti||
rāga-vinaya-pariyosānaṃ||
dosa-vinaya-pariyosānaṃ||
moha-vinaya-pariyosānaṃ.|| ||
Evaṃ kho bhikkhave, bhikkhu atta-sampanno||
ariyaṃ aṭṭhaṅgikaṃ Maggaṃ bhāveti,||
ariyaṃ aṭṭhaṅgikaṃ Maggaṃ bahulī-karotī" ti.|| ||
