Saṁyutta Nikāya
5. Mahā-Vagga
46. Bojjhaṅga Saṁyutta
1. Pabbata Vagga

Sutta 6

Kuṇḍali Suttaṁ

 

---

[73]

[1][pts][bodh] Evam me sutaṁ:|| ||

Ekaṁ samayaṁ Bhagavā Sākete viharati Añcanavane Migadāye.|| ||

Atha kho Kuṇḍaliyo paribbājako yena Bhagavā ten'upasaṅkami.|| ||

Upasaṅkamitvā Bhagavatā saddhiṁ sammodi.|| ||

Sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdi.|| ||

Eka-m-antaṁ nisinno kho Kuṇḍaliyo paribbājako Bhagavantaṁ etad avoca:|| ||

"Aham asmi bho Gotama, ārāmanisādi parisā-vacaro.|| ||

Tassa mayhaṁ bho Gotama, pacchā-bhattaṁ bhuttapātarāsassa ayam ācāro hoti||
ārāmena ārāmaṁ uyyānena uyyānaṁ||
anucaṅkamāmi, anuvicarāmi.|| ||

So tattha passāmi eke samaṇa-brāhmaṇe itivāda-p-pamokkhānisaṁsañ c'eva kathaṁ kathente upārambhānisaṁsañ ca.|| ||

Bhavaṁ pana Gotamo kimānisaṁso viharatī" ti?|| ||

"Vijjā-vimutti-phalānisaṁso kho Kuṇḍaliya,||
Tathāgato viharatī" ti.

"Katame pana bho Gotama, dhammā bhāvitā bahulī-katā vijjā-vimuttiṁ paripūrentī" ti?|| ||

"Satta kho Kuṇḍaliya, bojjh'aṅgā bhāvitā bahulī-katā vijjā-vimuttiṁ paripūrentī" ti.|| ||

"Katame pana bho Gotama, dhammā bhāvitā bahulī-katā satta-bojjh'aṅge paripūrentī" ti?|| ||

"Cattāro kho Kuṇḍaliya, sati-paṭṭhānā bhāvitā bahulī-katā satta-bojjh'aṅge paripūrentī" ti.|| ||

"Katame bho Gotama, dhammā bhāvitā bahulī-katā cattāro sati-paṭṭhāne paripūrentī" ti?|| ||

"Tīṇi kho Kuṇḍaliya, sucaritāni bhāvitāni bahulī-katāni cattāro sati-paṭṭhāne paripūrentī" ti.|| ||

"Katame pana bho Gotama, dhammā bhāvitā bahulī-katā tīṇi sucaritāni paripūrentī" ti?|| ||

[74] "Indriya-saṁvaro kho Kuṇḍaliya, bhāvito bahulī-kato tīṇi sucaritāni paripūrenti.|| ||

Kathaṁ bhāvito ca Kuṇḍaliya, indriya-saṁvaro||
kathaṁ bahulī-kato tīṇi sucaritāni paripūreti?|| ||

Idha Kuṇḍaliya, bhikkhu||
cakkhunā rūpaṁ disvā manāpaṁ nābhijjhati,||
nābhihaṁsati,||
na rāgaṁ janeti.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

Cakkhunā kho pan'eva rūpaṁ disvā amanāpaṁ||
na maṅku hoti.|| ||

Apatiṭṭhina-citto ādīnamānaso avyāpanna-cetaso.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Puna ca paraṁ Kuṇḍaliya, bhikkhu||
sotena saddaṁ sutvā manāpaṁ nābhijjhati,||
nābhihaṁsati,||
na rāgaṁ janeti.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

Sotena kho pan'eva saddaṁ sutvā amanāpaṁ||
na maṅku hoti.|| ||

Apatiṭṭhina-citto ādīnamānaso avyāpanna-cetaso.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Ghānena gandhaṁ ghāyitvā manāpaṁ nābhijjhati,||
nābhihaṁsati,||
na rāgaṁ janeti.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

Gandhaṁ ghāyitvā amanāpaṁ||
na maṅku hoti.|| ||

Apatiṭṭhina-citto ādīnamānaso avyāpanna-cetaso.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Jivhāya rasaṇ sāyitvā manāpaṁ nābhijjhati,||
nābhihaṁsati,||
na rāgaṁ janeti.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

Jivhāya kho pan'eva rasaṇ sāyitvā amanāpaṁ||
na maṅku hoti.|| ||

Apatiṭṭhina-citto ādīnamānaso avyāpanna-cetaso.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Kāyena phoṭṭhabbaṁ phusitvā manāpaṁ nābhijjhati,||
nābhihaṁsati,||
na rāgaṁ janeti.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

Kāyena kho pan'eva phoṭṭhabbaṁ phusitvā amanāpaṁ||
na maṅku hoti.|| ||

Apatiṭṭhina-citto ādīnamānaso avyāpanna-cetaso.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Manasā dhammaṁ viññāya manāpaṁ nābhijjhati,||
nābhihaṁsati,||
na rāgaṁ janeti.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

Manasā kho pan'eva dhammaṁ viññāya amanāpaṁ||
na maṅku hoti.|| ||

Apatiṭṭhina-citto ādīnamānaso avyāpanna-cetaso.|| ||

Tassa ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

 

---

 

Yato kho Kuṇḍaliya, bhikkhuno||
cakkhunā rūpaṁ disvā manāpāmanāpesu rūpesu ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Sotena saddaṁ sutvā manāpāmanāpesu saddesu ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Ghānena gandhaṁ ghāyitvā manāpāmanāpesu gandhesu ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Jivhāya rasaṇ sāyitvā manāpāmanāpesu rasesu ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Kāyena phoṭṭhabbaṁ phusitvā manāpāmanāpesu phoṭṭhabbesu ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
su-vimuttaṁ.|| ||

■

Manasā dhammaṁ viññāya manāpāmanāpesu dhammesu ṭhito ca kāyo hoti,||
ṭhitaṁ cittaṁ,||
ajjhattaṁ susaṇṭhitaṁ,||
[75] su-vimuttaṁ.|| ||

Evaṁ bhāvito kho Kuṇḍaliya, indriya-saṁvaro||
evaṁ bahulī-kato tīṇi sucaritāni paripūreti.

