Samyutta Nikaya Masthead


[Home]  [Sutta Indexes]  [Glossology]  [Site Sub-Sections]
[PEDPāḷi English Dictionary]  [PEDSutta Search]  [Dhammatalk SearchDhammatalk Search]


 

Saṁyutta Nikāya
5. Mahā-Vagga
46. Bojjhaṅga Saṁyutta
3. Udāyi Vagga

Sutta 30

Udāyī Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[89]

[1][pts][bodh] Evam me sutaṁ:|| ||

Ekaṁ samayaṁ Bhagavā Sumhesu viharati Setakaṁ nāma Sumbhānaṁ nigamo.|| ||

Atha kho āyasmā Udāyī yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho āyasmā Udāyī Bhagavantaṁ etad avoca:|| ||

"Acchariyaṁ bhante,||
abbhutaṁ bhante,||
yāva bahu-kataṁ ca me bhante,||
Bhagavati pemaṁ ca||
gāravo ca||
hiri ca||
ottappañ ca.|| ||

Ahaṁ hi bhante, pubbe agārika-bhūto samāno abahukato ahosiṁ dhammena.|| ||

Abahukato saṅghena.|| ||

So khv'āhaṁ bhante,||
Bhagavati pemaṁ ca||
gāravaṁ ca||
hiriṁ ca||
ottapañ ca||
sampassamāno agārasmā anagāriyaṁ pabbajiṁ.|| ||

Tassa me Bhagavā dhammaṁ desesi:|| ||

'Iti rūpaṁ,||
iti rūpassa samudayo,||
iti rūpassa attha-gamo,|| ||

iti vedanā,||
iti vedanāya samudayo,||
iti vedanāya attha-gamo,|| ||

iti saññā,||
iti saññāya samudayo,||
iti saññāya attha-gamo,|| ||

iti saṅkhārā,||
iti saṅkhārānaṁ samudayo,||
iti saṅkhārānaṁ attha-gamo,|| ||

iti viññāṇaṁ,||
iti viññāṇassa samudayo,||
iti viññāṇassa attha-gamo' ti.|| ||

So khv'āhaṁ bhante, suññ-ā-gāra-gato imesu pañc'upādāna-k-khandhānam ukkujjāvakujjaṁ samparivattento||
'idaṁ dukkhan' ti yathā-bhūtaṁ abbhaññāsiṁ.|| ||

'Ayaṁ dukkha-samudayo' ti||
[90] yathā-bhūtaṁ abbhaññāsiṁ.|| ||

'Ayaṁ dukkha-nirodho' ti||
yathā-bhūtaṁ abbhaññāsiṁ.|| ||

'Ayaṁ dukkha-nirodha-gāminī-paṭipadā' ti||
yathā-bhūtaṁ abbhaññāsiṁ.|| ||

Dhammo ca me bhante, abhisamito,||
Maggo ca paṭiladdho,||
yo me bhāvito bahulī-kato||
tathā tathā viharantaṁ||
tathattāya upanessati.|| ||

Yath'āhaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi.|| ||

Sati-sambojjh'aṅgo kho me bhante, paṭiladdho.|| ||

Yo me bhāvito bahulī-kato||
tathā tathā viharantaṁ||
tathattāya upanessati.|| ||

Yath'āhaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi.|| ||

Dhamma-vicaya-sambojjh'aṅgo kho me bhante, paṭiladdho.|| ||

Yo me bhāvito bahulī-kato||
tathā tathā viharantaṁ||
tathattāya upanessati.|| ||

Yath'āhaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi.|| ||

Viriya-sambojjh'aṅgo kho me bhante, paṭiladdho.|| ||

Yo me bhāvito bahulī-kato||
tathā tathā viharantaṁ||
tathattāya upanessati.|| ||

Yath'āhaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi.|| ||

Pīti-sambojjh'aṅgo kho kho me bhante, paṭiladdho.|| ||

Yo me bhāvito bahulī-kato||
tathā tathā viharantaṁ||
tathattāya upanessati.|| ||

Yath'āhaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi.|| ||

Passaddhi-sambojjh'aṅgo kho me bhante, paṭiladdho.|| ||

Yo me bhāvito bahulī-kato||
tathā tathā viharantaṁ||
tathattāya upanessati.|| ||

Yath'āhaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi.|| ||

Samādhi-sambojjh'aṅgo kho kho me bhante, paṭiladdho.|| ||

Yo me bhāvito bahulī-kato||
tathā tathā viharantaṁ||
tathattāya upanessati.|| ||

Yath'āhaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi.|| ||

Upekhā-sambojjh'aṅgo kho kho me bhante, paṭiladdho.|| ||

Yo me bhāvito bahulī-kato||
tathā tathā viharantaṁ||
tathattāya upanessati.|| ||

Yath'āhaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi.|| ||

Ayaṁ kho me bhante, Maggo paṭiladdho.|| ||

Yo me bhāvito bahulī-kato||
tathā tathā viharantaṁ||
tathattāya upanessati.|| ||

Yath'āhaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi" ti.|| ||

 

§

 

"Sādhu sādhu Udāyi,||
eso hi te Udāyi,||
Maggo paṭiladdho.|| ||

Yo te bhāvito bahulī-kato||
tathā tathā viharantaṁ||
tathattāya upanessati.|| ||

Yathā tvaṁ:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānissāmi" ti.|| ||

 


Contact:
E-mail
Copyright Statement