Saṁyutta Nikāya
5. Mahā-Vagga
46. Bojjhaṅga Saṁyutta
3. Udāyi Vagga

Sutta 24

A-yoniso Suttaṁ

 

---

[84]

[1][pts][bodh] Evam me sutaṁ:|| ||

Ekaṁ samayam Bhagavā Sāvatthiyaṁ viharati Jetavane Anāthapindikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"A-yoniso bhikkhave, mana-sikaroto||
anuppanno c'eva kāma-c-chando uppajjati,||
uppanno ca kāma-c-chando bhiyyo-bhāvāya||
vepullāya saṁvaṭṭati.|| ||

■

[85] Anuppanno c'eva vyāpādo uppajjati,||
uppanno ca vyāpādo bhiyyo-bhāvāya||
vepullāya saṁvaṭṭati.|| ||

■

Anuppannañ c'eva thīna-middhaṁ uppajjati,||
uppannañ ca thīna-middhaṁ bhiyyo-bhāvāya||
vepullāya saṁvaṭṭati.|| ||

■

Anuppannañ c'eva uddhacca-kukkuccaṁ uppajjati,||
uppannañ c'eva uddhacca-kukkuccaṁ bhiyyo-bhāvāya||
vepullāya saṁvaṭṭati.|| ||

■

Anuppannā c'eva vicikicchā uppajjati,||
uppannā ca vicikicchā bhiyyo-bhāvāya||
vepullāya saṁvaṭṭati.|| ||

 

§

 

Anuppanno ca sati-sambojjh'aṅgo n'ūppajjati,||
uppanno ca sati-sambojjh'aṅgo nirujjhati.|| ||

■

Anuppanno ca dhamma-vicaya-sambojjh'aṅgo n'ūppajjati,||
uppanno ca dhamma-vicaya-sambojjh'aṅgo nirujjhati.|| ||

■

Anuppanno ca viriya-sambojjh'aṅgo n'ūppajjati,||
uppanno ca viriya-sambojjh'aṅgo nirujjhati.|| ||

■

Anuppanno ca pīti-sambojjh'aṅgo n'ūppajjati,||
uppanno ca pīti-sambojjh'aṅgo nirujjhati.|| ||

■

Anuppanno ca passaddhi-sambojjh'aṅgo n'ūppajjati,||
uppanno ca passaddhi-sambojjh'aṅgo nirujjhati.|| ||

■

Anuppanno ca samādhi-sambojjh'aṅgo n'ūppajjati,||
uppanno ca samādhi-sambojjh'aṅgo nirujjhati.|| ||

■

Anuppanno ca upekhā-sambojjh'aṅgo n'ūppajjati,||
uppanno ca upekhā-sambojjh'aṅgo nirujjhati.|| ||

 

§

 

Yoniso bhikkhave, mana-sikaroto||
anuppanno c'eva kāma-c-chando n'ūppajjati,||
uppanno ca kāma-c-chando pahīyati.|| ||

■

Anuppanno c'eva vyāpādo n'ūppajjati,||
uppanno ca vyāpādo pahīyati.|| ||

■

Anuppannañ c'eva thīna-middhaṁ n'ūppajjati,||
uppannañ ca thīna-middhaṁ pahīyati.|| ||

■

Anuppannañ c'eva uddhacca-kukkuccaṁ n'ūppajjati,||
uppannañ ca uddhacca-kukkuccaṁ pahīyati.|| ||

■

Anuppannā c'eva vicikicchā n'ūppajjati,||
uppannā ca vicikicchā pahīyati.|| ||

 

§

 

Anuppanno ca sati-sambojjh'aṅgo uppajjati,||
uppanno ca sati-sambojjh'aṅgo bhāvanā-pāripūriṁ gacchati.|| ||

■

Anuppanno ca dhamma-vicaya-sambojjh'aṅgo uppajjati,||
uppanno ca dhamma-vicaya-sambojjh'aṅgo bhāvanā-pāripūriṁ gacchati.|| ||

■

Anuppanno ca viriya-sambojjh'aṅgo uppajjati,||
uppanno ca viriya-sambojjh'aṅgo bhāvanā-pāripūriṁ gacchati.|| ||

■

Anuppanno ca pīti-sambojjh'aṅgo uppajjati,||
uppanno ca pīti-sambojjh'aṅgo bhāvanā-pāripūriṁ gacchati.|| ||

■

Anuppanno ca passaddhi-sambojjh'aṅgo uppajjati,||
uppanno ca passaddhi-sambojjh'aṅgo bhāvanā-pāripūriṁ gacchati.|| ||

■

Anuppanno ca samādhi-sambojjh'aṅgo uppajjati,||
uppanno ca samādhi-sambojjh'aṅgo bhāvanā-pāripūriṁ gacchati.|| ||

■

Anuppanno ca upekhā-sambojjh'aṅgo uppajjati,||
uppanno ca upekhā-sambojjh'aṅgo bhāvanā-pāripūriṁ gacchatī" ti.|| ||