Saṁyutta Nikāya
5. Mahā-Vagga
46. Bojjhaṅga Saṁyutta
1. Pabbata Vagga

Sutta 3

Sīla Suttaṁ

 

---

[67]

[1][pts][olds][bodh][than] Evam me sutaṁ:|| ||

Ekaṁ samayam Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Ye te bhikkhave bhikkhu sīla-sampannā||
samādhi-sampannā||
paññā-sampannā||
vimutti-sampannā||
vimutti-ñāṇa-dassana-sampannā|| ||

Dassanam pāham bhikkhave,||
tesaṁ bhikkhūnaṁ bahukāraṁ vadāmi.|| ||

3. Savanam pāham bhikkhave,||
tesaṁ bhikkhūnaṁ bahukāraṁ vadāmi.|| ||

Upasaṅkamanam pāham bhikkhave,||
tesaṁ bhikkhūnaṁ bahukāraṁ vadāmi.|| ||

Payirupāsanam pāham bhikkhave,||
tesaṁ bhikkhūnaṁ bahukāraṁ vadāmi.|| ||

Anussatim pāham bhikkhave,||
tesaṁ bhīkkhūnaṁ bahukāraṁ vadāmi.|| ||

Anupabbajjam pāham bhikkhave,||
tesaṁ bhikkhūnaṁ bahukāraṁ vadāmi.|| ||

4. Taṁ kissa hetu?|| ||

Tathārūpānam bhikkhave||
bhikkhūnaṁ dhammaṁ sutvā||
dvayena vūpakāsena vūpakaṭṭho viharati||
kāya-vūpakāsena ca||
citta-vūpakāsena ca.|| ||

So tathā vūpakaṭṭho viharanto taṁ dhammaṁ anussarati anuvitakketi.|| ||

5. Yasmiṁ samaye bhikkhave,||
bhikkhu tathā vūpakaṭṭho viharanto taṁ dhammaṁ anussarati anuvitakketi [68] sati-sambojjh'aṅgo tasmiṁ samaye tassa bhikkhuno āraddho hoti.|| ||

Sati-sambojjh'aṅgaṁ yasmiṁ samaye bhikkhu bhāveti,||
sati-sambojjh'aṅgo tasmiṁ samaye bhikkhuno bhāvanā pāripūriṁ gacchati.|| ||

So tathā sato viharanto taṁ dhammaṁ paññāya pavicinati pavicarati parivīmaṁsam āpajjati.|| ||

6. Yasmiṁ samaye bhikkhave,||
bhikkhu tathā sato viharanto taṁ dhammaṁ paññāya pavicinati pavicarati parivīmaṁsam āpajjati,||
dhamma-vicaya-sambojjh'aṅgo tasmiṁ samaye tassa bhikkhuno āraddho hoti.|| ||

Dhamma-vicaya-sambojjh'aṅgaṁ yasmiṁ samaye bhikkhu bhāveti,||
dhamma-vicaya-sambojjh'aṅgo tasmiṁ samaye bhikkhuno bhāvanā pāripūriṁ gacchati.|| ||

Tassa taṁ dhammaṁ paññāya pavicinato pavicarato parivīmaṁsam āpajjato āraddhaṁ hoti viriyaṁ asallīnaṁ.|| ||

7. Yasmiṁ samaye bhikkhave,||
bhikkhuno taṁ dhammaṁ paññāya pavicinato pavicarato parivīmaṁsam āpajjato āraddhaṁ hoti viriyaṁ asallīṇaṁ,||
viriya-sambojjh'aṅgo tasmiṁ samaye bhikkhuno āraddho hoti.|| ||

Viriya-sambojjh'aṅgaṁ yasmiṁ samaye bhikkhu bhāveti,||
viriya-sambojjh'aṅgo tasmiṁ samaye bhikkhuno bhāvanā pāripūriṁ gacchati.|| ||

Āraddha-viriyassa uppajjati pīti nirāmisā.|| ||

8. Yasmiṁ samaye bhikkhave,||
bhikkhuno āraddha-viriyassa uppajjati pīti nirāmisā,||
pīti-sambojjh'aṅgo tasmiṁ samaye bhikkhuno āraddho hoti.|| ||

Pīti-sambojjh'aṅgaṁ yasmiṁ samaye bhikkhu bhāveti,||
pīti-sambojjh'aṅgo tasmiṁ samaye bhikkhuno bhāvanā pāripūriṁ gacchati.|| ||

Pīti-manassa kāyo pi passambhati cittam pi passambhati.|| ||

9. Yasmiṁ samaye bhikkhave,||
bhikkhuno pīti-manassa kāyo pi passambhati cittam pi passambhati,||
passaddhi-sambojjh'aṅgo tasmiṁ samaye bhikkhuno āraddho hoti.|| ||

Passaddhi-sambojjh'aṅgaṁ yasmiṁ samaye bhikkhu bhāveti,||
passaddhi-sambojjh'aṅgo tasmiṁ samaye bhikkhuno bhāvanā [69] pāripūriṁ gacchati.|| ||