 

---

 

Kathaṁ bhāvitāni ca Kuṇḍaliya,||
tīṇi sucaritāni||
kathaṁ bahulī-katāni||
cattāro sati-paṭṭhāne paripūrenti?|| ||

Idha Kuṇḍaliya, bhikkhu kāya-du-c-caritaṁ pahāya||
kāya-su-caritaṁ bhāveti.|| ||

Vacī-du-c-caritaṁ pahāya||
vacī-su-caritaṁ bhāveti.|| ||

Mano-du-c-caritaṁ pahāya||
mano-su-caritaṁ bhāveti.|| ||

Evaṁ bhāvitāni kho Kuṇḍaliya,||
tīṇi sucaritāni||
evaṁ bahulī-katāni||
cattāro sati-paṭṭhāne paripūrentī.|| ||

 

---

 

Kathaṁ bhāvitā ca Kuṇḍaliya,||
cattāro sati-paṭṭhānā||
kathaṁ bahulī-katā satta bojjh'aṅge paripūrenti?|| ||

Idha Kuṇḍaliya, bhikkhu||
kāye kāy'ānupassī viharati,||
ātāpī||
sampajāno||
satimā||
vineyya loke abhijjhā-domanassaṁ.|| ||

■

Vedanāsu vedan'ānupassī viharati,||
ātāpī||
sampajāno||
satimā||
vineyya loke abhijjhā-domanassaṁ.|| ||

■

Citte citt'ānupassī viharati,||
ātāpī||
sampajāno||
satimā||
vineyya loke abhijjhā-domanassaṁ.|| ||

■

Dhammesu Dhamm'ānupassī viharati viharati,||
ātāpī||
sampajāno||
satimā||
vineyya loke abhijjhā-domanassaṁ.|| ||

Evaṁ bhāvitā kho Kuṇḍaliya,||
cattāro sati-paṭṭhānā||
evaṁ bahulī-katā||
satta bojjh'aṅge paripūrenti.|| ||

 

---

 

Kathaṁ bhāvitā ca kho Kuṇḍaliya,||
satta bojjh'aṅgā||
kathaṁ bahulī-katā vijajāvimuttiṁ paripūrenti?|| ||

Idha Kuṇḍaliya, Bhikkhu||
sati-sambojjh'aṅgaṁ bhāveti,||
viveka-nissitaṁ,||
virāga-nissitaṁ,||
nirodha-nissitaṁ,||
vossagga-pariṇāmiṁ.|| ||

Dhamma-vicaya-sambojjh'aṅgaṁ bhāveti,||
viveka-nissitaṁ,||
virāga-nissitaṁ,||
nirodha-nissitaṁ,||
vossagga-pariṇāmiṁ.|| ||

Viriya-sambojjh'aṅgaṁ bhāveti,||
viveka-nissitaṁ,||
virāga-nissitaṁ,||
nirodha-nissitaṁ,||
vossagga-pariṇāmiṁ.|| ||

Pīti-sambojjh'aṅgaṁ bhāveti,||
viveka-nissitaṁ,||
virāga-nissitaṁ,||
nirodha-nissitaṁ,||
vossagga-pariṇāmiṁ.|| ||

Passaddhi-sambojjh'aṅgaṁ bhāveti,||
viveka-nissitaṁ,||
virāga-nissitaṁ,||
nirodha-nissitaṁ,||
vossagga-pariṇāmiṁ.|| ||

Samādhi-sambojjh'aṅgaṁ bhāveti,||
viveka-nissitaṁ,||
virāga-nissitaṁ,||
nirodha-nissitaṁ,||
vossagga-pariṇāmiṁ.|| ||

Upekkhā-sambojjh'aṅgaṁ bhāveti,||
viveka-nissitaṁ,||
virāga-nissitaṁ,||
nirodha-nissitaṁ,||
vossagga-pariṇāmiṁ.|| ||

Evaṁ bhāvitā kho Kuṇḍaliya,||
satta bojjh'aṅgā||
evaṁ bahulī-katā||
vijjā-vimuttiṁ paripūrentī" ti.|| ||

Evaṁ vutte Kuṇḍaliyo paribbājako Bhagavantaṁ etad avoca:|| ||

"Abhikkantaṁ bho Gotama!|| ||

Abhikkantaṁ bho Gotama!|| ||

Seyyathā pi bho Gotama,||
nikkujjitaṁ vā ukkujjeyya,||
paṭi-c-channaṁ vā vivareyya,||
mūḷhassa vā Maggaṁ ācikkheyya,||
andha-kāre vā tela-pajjotaṁ dhāreyya||
'cakkhu-manto rūpāni dakkhintī' ti.|| ||

Evam evaṁ bhotā Gotamena||
aneka-pariyāyena dhammo pakāsito.|| ||

Es'āhaṁ Bhagavantaṁ Gotamaṁ saraṇaṁ gacchāmi,||
Dhammañ ca||
bhikkhu-saṅghañ ca.|| ||

Upāsakaṁ maṁ bhavaṁ Gotamo dhāretu ajja-t-agge pāṇupetaṁ saraṇaṁ gatan" ti.|| ||