Saṁyutta Nikāya
5. Mahā-Vagga
46. Bojjhaṅga Saṁyutta
4. Nīvaraṇa Vagga

Sutta 38

Āvaraṇa-Nīvaraṇa (or Nīvaraṇ'Āvaraṇa) Suttaṁ

 

---

[94]

[1][pts][bodh][than] Evam me sutaṁ:|| ||

Ekaṁ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Pañc'ime bhikkhave, āvaraṇā nīvaraṇā cetaso upakkilesā paññāya dubbalī-karaṇā.|| ||

Katame pañca?|| ||

Kāma-c-chando bhikkhave, āvaraṇo nīvaraṇo cetaso upakkileso paññāya dubbalī-karaṇo.|| ||

Vyāpādo bhikkhave, āvaraṇo nīvaraṇo cetaso upakkileso paññāya dubbalī-karaṇo.|| ||

Thīna-middhaṁ bhikkhave, āvaraṇaṁ nīvaraṇaṁ cetaso upakkilesaṁ paññāya dubbalī-karaṇaṁ.|| ||

Uddhacca-kukkuccaṁ [95] bhikkhave, āvaraṇaṁ nīvaraṇaṁ cetaso upakkilesaṁ paññāya dubbalī-karaṇaṁ.|| ||

Vicikicchā bhikkhave, āvaraṇā nīvaraṇā cetaso upakkilesā paññāya dubbalī-karaṇā.|| ||

Ime kho bhikkhave, pañca āvaraṇā nīvaraṇā cetaso upakkilesā paññāya dubbalī-karaṇā.

Satt'ime bhikkhave bojjh'aṅgā anāvaraṇā anīvaraṇā cetaso anupakkilesā bhavitā bahulī-katā vijjā-vimutti-phala-sacchi-kiriyāya saṁvittanti.|| ||

Katame satta?|| ||

Sati-sambojjh'aṅgo bhikkhave anāvaraṇo anīvaraṇo cetaso anupakkileso bhavito bahulī-kato vijjā-vimutti-phala-sacchi-kiriyāya saṁvittanti.|| ||

Dhamma-vicaya-sambojjh'aṅgo bhikkhave anāvaraṇo anīvaraṇo cetaso anupakkileso bhavito bahulī-kato vijjā-vimutti-phala-sacchi-kiriyāya saṁvittanti.|| ||

 

Viriya-sambojjh'aṅgo bhikkhave anāvaraṇo anīvaraṇo cetaso anupakkileso bhavito bahulī-kato vijjā-vimutti-phala-sacchi-kiriyāya saṁvittanti.|| ||

Pīti-sambojjh'aṅgo bhikkhave anāvaraṇo anīvaraṇo cetaso anupakkileso bhavito bahulī-kato vijjā-vimutti-phala-sacchi-kiriyāya saṁvittanti.|| ||

Passaddhi-sambojjh'aṅgo bhikkhave anāvaraṇo anīvaraṇo cetaso anupakkileso bhavito bahulī-kato vijjā-vimutti-phala-sacchi-kiriyāya saṁvittanti.|| ||

Samādhi-sambojjh'aṅgo bhikkhave anāvaraṇo anīvaraṇo cetaso anupakkileso bhavito bahulī-kato vijjā-vimutti-phala-sacchi-kiriyāya saṁvittanti.|| ||

Upekkhā-sambojjh'aṅgo bhikkhave anāvaraṇo anīvaraṇo cetaso anupakkileso bhavito bahulī-kato vijjā-vimutti-phala-sacchi-kiriyāya saṁvittanti.|| ||

Ime kho bhikkhave satta bojjh'aṅgā anāvaraṇā anīvaraṇā cetaso anupakkilesā bhavitā bahulī-katā vijjā-vimutti-phala-sacchi-kiriyāya saṁvittanti.|| ||

 

§

 

[2][pts][bodh] Yasmiṁ bhikkhave, samaye ariya-sāvako||
aṭṭhiṁ katvā||
manasi-katvā||
sabba-cetaso||
samannā-haritvā||
ohita-soto Dhammaṁ suṇāti.|| ||

Imassa pañca nīvaraṇā tasmiṁ samaye na honti.|| ||

Satta bojjh'aṅgā tasmiṁ samaye bhāvanā pāripūriṁ gacchanti.|| ||

Katame pañca nīvaraṇā tasmiṁ samaye na honti?|| ||

Kāma-c-chanda-nīvaraṇaṁ tasmiṁ samaye na hoti.|| ||

Vyāpāda-nīvaraṇaṁ tasmiṁ samaye na hoti.|| ||

Thīna-middha-nīvaraṇaṁ tasmiṁ samaye na hoti.|| ||

Uddhacca-kukkucca-nīvaraṇaṁ tasmiṁ samaye na hoti.|| ||

Vicikicchā-nīvaraṇaṁ tasmiṁ samaye na hoti.|| ||

Imassa pañca-nīvaraṇā tasmiṁ samaye na honti.|| ||

■

Katame satta bojjh'aṅgā tasmiṁ samaye bhāvanā pāripūriṁ gacchanti?|| ||

Sati-sambojjh'aṅgo tasmiṁ samaye bhāvanā pāripūriṁ gacchati.|| ||

Dhamma-vicaya-sambojjh'aṅgo tasmiṁ samaye bhāvanā pāripūriṁ gacchati.|| ||

Viriya-sambojjh'aṅgo tasmiṁ samaye bhāvanā pāripūriṁ gacchati.|| ||

Pīti-sambojjh'aṅgo tasmiṁ samaye bhāvanā pāripūriṁ gacchati.|| ||

Passaddhi-sambojjh'aṅgo tasmiṁ samaye bhāvanā pāripūriṁ gacchati.|| ||

Samādhi-sambojjh'aṅgo tasmiṁ samaye bhāvanā pāripūriṁ gacchati.|| ||

Upekhā-sambojjh'aṅgo tasmiṁ samaye bhāvanā pāripūriṁ gacchati.|| ||

[96] Yasmiṁ bhikkhave, samaye ariya-sāvako aṭṭhiṁ katvā manasi katvā sabba-cetaso samannā-haritvā ohita-soto dhammaṁ suṇāti.|| ||

Imassa pañca nīvaraṇā tasmiṁ samaye na honti.|| ||

Ime satta bojjh'aṅgā tasmiṁ samaye bhāvan āpāripūriṁ gacchantī" ti.|| ||