Pa-s-saddha-kāyassa sukhaṁ hoti.|| ||

Sukhino cittaṁ samādhiyati.|| ||

10. Yasmiṁ samaye bhikkhave,||
bhikkhuno passaddha-kāyassa sukhino cittaṁ samādhiyati,||
samādhi-sambojjh'aṅgo tasmiṁ samaye bhikkhuno āraddho hoti.|| ||

Samādhi-sambojjh'aṅgaṁ yasmiṁ samaye bhikkhu bhāveti,||
samādhi-sambojjh'aṅgo tasmiṁ samaye bhikkhuno bhāvanā pāripūriṁ gacchati.|| ||

So tathā samāhitaṁ cittaṁ sādhukaṁ ajjh'upekkhitā hoti.|| ||

11. Yasmiṁ samaye bhikkhave,||
bhikkhu tathā samāhitaṁ cittaṁ sādhukaṁ ajjh'upekkhitā hoti||
upekhā-sambojjh'aṅgo tasmiṁ samaye bhikkhuno āraddho hoti.|| ||

Upekhā-sambojjh'aṅgaṁ yasmiṁ samaye bhikkhu bhāveti,||
upekhā-sambojjh'aṅgo tasmiṁ samaye bhikkhuno bhāvanā pāripūriṁ gacchati.|| ||

12. Evaṁ bhāvitesu kho bhikkhave sattasu bojjh'aṅgesu||
evaṁ bahulī-katesu||
satta phalā satt'ānisaṁsā pāṭikaṅkhā.|| ||

Katame satta phalā satt'ānisaṁsā?|| ||

13. Diṭṭhe'va dhamme paṭihacca aññaṁ ārādheti.|| ||

14. No ce diṭṭhe'va dhamme paṭihacca aññaṁ ārādheti,||
atha maraṇa-kāle aññaṁ ārādheti.|| ||

15. No ce diṭṭhe'va dhamme paṭihacca aññaṁ ārādheti,||
no ce maraṇa-kāle aññaṁ ārādheti,||
atha pañcannaṁ oram-bhāgiyānaṁ saṁyojanānaṁ parikkhayā antarā-parinibbāyī hoti.|| ||

16. No ce diṭṭhe'va dhamme paṭihacca aññaṁ ārādheti,||
no ce maraṇa-kāle aññaṁ ārādheti,||
no ce pañcannaṁ oram-bhāgiyānaṁ saṁyojanānaṁ parikkhayā antarā-parinibbāyī hoti,||
atha pañcannaṁ oram-bhāgiyānaṁ saṁyojanānaṁ parikkhayā upahacca parinibbāyī hoti.|| ||

17. No ce diṭṭhe'va dhamme paṭihacca aññaṁ ārādheti,||
no ce maraṇa-kāle aññaṁ ārādheti,||
no ce pañcannaṁ [70] oram-bhāgiyānaṁ saṁyojanānaṁ parikkhayā antarā-parinibbāyī hoti,||
no ce pañcannaṁ oram-bhāgiyānaṁ saṁyojanānaṁ parikkhayā upahacca parinibbāyī hoti,||
atha pañcannaṁ oram-bhāgiyānaṁ saṁyojanānaṁ parikkhayā a-saṅkhāra-parinibbāyī hoti.|| ||

18. No ce diṭṭhe'va dhamme paṭihacca aññaṁ ārādheti,||
no ce maraṇa-kāle aññaṁ ārādheti,||
no ce pañcannaṁ oram-bhāgiyānaṁ saṁyojanānaṁ parikkhayā antarā parinibbāyī hoti,||
no ce pañcannaṁ oram-bhāgiyānaṁ saṁyojanānaṁ parikkhayā upahacca parinibbāyī hoti,||
no ce pañcannaṁ oram-bhāgiyānaṁ saṁyojanānaṁ parikkhayā a-saṅkhāra-parinibbāyī hoti,||
atha pañcannaṁ oram-bhāgiyānaṁ saṁyojanānaṁ parikkhayā sa-saṅkhāra-parinibbāyī hoti.|| ||

19. No ce diṭṭhe'va dhamme paṭihacca aññaṁ ārādheti,||
no ce maraṇa-kāle aññaṁ ārādheti,||
no ce pañcannaṁ oram-bhāgiyānaṁ saṁyojanānaṁ parikkhayā antarā parinibbāyī hoti,||
no ce pañcannaṁ oram-bhāgiyānaṁ saṁyojanānaṁ parikkhayā upahacca parinibbāyī hoti,||
no ce pañcannaṁ oram-bhāgiyānaṁ saṁyojanānaṁ parikkhayā a-saṅkhāra parinibbāyī hoti,||
no ce pañcannaṁ oram-bhāgiyānaṁ saṁyojanānaṁ parikkhayā sa-saṅkhāra parinibbāyī hoti,||
atha pañcannaṁ oram-bhāgiyānaṁ saṁyojanānaṁ parikkhayā uddhaṁ-soto hoti Akaniṭṭha-gāmī.|| ||

20. Evaṁ bhāvitesu kho bhikkhave,||
sattasu bojjh'aṅgesu evaṁ bahulī-katesu ime satta phalā sattānisaṁsā pāṭikaṅkhā" ti.|| ||